就評估’體育普及化、精英化、盛事化’政策的成效,制訂長遠體育政策議案之發言

本港一直都無具體體育嘅政策,令到體育嘅發展停滯不前。事實上,運動除了對參與者身心有好大得益,對社會亦有好大益處,但自從回歸以嚟,政府一直忙於處理經濟及政治上嘅危機,對一啲需要長遠發展嘅政策,包括體育政策,一直無時間兼顧,政府當年提出嘅“體育普及化、精英化、盛事化”,令人懷疑已經淪為一句口號。

我係跑步愛好者,我可以同大家講,運動不但能夠強化體能、促進健康,而且仲會令人心情舒暢,生活倍感愉快,更加激發起人嘅上進心,所以我一直都支持推動運動發展,鼓勵市民一齊做運動,而呢方面一定要政府長遠嘅推動。簡單嚟講,體育最基本嘅功能,係令市民身心健康,從而減少公共醫療嘅開支。

不過,體育嘅好處遠遠唔止咁少,對整個社會嘅穩定和諧,亦都有好大貢獻。英國以至整個歐洲,足球運動蓬勃發展,已經成為一種社會文化,市民工餘時間都寄情於比賽之中,除咗成為市民嘅生活興趣,更加令社區及全國團結,大大減低社會嘅不滿情緒,而且喺家庭中各個成員亦容易有共同話題及信念,增加咗家庭嘅凝聚力。大家喺電視上都會見到,每當有大賽舉行時,當地嘅支持者都全情投入,市民心靈有寄託,對社會嘅滿意度亦會提昇,社會嘅衝突自然會減少,所以運動已經成為國家穩定嘅重要機制。

老實講,香港都好需要一個類似嘅穩定機制。本港係一個經濟發展成熟嘅體系,年青人上游嘅機會不多,大多唔能夠喺工作上得到滿足感及成就感,因此佢哋需要喺生活上尋找個人興趣,俾佢哋心靈上有寄託,運動係最好嘅方法,無論係佢哋自己做運動,或者欣賞運動比賽,都可以為佢哋帶嚟無窮樂趣,同時又可以平衡一下工作上遇到嘅壓力。我曾經喺德國公司工作,德國青年人其實都面對類似問題,德國政府會鼓勵青年人喺文化上嘅發展,以提昇人生嘅樂趣,體育項目係其中一個重點。所以,體育同整體嘅社會政策息息相關,外國政府都好重視體育政策,特區政府應該吸取外國經驗,認真去制定長遠體育政策。

至於要點樣推動體育發展,今日原議案提出好多有用建議,值得政府去研究。我個人相信,我哋應先從運動普及化入手,最好仍然係由學校做起,因為學生係最經常做運動嘅群體,好多熱愛運動嘅人,都係由學生年代培養出嚟,政府應該鼓勵學校重視體育科嘅發展,多教授運動知識給學生,以及培養學生對運動嘅興趣,亦可以舉辦多啲校內或校際比賽,俾不同水平嘅學生都有參加嘅機會。

同時,喺社區上,政府應提供更多價廉物美嘅運動設施,否則市民好想做運動,無場地亦都係無用,而社區亦可以多搞比賽活動,或贊助市民組織成參賽隊伍。另外,運動亦可以作為潮流時尚活動,例如近年興起單車熱潮,呢啲活動好值得政府加以推廣,政府亦正興建大型單車徑,以配合呢個新趨勢。

至於精英化及盛事化,由於本港缺乏職業性嘅運動比賽,即使有,水平都唔算高,不利培養專業嘅運動員。我曾建議過,政府應協助本地嘅足球、籃球及排球等球隊,參加國內嘅職業聯賽,一方面提昇本地運動員嘅水準,同時亦吸引本港市民欣賞球賽,及支持本港球隊,更可以加強本港與國內不同省市嘅交流。當然,要達到理想效果,一定會困難重重,有好多技術上、資金上嘅問題要解決,同時亦面對內地聯賽不時出現嘅負面新聞,甚至會有好多爭議,但我仍然認為,係值得政府去研究,因為如果本港成功打造出一兩支勁旅,可以在國內嘅職業聯賽爭標,一定吸引到大量港人支持,亦可以成功推動到相關運動嘅發展。

最後,議案提倡發展與體育相關嘅產業,包括運動保險,為運動員及青年人提供多元化嘅就業出路,並鼓勵商界贊助體育活動。我作為保險業界嘅代表,當然歡迎有關建議,亦同意有需要發展體育相關嘅保險產品,但大前提係市場嘅需求要有一定嘅規模,否則根本唔可以長遠維持落去。我相信,其他同體育相關嘅產業,都會有同樣問題,所以政府應先有長遠嘅體育政策,大力推動運動發展,當社會有更多人喜歡運動時,相關嘅產業發展自然會水到渠成。

社交分享