而家社會上有一種風氣，就係公職人員，無論官員又好，立法會議員又好，如果佢不依足利益申報規定，固然叫佢下台，就算佢依足規定申報利益，一樣會話申報制度追唔上時代，申報資料不足夠，跟住追問佢大量申報以外嘅資料 ，答得慢就話佢隱瞞，佢若因要在短時間內只能問幾多就答幾多，就話佢唧牙膏。
另一點最常講，就係話市民對公眾人物嘅要求越來越高，要顧及公眾觀感，呢個係事實，但係其實唔同人對同一件事都會有唔同觀感，點知跟邊個要求至啱，所以最公道就係根據各政府部門或者機會嘅申報制度去做，令有關人員有例可依。所以，如果有公職人員依足規定申報，就算有人覺得資料不足，申報制度不完美，亦應該將利益疑點歸當事人，判斷佢基本上係合格嘅。
睇返局長事件，局長在佢上任局長初期，發現有關嘅地皮位於新界東北發展範圍內，已即時向特首申報，局長其後亦都強調自己、太太及子女喺新界東北發展區均再沒有任何利益。行政長官亦都親口證實，局長已經做了應該做嘅申報。
局長已完全按照現有制度，作出了利益申報，並已經多番交代有關農地嘅事宜。事實上，政府現行有一套既定制度及程序，官員只要嚴格遵守制度辦事，便應該符合要求，免受刑責。可惜局長今次雖然已經申報，仍然受到猛烈嘅攻擊，咁申報制度又有乜嘢用。當然，即使制度有幾嚴謹，都有進一步完善嘅空間，但喺修改前，我哋仍然要以現行嘅制度為依歸，如果唔係就會變成冇申報會死，依足規定申報都死，咁又有冇道理？公唔公道？
但當然有人會話，唔查點知重有冇隱瞞？據傳媒報導，廉署已經決定立案調查今次事件。我相信，既然廉署出面調查，我哋更加無理由喺調查完成前，就引用特權法由立法會去做調查，咁樣就會俾社會一個錯誤訊息，以為立法會根本唔信任廉署。同時，立法會亦無可能做到廉署嘅咁全面嘅調查，如果廉署證實局長有行差踏錯，自然要受處分。
頭先有同事話，點解唔利用特權法以下嘅調查委員會，好機會向公眾證明自己係清白。但咁講即係等如同一個健康嘅人講，點解你唔俾我劏開你，檢查同證明你係冇毛病，等事件可以告一段落？我相信用特權法去審人，被審查嘅人受到嘅精神壓力、受嘅折騰，其實同將佢劏開冇乜分別。如果冇確實同足夠證據，係不應隨意用特權法嘅。
正如我上周喺內會所講，我以為立法會復會後，第一個要傾嘅議題，會係上海自貿區呢啲關乎香港前途嘅大事。
點知我哋仍然花時間喺內耗。其實而家無論老中青朋友同我講，近年本港已經花咗好多時間同精力喺內耗之中，令到社會嘅發展停滯不前。
好似過去本港曾經多年一直維持世界第一貨櫃港嘅地位，近年已經先後被新加坡、上海超越，而據悉深圳亦即將超越香港。
另外，香港回歸前嘅經濟狀況一直同新加坡叮噹馬頭，但今時今日，新加坡家庭月入已經差唔多係香港嘅一倍！面對咁嘅情況，點解我哋我哋仲可以無動於衷? 點解我哋仲要花時間喺無必要嘅內耗之中?
最令人擔心嘅，就係連中央似乎都唔睇好香港，除咗喺深圳搞咗一個前海，近日仲喺上海搞咗個自由貿易區，有好多分析都認為，大陸正係嘗試複製香港，當香港有乜閃失嘅時候，就可以取代香港。我當然唔希望見到咁嘅情況，但只要自貿區搶走香港一兩成生意，香港就已經好麻煩，長此下去更會令香港陷入險境，到時國際金融中心嘅地位亦會好似貨櫃碼頭一樣，最終都無辦法保得住，大家要知道，破壞容易建設難，就算我地而家一齊努力發展香港經濟，都要一段時間先有功效。我個人希望，香港人能夠重新投入社會建設之中，唔好再沉迷於內耗，否則我地嘅下一代，將來一定會怨我地不做正事，只係搞事。頭先政務司司長已解釋咗，發展局嘅決定並非局長個人嘅決定，希望大家能重新檢視東北發展計劃。
最後，我想特別一提，今次事件為局長、佢嘅家人及佢嘅親人帶嚟沉重嘅壓力，部份傳媒近乎不擇手段嘅追蹤拍攝，更加令到佢嘅子女同佢嘅親人受驚，已經遠超合理嘅界限，有關方面應該深刻反省。
