就環境事務委員會大韓民國廢物管理經驗議案之發言

我係今次訪問團嘅成員,有機會到南韓睇下當地廢物管理嘅情況,實在令人大開眼界,當地唔單止有先進而完善嘅廢物管理模式,重大力發展回收業,並且養成國民環保嘅習慣,呢啲都令人留下深刻印象。但另一方面,南韓成功嘅經驗亦令我聯想到,點解香港呢方面嘅發展會遠遠咁落後於人?

南韓喺廢物管理方面有咁好成績,唔係一朝一夕,過程亦有遇到阻力。南韓喺95年推出四管齊下嘅管理措施,包括減少廢物、推廣商品重用、回收、及轉廢為能,結果佢哋整體廢物棄置率喺幾年之間減低46%。其實,當日南韓嘅政策同本港今日嘅減廢構思,有好多相似嘅地方,所以佢哋嘅經驗好值得我哋去參考。但我認為對本港最有啟發性,係南韓點樣克服社會上嘅阻力,成功推動政策,達到減廢嘅目的,以及大力發展回收業,成為全球都市廢物回收率最高地方之一。

目前,本港發展焚化設施及堆填區等問題時,都遇到好多反對聲音,但原來南韓推動政策之初,一樣遇到唔少阻力,例如居民反對喺同區興建焚化設施,甚至有市政府反對延長區內堆填區嘅運作期。南韓政府最後成功解決問題,往往都係靠官員嘅努力,做好諮詢及游說嘅工作。

我舉一個例子,南韓興建焚化設施,政府喺準備階段已經深入同居民溝通,並邀請輿論領袖參觀海外最先進嘅焚化設施,同時安排專家向區內居民講解。另一方面,焚化設施設計美觀,而且用開放式設計,俾市民睇到運作情況,從而打破對焚化設施嘅負面印象,最後政府更提供經濟誘因,包括為受影響居民支付大廈管理費及暖氣費,又從設施嘅利潤中,撥出部分款項成立居民援助基金,用以改善居住環境。

可以見到,只要政府下定決心,認真同居民傾,想辦法解決居民嘅疑慮,將影響減到最低,並提出合理嘅補償,係可以說服到居民接受。特區政府目前計劃喺石鼓洲建焚化爐,遭長洲居民反對,政府雖然都有同離島區議會傾,但官員明顯需要更佳之遊說技巧。所以政府長遠應該派官員去外國,例如南韓,去學習做地區遊說工作。此外,本港正計劃推動垃圾徵費嘅工作,由於涉及好多技術性或執行上問題,而我哋無相關嘅經驗,亦都應派出官員去南韓或台灣實地學習。

順帶一提,南韓採用嘅焚化設施十分先進,已可以徹底處理焚化爐排放嘅廢氣,證實對環境影響極微,將來本港引入類似或更先進嘅焚化設施,相信社會亦會較為放心。另外,南韓將焚化垃圾視為轉廢為能,係極為正面嘅睇法,將垃圾變成能源,而且當區居民亦可享受到生產出嘅能源,我相信呢啲都好值得學習。
另一個值得學習嘅地方,就係發展回收業嘅工作。目前,南韓廢物回收率係全球最高之一,首爾嘅都市廢物中,63%經循環再用,25%被焚化,12%送往堆填區,呢啲數字正好反映出南韓回收業嘅興旺。南韓政府大力推動回收業嘅發展,除咗向小型回收公司提供長期低息貸款,協助開發回收設施和技術,仲會為新公司提供專業諮詢服務。南韓政府最近更決定,為咗減少使用堆填區,會加快發展回收業,當地民間團體更希望可以推動回收率上升至80%。

反觀香港,廢物回收率雖然已上升到48%,但仍有52%廢物要送去堆填。目前,特區政府亦正推動回收業發展,例如設立環保園、向回收商提供短期嘅租用地、推廣廢物源頭分類等措施,但總係令人感到政府唔夠積極,措施亦未見有好大成效。如果我哋要達到政府嘅目標,即係要喺2022年將廢物回收率提升到55%,就應該參考南韓嘅做法,用更主動及積極嘅方法,直接扶助回收業發展,提供資源及技術嘅協助。

南韓有咁多值得學習嘅地方,但原來亦有啲優勢,我哋係學唔倒,就係南韓國民嘅團結同愛國,佢哋願意為國家而付出,所以即使減廢會為市民帶嚟幾多麻煩,為咗國家佢哋仍願意去做,政府亦會較容易說服市民。相反,香港社會近年內耗不斷,政府推動政策難免事倍功半,但我希望將來喺減廢嘅工作中,大家可以更加團結,為美好嘅環境一同努力。

社交分享