就保障職業安全議案之發言

香港係一個先進嘅大都會,維港兩岸遍佈現代化嘅建築物,但喺繁華嘅背後,本港建造業致命嘅工業意外一直持續高企。我哋經常會喺新聞報導中見到有致命嘅工業 意外發生,意外中死者大都係家庭支柱,遺下嘅妻兒孤寡,既要承受失去至親嘅打擊,又要面對前路茫茫嘅擔憂,實在令人感到痛心。其實,我哋亦都要問,係咪我 哋嘅工作做得唔足夠,點解悲劇會不斷重演?

本港工業意外嘅傷亡率一直偏高,過去五年建造業嘅工業意外個案,每年大約有二千多至三 千宗,而死亡個案則除咗二零一零年有九宗之外,其餘每年都有十多至二十多宗,死亡嘅個案實在一宗都嫌多,目前嘅情況實在令人感到傷痛。本港近年大興土木, 大型基建一項接一項,而喺未來十多年,除了基建外,更會大量興建公私營房屋,根據過往經驗,每逢建造業進入高峰期,工業意外亦必然出現上升嘅趨勢,本港必 須及時做好預防嘅措施。我認為,對工業意外嚟講,今日已經去到一個臨界點,政府必須盡快全面檢討目前嘅工作,以迎接未來嘅新發展,更要防止類似嘅悲劇不斷 重覆發生。

工業意外嘅發生,可能有好多不同嘅原因,根據工業傷亡權益會嘅分析,地盤發生嘅意外, 唔少都同施工期緊迫、安全標準落後、及工人缺乏或不正確使用個人防護裝備有關,同時勞工處嘅地盤巡查及檢控不足,法庭嘅懲罰亦過輕,根本起唔到阻嚇嘅作 用。另外,有業界人士指出,有好多需要高空工作嘅工人,例如棚架師傅,自以為經驗豐富,往往做一啲簡單嘅工序時不肯帶安全帶,反映出安全意識嚴重不足。

事實上,根據最新嘅資料,過去五年勞工處的執法行動中,每年提出嘅檢控不足二千宗,而 較常見嘅罪行平均每宗判罰萬多元,而且絕大部份只係告僱主,甚少會告違規嘅工人。所以,檢控不足及懲罰過輕,的確起唔到阻嚇嘅作用,唯獨勞工處發出嘅「暫 時停工通知書」,由於要地盤停工,阻嚇力會較大,係勞工處嘅殺手鐧。

不過,殺手鐧始終影響太大,會連累其他工人都無工開,唔應該隨便就用,政府應針對檢控 不足及懲罰過輕嘅問題,增加巡查及檢控嘅工作,對判決太輕嘅個案提出上訴,另外要向一啲明知故犯嘅工人提出檢控。過去政府好少檢控違規工人,但正所謂「針 唔桔到肉就唔知痛」,工人知道唔用安全帶或唔按安全程序工作就好可能會被檢控,就一定唔敢做,當然我都唔同意判工人入獄或巨額罰款,但判社會服務令或上職 安課程,我相信大家都可以接受。

另一方面,要進一步提昇建造業嘅職業安全,我認為要讓建造業走上專業化嘅道路。目前, 建造業雖然發展蓬勃,但亦都有好大嘅隱憂,包括地盤環境欠佳、大都欠缺完善嘅管理、工人欠缺安全意識等等,有關嘅問題會間接助長意外嘅發生,同時建造業亦 都出現青黃不接嘅情況,工人平均年齡大,就算薪酬優厚,青年人亦唔願意入行,導致人手長期緊張。

所以,我認為,建造業走上專業化嘅道路,地盤要全面引入現代化嘅管理方法,而且工地嘅 設計要以安全及整潔為優先考慮,工人要接受全面嘅安全意識培訓,並且學習最先進嘅工作技術,以及嚴格遵守工作指引辦事等等,從而建立專業嘅形象。當然,有 關嘅建議將會令僱主增加開支,但就可以有效提昇職業安全嘅水平,仲可以吸引更多青年人入行,解決青黃不接嘅問題,令到建造業可持續發展,實在值得大家去進 一步作出研究。

社交分享