今日嘅議案喺促請政府經濟制裁菲律賓，還香港人尊嚴。馬尼拉人質事件發生至今超過三年，喺呢三年幾嚟，家屬不斷爭取同菲律賓政府要商討，要求調查整件事件嘅經過，並要求處分有關人士。 可惜嘅係，菲律賓政府喺呢件事上態度傲慢，亦都遲遲唔肯傾道歉同賠償嘅問題。
另外，喺喺亞太經合組織會議期間，特首為人質事件特別約見菲律賓總統。會見當中，座位編排唔對等，而菲方更單方面拍攝及公開片段，完全唔顧及外交禮節，亦對特區政府唔尊重。然而，菲律賓嘅無禮引起中央嘅關注，結果要總理李克強要求菲律賓總統盡快妥善解決事件。
經過總理出面干預後，菲律賓政府終於有所行動。早前，馬尼拉市議會通過決議案，向特區政府及受害者家屬表達「歉意」，並由馬尼拉市長主導和解工作，佢將於稍後來港，而馬尼拉市議員洪英鐘早前已經來港，先後同保安局及家屬代表見面，商討賠償及道歉等問題，但據報雙方分歧仍然好大。
我贊成政府及家屬現階段應先與菲方積極商談，爭取菲律賓方面作出一個官方正式嘅道歉，並盡快達成和解協議，達到「道歉、賠償、問責、改善」四方面嘅訴求，先至能夠重建香港對菲律賓嘅信心同關係。不過，如果菲方無誠意去解決問題，我哋下一階段就應該採取一啲可以對菲律賓構成壓力、但又唔影響到市民生活的制裁措施。
其實事件令到死者家屬及生還人質嘅人生受到重大創傷，再拖落去，對大家都唔好，好應該及早了結呢件心事。不過，事件始終牽涉到去國際外交層面，絕對要小心處理。事實上，政府已經採取更強硬嘅手段，行政長官已經明確表示，除非談判喺一個月內有實質成果，否則會對菲律賓採取制裁行動。
至於應該採取乜嘢行動，我認為，由葉劉淑儀議員提出，暫停對菲律賓旅客嘅免簽證安排，及收緊對持菲律賓護照人士發出商貿及工作簽證，係對本港影響較少，但又對菲律賓構成重大壓力嘅方法，值得我哋考慮。不過係現階段，我哋應繼續爭取談判有成果，若始終未能夠達成共識，政府先研究呢個做法都未遲，呢個做法只係需給與對方七日通知期就可以執行，實在簡單可行。
另外，有議員建議政府停止採購菲律賓物品，呼籲商界暫停與菲律賓嘅商業交流，甚至呼籲罷買菲貨。睇番工業貿易署嘅數字，二零一二年從菲律賓嘅進口總額達四百一十億港元，主要進口貨品有唔同類型嘅電動機械同埋電訊器具等，若果貿然抵制菲貨，其實同樣對本港工商業有一定嘅影響。再者，香港係世貿組織成員，而且係國際著名自由貿易港，過去絕少聽到本港停止同外國嘅貿易往來，現在貿貿然抵制菲貨，等如自己打爛自由貿易港嘅美譽，相當不智。
此外，社會上亦有意見覺得政府應該對菲律賓作出更嚴苛嘅制裁，例如暫停向菲律賓家庭傭工發出工作簽證。我認為呢啲做法會直接影響到香港人嘅生活，隨時牽一髮動全身，後果不堪設想。根據入境處數字，本港超過三十一萬名外籍家庭傭工當中，菲律賓傭工約佔一半。好多香港家庭嘅年幼仔女、長者或者行動不便嘅家庭成員，都係由菲傭照顧，萬一真係取消向佢地發出工作簽證，將會嚴重影響本港大部分家庭嘅生活。
