就盡快為旅遊業制定長遠規劃議案之發言

旅遊業係本港四大支柱產業之一,去年有超過4,800多萬名遊客來港,單係內地旅客,已經佔咗3,400多萬人,而根據業界嘅估算,本港有60多萬人從事旅遊及其他相關嘅行業,去年為香港各行各業帶來約2,700億元嘅收益 ,係香港經濟同就業市場不可缺少嘅重要一環。當年沙士過後,就係憑藉自由行重新帶旺番香港嘅市道。

不過,由於旅客,尤其係內地旅客增長迅速,而本港旅遊設施及接待能力未能夠跟得上,結果引起咗一啲經濟同社會上嘅矛盾,亦都為市民帶嚟一啲唔方便,包括遊客同市民喺文化上嘅矛盾、水貨客嘅問題、以及公共設施超出負荷嘅問題,呢啲問題都需要我哋正視,並應該盡快化解。但我認為,唔應該因為出現咗社會矛盾,就要減慢旅遊業嘅發展步伐。

事實上,本港四大支柱產業中,物流業早已失去競爭優勢,現在就嚟連世界第三嘅位置都保唔住; 金融業則面對強大嘅競爭者,前景令人憂慮; 工商及專業服務業近年嘅增長相當有限,發展空間亦不大; 唯有旅遊業不斷有增長,是可靠嘅經濟支柱,喺本港競爭力出現萎縮、產業發展不平衡嘅情況下,如果夾硬要減慢旅遊業嘅發展,實在等如自掘墳墓。

正如前面所講,大量內地旅客來港,衍生咗唔少問題,其中一個就係水貨客嘅問題。水貨客問題令到北區居民備受困擾,而水貨客搶購奶粉更加令全港好多家長不滿,具體情況我唔再多講。有人提出取消一簽多行措施、收回自由行審批權等建議,我認為係本未倒置嘅做法,即係等如旅客有人唔守規矩,全體旅客都要受罸,對一個自由社會嚟講,係唔公平嘅做法,亦都將水貨客及旅客混為一談。

我哋要遏止嘅係非法水貨活動,而唔係旅客,其實過去打擊走水貨嘅工作,已經有一定成效,例如限奶令及其他拘捕行動。如果水貨活動繼續滋擾到新界嘅居民,我哋可以要求政府加派執法人員去維持社區秩序,甚至加強緝捕行動,全面打擊非法水貨活動。長遠而言,我哋可以喺邊境或口岸地區興建大型商場,以疏導來港購物嘅人潮。呢啲都係主動解決問題嘅好方法,而遏止旅客來港只係斬腳趾避沙蟲,不但對雙方都無好處,只會加劇中港兩地嘅矛盾。

另外,內地旅客同本港市民喺文化上嘅差異,的確容易引起社會嘅衝突,我哋要小心處理。老實講,有一部份內地旅客喜歡大聲喧嘩、無禮貌、甚至做出一啲唔文明嘅行為,確實會引起市民反感。不過,大家要公道啲,呢啲不文明旅客始終只佔小部份,而且我相信隨著教育嘅普及,國內亦要同國際接軌,內地旅客長遠亦會漸漸改變,情況就類似本港70、80年代,當時港人外遊時都成日被批評無禮貌,而現在已經好少有咁嘅批評。政府亦可以主動做多啲宣傳工作,事實亦會收到一定效果,例如香港重罸垃圾蟲,旅客入境時大多收到有關的資訊,近年旅客亦較少會隨地拋垃圾或吐啖。同樣道理,政府如果加強宣傳工作,例如喺內地旅行社及本港關口加強宣傳,提醒旅客要注意及遵守嘅事項,甚至指出某些行為,例如隨地小便會受到檢控,相信會起到一定嘅阻嚇作用。

同時,可以參考外國嘅經驗,成立旅遊警察,例如近期首爾就已經成立一隊有101人嘅旅遊警察隊。我相信,旅遊警察除咗保護旅客之外,亦可以同時負起維持旅客秩序嘅工作,雖然要投入唔少資源,但可以起到一定嘅作用,減低旅客與市民出現衝突嘅機會,更可以有效打擊詐騙旅客嘅行為,實在值得我哋去研究。

至於公共設施超出負荷嘅問題,香港目前嘅旅遊設施的確存在老化、不足等等嘅情況,政府應該盡快去改善。我特別想提出討論嘅,係興建機場第三條跑道嘅問題。

由於旅客及貨運嘅快速增長,原本預期本港機場嘅升降量要到2018年才飽和,但現時機場每小時跑道升降量已達到64架次,預計到2015年便會達到最高嘅68架次,所以飽和嘅日期將會提早來臨。當機場飽和後,如果長時間唔能夠提高升降量,就無法滿足客運嘅需求,機位不敷需求,嚟香港嘅機票一定加價,到時就會嚴重影響到旅遊業,當然都會嚴重打擊本港嘅商貿活動,所以我哋必須要盡快興建第三條跑道。

社交分享