就減稅議案之發言

我哋今日討論全面減稅還富於民嘅議案,我好同意減稅建議,但我認為減稅除咗還富於民,仲有其他重要嘅目的,就係刺激經濟。早前,我就施政報告提交建議,其中一項重要主張,就係減稅以刺激經濟。

事實上,我一直都支持透過減稅或退稅嘅方式,達到還富於民嘅目的,但要長遠維持低稅嘅政策,政府一定想辦法去擴大收入嘅源頭,以彌補少收嘅稅款,及支付龐大嘅公共開支,否則今年減稅,過兩年又加番,咁嘅減稅根本無意義,亦唔係真正嘅還富於民。

今日有議員提議向企業開刀,呢啲建議等如殺雞取卵,無錯喺短期內政府可以搵到更多收入,但慢慢資金同人才就會流走,大家都知道,我哋嘅競爭對手係成日都想嚟搶走我哋嘅資金同人才,我哋向企業開刀,即等如將會為本港生金蛋嘅鵝,拱手送俾對手。所以,我認為,最好都係我哋去爭取人哋會生金蛋嘅鵝,我哋要提升本港嘅競爭力,吸引國際投資者嚟香港,最簡單直接就係減利得稅。

減稅以刺激經濟,係公共財政中常用嘅手段,目前本港正需要採用呢種手段,去重建本港嘅競爭優勢。本港競爭力逐漸萎縮嘅問題,近期本會已經多次討論過,今日我只想指出,提升整體競爭力係本港最優先要做嘅事,如果我哋故步自封,國際金融中心嘅地位就會好似世界第一貨櫃港嘅地位一樣,遲早都會被人搶走,所以本港需要盡快去提升競爭力。同時,隨著國內經濟改革進一步深化,本港面對嘅競爭會越來越激烈,上海已經成立自由貿易區,有內地傳媒報導,中央可能會喺短期內通過喺廣東省成立另一個自貿區,我哋要爭取進一步同國內合作,將香港嘅生意做大,當然需要多方面嘅配合,其中一定要優化本地嘅營商環境。

另外,本港有減稅嘅需要,但亦都要有能力先至可以減。本港已經累積超過7,000億元嘅財政儲備,再加上巨額嘅外匯基金盈餘,我哋喺坐擁萬多億財產,足以支持我哋推行減稅計劃。由於減稅去刺激經濟,一定需要一段時間先至見效,短期嚟講,稅收減少係無可避免嘅事,所以巨額財政儲備令本港有能力去實施減稅計劃。

有好多人都認為,減利得稅只會益咗大企業,呢啲只係短視嘅睇法,佢哋根本未睇到長遠對社會有幾大得益。我可以講一啲例子,等大家容易啲明白。新加坡近年經濟發展迅速,目前已經有唔少領域超越香港,佢哋嘅成功有好多方面嘅配合,但新加坡政府同有好多分析都認為,佢哋成功刺激起經濟,減稅係一個好重要嘅因素。喺97年,新加坡企業稅嘅稅率高達26%,佢哋先後因為經濟環境嘅變化,分5次削減企業稅稅率,直至目前嘅17%,已經貼近我哋16.5%嘅水平。佢哋大幅減稅,但收入增長亦相當驚人,新加坡同期嘅本地生產總值急速上升,由1,460億坡元升到最近已經超過3,000億坡元,升幅超過一倍,當然新加坡成功有好多原因,減稅只係其中一個原因。我相信,如果我哋肯減利得稅,再加上其他方面嘅配合,本港亦可以因減得加。

事實上,減利得稅係世界嘅大趨勢,好多亞洲、甚至西方國家近年都先後減過企業稅,例如英國08年企業稅高達30%,今年已經減到23%,台灣同新加坡一樣減到17%,我哋低稅率嘅競爭優勢逐漸被人追近,其實早就應該研究相應地下調稅率,以繼續維持本港嘅競爭優勢,可惜我哋無咁樣做。我哋都清楚,過去好多國際企業選舉嚟香港投資,都係睇中本港低稅率嘅優點,如果我哋俾呢個咁重要嘅優點慢慢消失,日後我哋仲可唔可以留住國際投資者,實在好成疑問。

同時,必須一提嘅,就係本港近年住宅及辦公室租金高企,變相要投資者繳交昂貴嘅地稅,加上國際學校學位又不足,早已蠶食梗我哋嘅優勢,減稅正好減輕企業嘅負擔,以挽回本港部份嘅優勢。

此外,有一啲本港嘅例子,亦都證明到減稅可以提升競爭力。本港喺06年取消遺產稅,本港合併資產管理業務由當時管理6萬億嘅資產,上升到去年超過12萬億,令本港逐步成為資產管理中心。另一例子,就係喺08年取消葡萄酒稅,當時一年進口約28億元嘅葡萄酒,上升至去年嘅80億,而香港亦已成為葡萄酒貿易及集散中心。

香港政府正致力推動本港成為專屬自保、同再保險中心,但有關嘅稅務優惠都比新加坡差,希望政府能夠加以檢討,並設法去增強本港嘅競爭力。

我明白到每當講到減稅,特別係利得稅嘅時候,好多人都有疑慮,但其實我哋可以學新加坡摸著石頭過河嘅方法,因應經濟變化而定期作出調整,甚至可以定為三年試驗計劃,到時再做檢討,如果起唔到刺激經濟嘅作用,或者只係益咗企業,我哋再作調整,甚至將計劃取消,咁就可以消除社會嘅疑慮。至於應該減幾多,就要等專家去做精確嘅推算。

今日,我花咗大部份嘅時間解釋香港需要減利得稅嘅因由,但正如之前所講,我同樣支持減薪俸薪,由於社會及本會有較多人支持減薪俸薪,所以我寧願花多啲時間去講利得稅,希望政府及社會都能夠明白到,減利得稅對提升本港嘅競爭力,有好重要嘅作用。

社交分享