主席:
立法會今日辯論紓解貧窮嘅議案，有多位議員提出修正，提出好多扶貧嘅建議，我都支持，但係更改香港稅收方式嘅建議我就有保留。的而且確，香港嘅貧窮問題日益嚴重，現在大家提出多項紓解嘅辦法，但卻少有提出從源頭堵塞問題，從根源去解決貧窮問題，咁就可以解釋到，點解本港社會「越扶越貧」。
本港貧窮問題嘅形成，可能有不同的因素，但最基本嘅原因，離唔開人口政策失敗及經濟結構失衡嘅問題。其實，呢兩個問題我已經喺不同場合講過多次，今日唔打算再詳細分析，只係想再講一講人口政策嘅問題。
事實上，人口政策如果沒有妥善嘅處理，就等如不斷輸入貧窮，即使政府做幾多扶貧嘅工作，本港都難以擺脫日益貧窮嘅厄運。根據入境處嘅資料，持單程通行證來港家庭團聚嘅新移民，大多只有中小學歷，有近一半人喺內地仲係家庭主婦，他們來港後，大多只能從事較低收入嘅工作，甚至可能搵唔到嘢做。當然，家庭團聚係每個人應有嘅權利，不能阻止，但政府應該有更妥善嘅安排，例如做好人口推算嘅工作，從而提出針對性嘅政策。過去，政府無為人口嘅發展做好部署，導致社會出現不少惡果，例如天水圍嘅問題。我認為，政府應盡快重新檢討人口政策，以及本港嘅人口承載能力，從而加強本港喺教育、再培訓、醫療、住屋及經濟等政策嘅安排。
其實，我對扶貧工作係充滿信心，因為今年立法會各大政黨都將大部份嘅精力放喺扶貧嘅工作上，各位同事一定會爭取到底。同樣，政府為了得到市民嘅支持，亦一定將大部份嘅精力放喺扶貧嘅工作上，只要行得通，政府亦必然盡力去做。
不過，我想講，扶貧工作係要花費好大量金錢，大家都明白「要有錢洗，就一定要努力賺錢」嘅道理，政府都一樣，如果要「大開水喉」，但又「識洗唔識搵」，即使今日庫房儲備充足，都不能夠「頂得好耐」，始終有一日變成希臘一樣，到時不但扶唔到貧，仲要大幅削減福利，現在大家都見識到希臘人民苦不堪言嘅情況。所以，我好希望大家，支持扶貧工作之同時，亦都支持政府為商界開拓更廣闊嘅商機，為本港賺取更多嘅收入，以支持本港嘅公共開支。
今日各位議員提出嘅建議，不少我都支持，但有部份就有保留，甚至反對。原議案中提出改善稅制，建議實行利得稅累進稅制，以向獲取巨利嘅機構收取更多嘅稅款，以及研究開徵資產增值稅。有議員認為，向商業機構收取更多嘅利得稅，就可以應付扶貧開支，這只係一廂情願嘅想法。事實上，在商業嘅世界中，香港並非獨市生意，香港其中一項優勢，就是簡單而低嘅稅率，好多外國投資者都係睇中香港呢一點，先至選擇投資香港，而本港嘅主要競爭對手，例如新加坡同上海，近年都大幅減低相關嘅商業稅率，目的就係搶香港嘅生意，現在本港反其道而行，等如鼓勵投資者離開香港，名副其實係「趕客走」。如果真係出現咁嘅情況，香港會逐漸失去競爭力，老實講，目前新加坡已經有唔少地方超越香港，遲啲恐怕連上海、廣州都會趕過。所以，加利得稅短期可以增加稅收，但長期就等如「飲砒霜止渴」，最後連自己都毒死埋！
至於開徵資產增值稅，就更加涉及重大稅務原則嘅調整，執行上亦好多問題去處理，不但影響本港簡單而低稅率嘅大原則，更加直接影響到廣大市民嘅實際利益，會引起社會更多衝突同對抗，肯定得不償失，所以不能支持！
本人謹此陳詞。
