致謝議案 – 經濟發展

今年嘅施政報告針對民生問題,包括喺安老、扶貧、青年及土地供應等問題上,提出好多好實在嘅建議,例如低收入家庭補貼、關愛基金多個項目恒常化等等,呢啲建議的確可以幫到唔少有需要嘅人士,我個人十分支持。

不過,我同時亦感到憂慮,呢一系列嘅建議,將會令政府經常性開支每年增加200億,每年嘅開支要大幅增加,理論上我哋應該想辦法賺多啲錢,用以應付開支,但施政報告無同時推出發展經濟嘅建議。老實講,本港目前競爭力已出現下滑嘅跡象,而家經常開支大幅增加,但經常收入就未見有大幅增長,喺咁嘅情況下,本港嘅前景就難免令人憂慮。

我哋經常批評政府為守財奴,就係由港英年代起,政府一直維持審慎理財、大市場小政府等等原則,不會隨便大幅增加經常性嘅開支,擔心一開咗頭,每年都要繼續使落去,再唔可以返轉頭,政府有錢都寧願用一次性嘅措施,去做所謂派糖嘅紓解民困措施。所以,過去政府只可以不斷派糖,而對扶貧助弱嘅工作就一直都無真正成績。

現屆政府終於肯用有為嘅心態,大幅增加經常性開支,去落實扶貧助弱嘅工作,顯示出政府改善民生嘅決心。睇返咁多項建議,例如低收入家庭補貼及其他多項措施,的確可以持續咁幫到低收入家庭,而增加醫療券金額、擴大長者搭車優惠等等,長者都會好受惠,呢啲都係立法會一直想爭取嘅措施,我相信社會上大部人都會支持。當然,社會上亦有好多意見認為,施政報告無重視中產人士嘅訴求,有好多中產人士失望,但大家唔好忘記,財政預算案即將在月底公佈,大家都寄望財爺有措施可以紓解中產人士嘅壓力。

講到對財爺嘅期望,我同時期望預算案有發展經濟嘅具體措施,以配合施政報告開支嘅計劃,作為特區完整一套嘅施政方針。政府已經放棄守財奴式嘅理財原則,亦應可以放棄過去不干預市場嘅原則,全身投入去推動經濟發展。

過去一年,已經有多項數據顯示,本港多方面嘅競爭力都出現不進則退嘅情況,社會仍然倚重金融業,其實一直都係食老本,但最令人擔心就係連金融業嘅優勢亦不斷減退之中。近日有學者推算,如果按目前開支增長嘅速度計算,本港將在2030年用盡儲備。當然,呢啲只係簡單嘅數學推算,現實中唔一定出現,但係就可以提醒大家,食老本最終只會坐食山崩,更何況本港將要面對人口老化嘅問題。既然我哋要扶貧助弱,就一定要同時大力推動經濟發展,為香港社會搵更多嘅錢,去支持我哋嘅工作。

至於點樣去發展經濟? 上屆政府提出發展六大產業,我係衷心支持,可惜政府堅持不干預政策,結果做嚟做去都無成績。大家要知道,六大產業未必可以為香港搵到好多錢,但就可以製造大量工作機會俾青年人,而且改善目前產業結構不平衡嘅情況,所以係值得做,希望政府可以用大有為嘅態度,重新整理及推動六大產業發展。另一方面,我認為,我哋應該參考新加坡嘅經驗,以新思維推動總部經濟嘅發展,吸納更多國際企業來港投資,呢方面我已經講過多次,今日唔再重覆。

同樣,金融業亦好需要增強基礎,金融發展局已經完成一系列嘅研究報告,就多個範疇提出具體意見,大部份嘅建議對業界都好有幫助,部份更提出長遠發展方向,我希望政府可以盡快落實各項建議。此外,上海已經成立自由貿易區,而廣東亦正籌備成立另一自貿區,有好多分析指出,國內嘅自貿區將會同本港構成直接嘅競爭,既然競爭難免,我哋都好應該主動出擊,分享發展嘅成果,所以我希望政府可以主動尋求同自貿區嘅合作機會,等本港商界能夠參與自貿區嘅發展。

總而言之,我認為今次係一次契機,俾政府及社會睇清楚香港目前面對嘅難題,從而下決心去作出改變。

另外,我都想趁今日嘅機會,講下保險業嘅問題。施政報告今年無提出有關保險嘅新建議,喺施政綱領中亦只係提到成立保監局及保單持有人保障基金嘅進展,但其實保險仍有唔少問題需要我哋關注。

目前,保險欺詐嘅問題依然嚴重,單係喺勞工保險上,過去10年蝕咗26億元,而單單去年亦都蝕咗6億元,詐騙活動係導致虧損嘅主要因素。上一屆立法會中,我哋成立咗運輸業保險事宜聯合小組委員會,專門研究打擊相關嘅保險詐騙活動,當時政府同警方反應尚算正面,警方更即時成立舉報詐騙活動嘅渠道。但好可惜,小組委員會喺前年完成報告,並提出多項有用嘅建議,例如打擊欺騙病假紙嘅問題,但政府一直都無回應,令到詐騙活動仍然持續發生。保險業界會繼續跟進有關問題,並希望政府能夠認真處理有關嘅欺詐活動。

至於保單持有人保障基金嘅問題,政府正在草擬法例之中,保險業界仍對部份細節有所擔心,包括清盤保險公司保單失效嘅期限。由於清盤嘅公司一般都有唔少問題,佢哋嘅承保方法亦好可能有問題,如果長時間要基金負起有關保單嘅法律責任,有可能有好大嘅潛在風險。所以,業界希望只承擔清盤公司嘅保單短時間,例如一個月,讓投保人可另購保險。至於徵費嘅問題,由於政府建議採用漸進式徵費模式,基金喺有需要時會增加徵費額,業界希望法例能明確訂出徵費嘅上限,最好少於百份之零點五,以消除業界嘅不明朗因素。

政府計劃喺今年內,提出成立獨立保險業監管局嘅法案,政府已經承諾會在保監局董事會及有關嘅委員會上,委任更多業界人士參與,以增加其代表性,保險業界會繼續跟進,並會繼續就過渡問題上,同政府溝通。另外,醫保計劃亦都係保險業界嘅重點,我會喺第三節嘅時間上作出討論。

社交分享