就明報前總編輯劉進圖先生遇襲事件議案之發言

上月26日正當財政司司長喺立法會宣讀新一年度財政預算案時,突然傳來前明報總編輯劉進圖被斬嘅消息。當時,我正埋頭研究預算案嘅內容,行兇嘅消息令我十分不安,香港係一個法治地方,竟然有人膽敢喺光天白日之下,公然對新聞工作者下毒手,實在令人感到憤怒。

我雖然同劉進圖稱唔上有交情,但我係明報幾十年嘅讀者,讀過劉進圖唔少作品,劉先生嘅評論文章思路慎密、分析獨到,實在令人佩服。據了解,今次襲擊中,劉進圖身中多刀,估計需要一斷長時間先至完全康復,我喺度衷心祝福劉進圖,希望佢早日康復,亦希望佢嘅家人可以克服到呢一段唔愉快嘅經歷,盡快重過新生活。

今次事件喺國內公安部門嘅協助下,迅速拉到潛逃內地嘅兩名懷疑刀手,及多名在港懷疑與案有關嘅疑犯,雖然幕後主腦仍然未落網,犯罪動機仍然未明,但警方快速偵破案件,效率之高,實在值得一讚。據傳媒報導,今次破案除咗得到國內公安傾力協助外,亦借助閉路電視及電話訊號,一路追踪疑犯逃亡路線,拍攝到疑犯容貌,再交由公安緝捕。所以,疑犯當日大膽選擇光天白日之下挑戰法紀,以為做得隱蔽,就會神不知鬼不覺,但佢哋發夢都估唔到,佢哋嘅行踪都被「天眼」拍低。

本港雖然罪案率低,但仍有唔少案件因無線索而一直破唔到案,今次案件其實反映到資訊科技對偵查案件可以起到幾大嘅作用,我希望警方能夠用更多更先進技術,協助調查案件或防止罪案發生。目前,當有罪案發生時,警方多數去問商店翻查佢哋嘅閉路電視,但質素參差,其實而家連好多私家車都加裝閉路電視,我哋都要學習其他國際大都會嘅做法,加設更多警方嘅「天眼」,我明白呢個問題好有爭議,但就值得我哋研究及討論。

我希望明報全體人員能努力堅持過去多年沿用嘅編輯方針,包括平衡、中肯及全面嘅報導,俾讀者全面掌握實際情況,呢啲係明報過去引以為傲嘅傳統價值觀。

社交分享