政情:健波怒插直選議員唔掂

東方日報

泛民主派成日話要取消立法會功能組別,而本身嚟自功能組別嘅保險界立法會議員陳健波就大反擊,話依家立法會入面部分直選議員好不濟,對經濟發展政策認識不足之餘,令佢最失望嘅就係有直選議員為咗唔得失地區樁腳、保住自己議席,不惜犧牲全港利益。陳健波仲批評佢哋咁樣係緣木求魚,長此下去會畀香港人唾棄。
陳健波尋日出席電台節目,作為功能組別議員嘅佢被問到點睇功能組別嘅發展時就話,直選議員當中冇咩人對發展經濟係有興趣,亦對呢方面認識不足,所以呢個階段要有重視經濟發展嘅功能組別喺議會作平衡,等社會唔好全面走向福利主義。
佢又直言,依家部分直選議員好不濟,最令佢失望嘅係好多議員為咗個人利益、保得住自己個位就犧牲香港利益,「各政黨睇到將來議席會增加,地區樁腳同聲音都好重要,咁樣一定重地區、輕政府……堆填區係一個好例子,我係區議員都會反對,但立法會要睇嘅係成個香港。」佢仲話如果直選制度改善、選得到好嘅議員嘅話,功能組別自然就會冇存在價值。
指佔中似細路扭計
唔少功能組別都對佔領中環有保留,陳健波就話講呢個議題要好小心,因為啲人一唔啱聽就會對佢人身攻擊。不過佢唔講又講,仲用阿仔扭計去形容佔中︰「依家好似一個縱壞咗嘅細路仔要同老竇攞啲嘢,同老竇講如果唔畀就將屋企最值錢嘅嘢打爛佢,我係阿爸就攞藤條fit你幾下!」不過佢就覺得佔中好難執行,皆因你阻礙交通,我咪搭地鐵囉,搭個升降機就可以返上寫字樓做嘢,所以如果到最後其實係對中環冇影響嘅話,盞得個搞字。
雖然依家立法會開會時間長咗,陳健波都堅持夜晚十二點就瞓。讀過兩年中醫課程嘅佢就話,一到夜晚十一點,人體嘅經絡就會修補身體,如果遲瞓係補都補唔番。
已為人父嘅陳健波仲苦口婆心叫啲年輕人要早瞓,「我哋會退落嚟,都擔心搵唔到人,依家啲年輕人夜晚兩、三點生活先開始,朝早七點又要返工,父母真係好擔心。」唔想將來啲棟樑烏眉瞌睡,身體又差。

社交分享