就全方位協助青年人發展議案之發言

1)今時今日,青年人遇到好多困難同挑戰,向上流動已經變成遙遠嘅目標。

2)有研究指出,青年人嘅困境主要同經濟發展有關,本港經濟已進入成熟期,工作職位增長慢,青年人缺乏工作經驗,搵工更加難,而佢哋搵到嘅工作大多薪金偏低,青年人失業率亦比整體失業率為高。就算大學畢業,由於管理及專業嘅工作增長有限,佢哋可能被迫去做原本只需中學生嘅工作。青年人覺得人生目標遙不可及,對社會自然產生怨氣。

3)我同意要全方位去協助青年,但優先要做,係為青年人締造一個更好嘅就業環境,所以我提出修正,促請政府推動經濟發展,為青年人創造更多職位。

4)回歸至今,香港仍然依靠金融地產業,四大支柱產業中物流業日漸萎縮,而發展新興產業亦見唔到成績,反而本港經濟越來越依賴國內嘅發展。喺咁情況之下,唔好話青年人無上游機會,香港人搵食亦可能越來越艱難。

5)本港經濟需要多元化發展,所以我提出推動總部經濟嘅發展。所謂總部經濟,係指透過優惠政策吸引外資到來設立地區總部或辦事處。

6)本港都有招攬國際投資者,但唔算積極。目前有7,449間外資公司喺本港設地區總部或辦事處,共聘用38萬人,係本港歷史新高,但近年增長最多係內地企業。本港有需要學習新加坡,提供更多優惠政策,吸引更多國際大企業來港投資,推動國際貿易多元化發展。

7)目前有26,000間國際公司在新加坡投資,當中有大量國際一流企業。本港應該仍有發展嘅空間,如果我哋能夠成功吸引更多國際大企業來港,並為青年人帶來數以萬計嘅職位,對青年人問題,甚至本港經濟有好大幫助。

8)過去青年人創業困難,往往因為租金太貴,但互聯網購物逐漸盛行後,青年人創業應更容易。網上創業成本較低,而且商機無限,需要有資訊科技知識,特別適合青年人。政府應該為青年人提供技術支援,令青年人有多一個發展嘅空間。

9)另一修正要點,就係促請政府重視青年人身心嘅平均發展。上網已成為青年人最大嘅興趣,佢哋對正常嘅社交興趣不大,只會沉迷於虛擬網絡。除咗工作及學業之外,亦應協助青年人培養健康嘅人生。

10)運動係平衡身心健康嘅最好方法,政府應該推動運動嘅發展,亦可以協助本港嘅球隊,去參加國內競爭性較強嘅嘅聯賽活動。政府可以推出更多文娛康樂嘅活動,去培養青年人嘅興趣。

11)青年人吸毒隱蔽化加劇,而且佢哋吸食嘅係精神科毒品,長遠會對身心構成無法醫好嘅創傷,佢哋除咗摧毀自己嘅人生,餘生仲要長期接受治療及援助,對社會構成沉重負擔。我希望禁毒常務委員會繼續加強禁毒及教育工作,令青年人免於毒禍。

12)青年人升學亦都有唔少問題,包括副學士嘅問題。目前只有兩成嘅副學士可以升學,而副學士畢業生出來工作,佢哋嘅薪金與中學畢業生相差無幾,但副學士課程需付高昂學費,實際對學生同家長構成好大嘅困擾。我認為有需要檢討整個副學士嘅政策。

13)有部份青年人對讀書無興趣,學會一技之長其實係更好出路,但社會對藍領階層普遍有負面印象。近日,港鐵曾推出一個講述一位女技術人員心路歷程嘅廣告,令人對技術人員嘅印象有所改觀。近年本港致力改善建造工人嘅工作環境及形象,再加上人工高,已經吸引部份青年人入行。政府應繼續有關工作,為青年人開拓就業空間。

社交分享