致謝議案 – 人口、青年、教育、人力、藝術及文化,以及體育

今次嘅施政報告主力推動青年人嘅全方位發展,喺就業、教育同全人發展方面都提出咗唔少建議。 其中一樣我最關注嘅就喺年青人就業問題,因現時經濟發展成熟,職位增長緩慢,青年人又缺乏工作經驗,令佢地難以搵到啱心水嘅工作。今次施政報告積極加強針對年青人嘅就業支援,包括以先導形式推行就業支援計劃,結合有系統嘅學徒培訓及清晰嘅進階路徑,為相關行業吸引和挽留年青嘅人才,令到青年人睇到清晰嘅晉升階梯,從而加強信心。

此外,我亦關注到現時社會缺乏針對年青人嘅職業教育,令部分年青人唔清楚自己嘅職業發展方向。今次施政報告重新確立職業教育嘅定位,引導年青一代建立選擇職業嘅正確觀念,令佢地明白到「行行出狀元」嘅意思,亦協助部分對讀書無興趣嘅年青人,盡快學到一技之長,貢獻社會。我好希望呢啲措施能夠幫到現今嘅年青一代選擇最適合自己嘅職業。

喺年青人教育方面,今次施政報告終於正面回應副學士升學機會不足嘅問題,由2015/16學年起,逐步增加政府資助學士學額共1 000個;到2018/19學年,每年將有5 000名表現優秀嘅副學位畢業生可升讀資助銜接學位,對副學士學生嚟講絕對係喜訊。

不過,我希望政府能夠更加關注到經濟多元化同年青人發展兩者之間嘅關係,我曾經多次提出推動總部經濟嘅發展,透過優惠政策吸引外資到來設立地區總部或辦事處。其實國際企業來港發展,可以為年青人帶嚟莫大裨益,除咗大企業能夠為年青人創造職位之外,年青人亦都可以借此了解到國際企業喺如何運作,有助佢地放眼世界,開拓更廣闊嘅前路。

除咗總部經濟之外,互聯網購物亦喺近年興起嘅多元化經濟發展之一。互聯網創業所需要嘅技術同成本唔多,發展潛力亦非常大,非常適合年青人,所以政府應盡快落實為年青人提供互聯網創業支援,令年青人可以喺多元經濟下發展。

除咗年青人問題之外,香港人口發展亦喺我關注嘅項目之一。二零一三年施政報告曾經指出,人口和其他政策必須考慮人口容量問題,可惜今年施政報告並再提及相關問題。面對人口老化、新移民不斷增加等情況,政府應盡快落實長遠人口規劃,做好對香港人口承載能力嘅研究,作為長遠人口政策嘅指標。

最後,我想講下環保問題。施政報告公佈,政府終於同運輸業界達成共識,落實淘汰約82 000部歐盟三期或以前嘅老舊柴油商業車,並將會喺今年3月啓動更換舊式柴油車計劃,使路邊空氣污染問題可以盡快得到改善,令一啲因為空氣污染嚴重,而拒絕來港工作嘅跨國公司人才,重建對香港環境嘅信心。

雖然政府喺空氣污染問題上踏出咗一大步,但喺固體廢物處理方面,仍然喺原地踏步。上年,政府喺擴建將軍澳堆填區建議上遇到好大阻力,今年嘅施政報告中,只係提及過一啲輔助措施去減輕堆填區嘅壓力,例如檢討現時廢物回收箱嘅位置、推出手機應用程式提供減廢資訊等等,並無提及點樣具體去擴展堆填區。

我基本上支持擴建堆填區,因為無了期咁拖延擴建方案,只會令問題惡化。當然,政府亦應該先做好充分嘅地區諮詢,為受影響嘅居民提供合理嘅補償方案,以及落實完善嘅配套措施,將堆填區帶嚟嘅影響減至最低。否則,只會令擴展堆填區更加舉步維艱,拖慢長遠減廢目標。

同時,政府亦應該喺興建焚化爐方面尋求新嘅發展方向。上年我同多位議員到南韓參觀當地嘅廢物管理嘅情況,其中焚化設施非常先進,可以徹底處理焚化爐排放嘅廢氣,轉廢為能,而且對環境影響極微。我建議政府研究引入類似或更高科技嘅焚化設施,並多加宣傳先進焚化爐嘅好處,建立市民對焚化技術嘅信心。

就住協助回收業發展方面,我好高興政府終於開始主動推動回收業,施政報告所提及嘅措施,包括設立「推動回收業可持續發展督導委員會」,推動回收業的可持續發展,以及預留十億元設立「回收基金」,我基本上支持,希望政府能夠盡快為回收基金制訂具體細節,等回收業界可以得到實際支援,令佢地長期面對嘅問題,包括經營成本高、租金貴及人手需求大等,可以得以解決。將來唔單止回收業可以得益,仲可以壯大整個環保行業,所以希望政府能夠盡快展開相關工作。

最後,施政報告提及都市固體廢物按量收費措施,我希望可持續發展委員會能夠以避免對基層市民造成負擔為前提,落實一個合理嘅廢物收費水平,並分階段喺唔同嘅界別推行,使成個收費制度能夠遁序漸進咁發展,實現源頭減廢目標。

 

社交分享