就支持證券業發展議案之發言

金融業係本港嘅龍頭產業,對本港有重大嘅貢獻。好多人都以為,金融業人人都身光頸靚,搵到盆滿缽滿,但正所謂「家家有本難唸的經」,即使係龍頭產業,風光嘅背後,不少人捱得好辛苦。今日嘅議案提出支持證券業發展,實際上係話俾大家知,本地中小型證券商正面對經營困難嘅苦況,已經長期錄得虧損,正所謂「得番半條人命」,極需要政府的幫助。

事實上,外界一直以為股票經紀收入豐厚,但查實咁嘅年代已經成為過去,尤其係本地中小型證券行嘅經紀,聽講近年佢哋嘅收入相當唔穩定,而且多數維持喺低水平,有好多人仲話要兼職幫補生計。股票經紀嘅境況,正好反映出目前中小型證券商艱苦嘅經營情況。

我相信,市道低迷係其中一個重要原因,自從金融海嘯發生後,以至歐債危機嘅出現,令全球經濟處於不明朗嘅狀態,股市一直處於低迷嘅狀態,散戶喺股市賺唔到錢,自然減少股票嘅投資,對中小型證券商自然首當其衝。

另一個主要原因,我相信係行業發展嘅問題,自從網上交易日漸成熟,銀行及大行嘅競爭優勢亦逐漸擴大,而銀行由於資本雄厚及業務廣泛,有能力推出好多優惠及便利,去爭取客戶,例如近期就有大機構提出五年免佣嘅震撼優惠,中小型證券商唔好話競爭,恐怕連招架的能力都無!

雖然係咁,但我唔認為證券商會無生存空間,只要佢哋能夠靈活創新,中小型證券商一定唔駛走上絕路。我唔想喺度爭論,政府喺改革金融市場時,有無向大行傾斜,只係希望政府日後推行新政策時,唔應單單考慮政策嘅效益,更應同時考慮到新政策對所有業界人士嘅影響,特別係業界內嘅弱勢社群,應該協助佢哋走向持續發展嘅道路,而唔可以一味追求效益,而將佢哋置之不理。其實,政府近年對金融業,無論係證券、銀行或保險業,都提出咗更多更仔細的規管,對業界構成咗唔少壓力,希望政府日後再推出新政策時,能夠小心研究對業界帶來的不良影響。

證券商除咗寄望政府嘅協助外,最重要仲係要自強不息,努力開發可行嘅道路,例如研究轉型的方法、改變營運模式、優化現有服務,甚至擴大經營嘅業務,以至開發內地市場等等。當中有部份係需要政府嘅推動,但只要大家尋找到可行嘅方案,我相信,立法會財經事務委員會及其他同事,都好願意為大家跟進。

另一方面,中小型嘅證券商目前經營艱難,其中一個重要原因,係營運規模太細,以至競爭力不足。所以,中小型的證券商應該設法增加自己的經營及資金規模,例如透過證券商之間嘅合併或結盟等方式,增加營運嘅規模,再加上中小型證券商靈活及服務貼身嘅優點,相信足以同大行競爭。當然,合併或結盟都會影響公司嘅結構,對經營者來講,係一個唔容易嘅決定,但要增加競爭力,呢個都係一個值得研究的方法。

最後,我認為,政府應該先為有困難嘅證券商,推出一啲財務嘅援助計劃,例如低息貸款、豁免部份交易嘅徵費、以及提供稅務上嘅協助等等,俾券商有一個抖下氣嘅機會,起碼券商保住條命,先有機會諗下發展嘅出路。

社交分享