今日我哋討論低收入補貼制度，目前政府正同扶貧委員會研究有關嘅細則，有報導指出，政府嘅構思，係幫助有兒童嘅低收入家庭，將會設入息及資產審查，並傾向以貧窮線作為分界 ，而且不設居港年期限制，新移民低收入家庭亦可受惠，由於計劃係以鼓勵就業為目標，所以要求申請家庭每月工時應達一百四十小時或以上，資助額則考慮訂於每名兒童每月獲不多於一千元。
我認為，政府今次扶貧嘅工作方向十分正確，值得支持，有關嘅建議一方面係針對在職貧窮家庭，鼓勵佢哋就業，另一方面，資助重點以兒童為目標，希望幫助佢哋將來向上流動，避免出現隔代貧窮嘅情況。根據資料顯示，本港有約15.7萬戶在職貧窮家庭，合共有近54萬人，當中有超過14萬人屬貧窮兒童，社會都好關注呢14萬名兒童將來可唔可以成功脫貧，所以協助佢哋係急不容緩。
事實上，我已多次建議政府採用津貼、甚至負入息稅嘅方式，去補貼低收入家庭，鼓勵佢哋自力更生。外國有唔少研究都指出，如果福利受助者得到嘅待遇，比低收入家庭仲要好，咁樣不但福利受助者唔會願意出嚟工作，就連低收入家庭都漸漸失去工作的動力，所以資助低收入家庭，對整個社會保障制度，有重大嘅意義。
低收入補貼其實係根據「工作福利」嘅概念而嚟，即係低收入家庭即使有工作，亦可以享受福利，以支持及鼓勵佢哋繼續自力更生，唔好輕易走去攞綜援，或者吸引攞綜援但有工作能力嘅人士重新投入工作。所以，社會上亦有意見認為，政府應採用「工作福利」嘅方針，去替代部份無條件嘅福利。
目前，政府亦漸漸採用咗「工作福利」嘅思維，去制定福利政策，除咗低收入補貼制度外，仲有已經實施嘅鼓勵就業交通津貼計劃，以及關愛基金推出低收入嘅N無人士一次過生活津貼。其實，我認為，長遠政府更應考慮重新整合一套「工作福利」制度，取代零星嘅「工作福利」措施，以便更全面去支援低收入家庭，而低收入家庭可以按家庭實際嘅需要，靈活咁運用整筆津貼。
我一向都認為，低收入補貼制度除咗係一種經濟援助外，仲有更深層嘅意義。補貼制度可以幫助貧窮兒童，增加佢哋將來脫貧嘅機會，而且亦帶出訊息，等佢哋知道父母雖然辛苦亦堅持靠自己雙手搵食，同時又得到社會嘅協助，俾佢哋一個正面嘅人生價值觀，為社會帶出正能量，減少怨氣。
同一道理，綜援制度亦可以有優化嘅地方。我哋都明白社會需要有一套安全網嘅制度，但制度某啲部份其實都可以優化，盡量鼓勵有能力嘅受助人自力更生，例如綜援制度下嘅「自力更生支援計劃」，係鼓勵有能力嘅受助人重新投入工作，我哋可以考慮提高計劃中豁免計算入息嘅最高限額外，仲可以考慮減低扣款嘅金額，要受助人將多出嘅金額存入指定戶口，當受助人有實際需要時，先至可以提取出來用，以加強計劃嘅鼓勵性。我相信，類似嘅優化措施同樣可以為社會帶出正面訊息。
最後，必須指出，本港除咗要為低收入家庭提供協助之外，其實仲需要為佢哋提供一個充滿機會嘅勞工市場，否則有幾多工作誘因都好，佢哋無辦法搵到工作，就根本達唔到自力更生嘅目標，另外，貧窮兒童將來能否脫貧，亦都要睇勞工市場可唔可以提供到大量有前途嘅工作機會，所以推動經濟發展同提升競爭力係最根本嘅工作。否則，經濟一旦出現問題，好似金融風暴後嘅一段時間，當時人人都要節衣縮食，社會仲邊有能力去做扶貧工作。
