就對行政長官投不信任票議案之發言

今日再有議員提出對行政長官投不信任票嘅議案,其實近年已經有唔少類似針對政府團隊嘅議案,各黨派其實都充分表達大家嘅觀點,亦知道通過議案機會不大。當然,我哋要尊重議員提出議案嘅權利,但亦不禁要問,香港真係無其他迫切嘅問題要我哋討論? 政治問題真係大於一切?

目前香港社會嘅矛盾及問題,真係多到數唔晒,社會確實積聚咗好多怨氣、好多負能量,而呢啲怨氣可能有唔同嘅成因,我過去已經多次分析過,而家只係想強調一點,所有嘅矛盾都係經過長時間累積而成,而且都係好複雜嘅問題,如果我哋簡單咁將所有問題歸咎於就任只有一年多嘅特首身上,請大家撫心自問,咁樣嘅做法喺咪公平呢?

大家可以想像下,做特首,就好似進入咗一個炸彈區,如果佢左閃右避,或者再用多啲沙蓋住啲炸彈,五年好快過,就可以鬆人,但我地需要嘅,就係夠膽去拆彈嘅特首。特首同佢嘅政府團隊,而家就係夠膽去拆彈,包括房屋、土地、貧窮等等,但現實就係,拆咁多咁大嘅炸彈,難免有意外,拆彈者輕則損手爛腳,重則粉身碎骨。

有人批評呢啲拆彈團隊質素不高,手法又不夠高明,但大家要知道,而家拆嘅係十幾年積落嘅深層次炸彈,絕對有好多阻力同需要時間。而且做拆彈隊唔係好好玩,隨時自身受害,家人受罪,真係唔容易搵人做。

但如果我地重當香港係我地嘅屋企,又唔想移民,或者冇後路,我地就應該一齊想辦法協助拆彈團隊,而唔係成日扭曲佢地做事目的,嘲笑佢地,為佢地設置陷阱,做佢地嘅絆腳石,成日叫佢地收檔,因為我地必須承認,第一,現在嘅政府團隊正實實在在咁去處理香港深層次問題;第二,呢啲問題係要時間同多方配合先至做得成。

當然我認為政府有好多地方要改善,例如政治技巧、採納意見、市民溝通及經驗不足等等。

有人認為,現屆政府係弱勢政府,施政困難重重。但做成今日政府弱勢,正正係因為有人不理施政對錯,凡係政府提出嘅都要反對,或者只顧選票不顧全港利益,咁做對整個社會嚟講,一啲好處都無。政府上任一年多以嚟,經過咁多嘅爭議,我個人感覺到有唔少較溫和嘅市民對目前嘅政治爭拗感到不安,甚至越來越多人同情政府嘅困境。我希望議員能夠適可而止,唔好再為爭拗而爭拗,否則市民總有煩厭嘅一日,到時市民進一步不滿立法會嘅表現,對社會各界都無好處。

講開社會矛盾嘅問題,特別係本港競爭力不斷萎縮嘅問題,我認為立法會應承認呢類問題,並且協助政府推動提昇競爭力嘅工作,可惜嘅係,有唔少人仍然唔明白本港嘅處境,對世界市場嘅發展情況不甚了了。上周,我喺立法會中提到,中央成立上海自貿區,令人擔心中央有意複製香港,而自貿區只要搶到本港部份嘅生意,香港就有危機。今日提出不信任議案嘅郭家麒議員,當時就反駁話,香港有法治及言論自由,內地唔可能複製到香港。

其實,複製香港唔係我個人嘅觀點,而係好多經濟學者及報章評論都有同樣嘅分析,由於關係到本港嘅未來,所以真係非常重要。同時,我認同法治及言論自由係本港嘅優勢,但再強嘅優勢,都無可能單天保至尊,以一兩項優勢就可以保住全局,基本上係唔可能。

事實勝於雄辯,上海及深圳嘅經濟成績,相信都唔需要我多講。同樣,當年香港貨櫃碼頭吞吐量仍然係世界第一嘅時候,當時大家都以為香港有好多優勢,唔怕其他嘅競爭,結果新加坡首先贏我哋,上海跟著亦超越我哋,而家連深圳都就嚟爬我哋頭,呢啲教訓都係好深刻,千萬唔好合埋眼自己話冇可能,冇可能。

我同大家講咗咁多競爭力萎縮嘅問題,係想提醒大家,本港正面對迫切嘅危機,有好多工作等我哋去做、去討論。希望大家放下所有嘅恩恩怨怨,共同去振興香港,為廣大市民謀幸福。

社交分享