今日嘅議案喺促請政府善用公共財政，加強香港經濟創意動力。的而且確，本港嘅經濟競爭力早已經疲態畢現，近年更加不進則退，如果我們再唔醒覺，搵翻香港嘅奮鬥精神，香港嘅前景實在令人憂慮。
老實講，香港真係受到好多問題嘅困擾，香港競爭力排名從去年第1跌至第3，世界大學排名方面，香港大學排名下跌8位，排喺43位。雖然呢啲數據仍然未算好差，但只要大家深入了解本港目前嘅現狀，從各種跡象嚟睇，本港嘅優勢正在萎縮之中，確實唔可以掉以輕心。我最擔心嘅係到而家仍然有人唔相信本港已經出現危機。
要數香港的困難，真係有排數，例如樓價貴、租金貴、貧窮問題嚴重、教育質素下降、經濟結構唔平衡、營商環境變差等等。呢啲問題長期困擾我哋，直接或間接咁影響本港嘅競爭力，如果繼續迷信過去嘅積極不干預政策，繼續放任唔採取補救措施，香港真係可能會沉淪落去，再加上競爭對手一直對我哋虎視眈眈，如果我哋唔再醒覺，國際金融中心嘅地位長遠都可能保唔住，到時本港嘅經濟再無可能養得起700萬人。
不過，我哋雖然面對咁多困難，但香港仍然有好多強勢嘅優點，只要我哋能夠的起心肝，好好利用本港現有嘅優勢，我哋仍然可以擺脫而家嘅困境。我哋其中一項優勢，就係有豐厚嘅公共財政，財政儲備高達7000億，所以我好贊成善用公共財政嘅建議。事實上，香港喺豐厚嘅公共財政支持下，已經令我哋比好多相對財困嘅地方好，我哋可以憑著本港龐大嘅財富，去克服社會及經濟上嘅困局。
當然，我唔係鼓勵胡亂咁用我哋嘅財富，我亦反對漫無目的咁去派糖，但係我哋利用公共財政去克服目前社會上嘅困境，從而本港提昇競爭力，其實係對將來的投資，將來庫房可以有更豐厚嘅回報。所以喺適當嘅時間我哋唔應再做守財奴，而應該放膽去用，因為再龐大嘅儲備都有用晒嘅一日，只有對將來嘅投資，我哋先至可以生生不息，不斷創造財富。
另一方面，我認同本港有需要研究擴闊稅基嘅建議，但我更加認同本港應先去推動經濟發展，因為社會賺到更多財富，政府自然會有更多稅收。事實上，如果能夠有效刺激經濟，即使採取減稅嘅措施，亦都值得我哋去做。過去，我曾經多次建議政府推動總部經濟，吸引外資公司來港設地區總部，從而刺激本港經濟及創造更多工作職位，但要推動總部經濟首先就要為外資公司提供稅務優惠，可惜政府一直對呢個問題未有行動。
當然，社會上亦有意見反對減稅，認為只會益咗商業機構。但事實上，有學者指出，減稅係會刺激經濟，有可能令到稅收不減反加，取消遺產稅就係一個好例子，取消遺產稅後，本港得以逐步發展成為國際資產管理中心，有關建議係具有創新性。同樣道理，適量地寬減利得稅，一定可以刺激經濟投資，加強本港嘅競爭力，從而增加稅收。此外，我亦都贊成適量地寬減薪俸稅，從而減低市民，特別係中產階級嘅負擔，亦可從以刺激市民消費意欲，幫助零售業發展。
我明白到減稅嘅建議一定引起爭議，更會有人認為會動搖到稅收嘅穩定性，所以我會建議設有試驗期，例如訂明減稅兩年，政府再評估成效，如果屬正面，可以維持落去，否則就停止，呢啲比較靈活嘅做法，相信可以令反對嘅人安心。事實上，我哋嘅競爭對手新加坡，過去不斷會按照經濟及國際貿易情況，不時調整稅率，以提昇競爭力，我認為呢啲經驗係好值得我哋去借鏡。
