就2014年撥款條例草案之發言(財政預算案辯論)

本港競爭力近年出現下跌嘅跡象,財政司司長終於有回應,提出討論香港競爭力及產業發展嘅問題,雖然我認為仍然有好多不足嘅地方,但政府終於承認及意識到本港嘅問題所在,係一個好嘅開始。

預算案指出,本港優越嘅競爭力不是理所當然,不會自動延續,需要我哋不斷改進,亦要居安思危,針對環境嘅轉變作出回應。同時,預算案亦認為,本港四大支持產業喺可見嘅將來仍然有巨大嘅發展空間,向更高增值嘅方向邁進,繼續支撐香港嘅經濟和就業。另外,亦必須耐心培育具備國際競爭力嘅新產業,為未來經濟發展發掘更多新機會。

我完全同意預算案以上嘅分析,但要提昇及鞏固本港嘅競爭力,我認為有好多工作需要做。不過,預算案提出嘅建議,顯然力度不足,喺提昇四大產業方面,只係一啲修補工作,可能政府仍然堅持「大市場小政府」嘅方針,所以根本無提出一啲深入嘅發展同改革,其實有唔少嘢可以做,例如更主動爭取內地自由貿易區嘅合作,或者更積極吸引國際投資者投資,呢啲都值得我哋研究。我希望,金融發展局日後能夠提出更多創新建議,為本港金融業開拓更多更廣泛嘅領域,令本港嘅金融業亦能夠多元化發展。至於其他三大支柱產業,政府亦應全面作出檢討並提出革新嘅措施,全面提昇產業嘅競爭力。

至於發展新產業方面,預算案除咗創新科技,就再無提到其他可以發展嘅產業,包括六大優勢產業。事實上,本港長遠嚟講,有必要發展更多產業,令經濟更多元化、更加穩健發展,避免過份依靠金融及貿易業務。當年金融風暴以後,金融業務急劇收縮,香港人當時吃盡苦果,正所謂前事不忘後事之師,今日我哋經濟暢旺,達到全民就業水平,就無興趣發展新興產業,實在係大錯特錯。老實講,金融市場隨時風雲變色,而本港係咪可以長遠保持金融中心嘅地位,亦無人可以保證,所以多元化經濟,係必須要走嘅道路。

六大產業中,創新科技得到政府大力扶持,有望得到良好嘅發展,而醫療及教育方面,有意見唔認同當作產業發展,其實可以慢慢去傾,但其餘嘅檢測認證、文化創意、及環保產業,相信業界人士正努力開展佢哋嘅業務,但如果無政府大力支持,發展步伐一定困難重重,產業亦難以成功發展。我希望政府能夠考慮產業結構多元化嘅問題,繼續撥出資源,支持新興產業嘅發展。

預算案另外一個亮點,就係分析到結構性赤字及人口老化問題,呢啲都係本港嘅隱憂,如果我哋唔及早妥善處理,隨時會變成社會嘅計時炸彈。

預算案指出,如果開支增長持續超越收入及經濟增長,本港會喺七至十五年內出現結構性赤字。司長認為,推算具清晰警示作用,但亦無需過度憂慮,因為未來二、三十年,本港經濟會繼續增長,政府收入會上升,開支可以繼續增加,只係增加嘅幅度必須有限制。所以,預算案提出,公共開支不應超越本地生產總值百分之二十,以及為下一代儲蓄資源,成立「未來基金」。

有唔少議員批評司長,係另一次「狼來了」,我認同政府理財必須審慎,但就應該用「應駛則駛,應慳則慳」為原則,而唔係鐵板一塊用百分之二十做原則,否則將來政府要回應社會的需要,或者推動新措施時,就會綁手綁腳。至於成立「未來基金」,其實只係想將部份儲備凍結「唔准用」,儲錢係一件好事,我唔會反對,但係咪用呢種方法,我認為可以俾社會討論,畢竟本港財政儲備有超過七千億,再加上外匯基金,本港實際上總共有萬多億嘅財富,太過保守未必合適。

不過,我覺得最奇怪嘅地方,係預算案指出公共財政嘅隱憂,但無論節約開支或儲蓄嘅方法,都唔足以解決本港嘅問題,只有做大經濟,提升經濟競爭力,先至會令經濟基礎更加穩定,足以應付將來嘅挑戰,但正如之前所講,預算案並無推動經濟發展嘅新方案。政府提醒社會要居安思危,係正確嘅事,但無提出推動經濟進一步發展嘅方案,實在係唔足夠。

預算案亦回應咗一啲商界關心嘅問題,包括商業用地不足嘅問題。事實上,辦公室租金昂貴已經令經營成本上升,直接令到投資者卻步,所以增加商業用地係當務之急,本會亦多次反映過呢個問題。預算案提出,新年度賣地計劃會包括七幅商業用地和一幅酒店用地。另外,政府會透過七項措施,增加不同地區嘅商業土地供應,容納更多經濟活動和提供更多就業機會。政府增加商業用地嘅決定,有利商界嘅發展,係十分正確嘅做法。

另一方面,值得一提,就係施政報告及財政預算案對扶貧助弱,提出咗實質措施,反而對中產嘅幫助,就相當有限。事實上,中產面對嘅生活壓力相當大,但政府一方面大力扶貧,但對中產就無太多幫助,自然會引起中產不滿嘅情緒。同時,政府一直希望市民生育,增加將來嘅年輕人口,但就無提出誘因,去鼓勵市民,特別係中產生兒育女,我希望政府能夠大幅增加子女免稅額,一方面鼓勵生育,同時又可以減低中產嘅負擔。

最後,我想講下保險業界關心嘅問題。預算案提及到人口老化嘅問題,當中講到自願醫保計劃,並再次提及預留五百億元嘅資助額,及表示會為購買醫保嘅市民提供稅務減免。事實上,政府已經決定大幅削減醫保嘅資助額,只肯提供高風險池及稅務減免,預計嘅資助額由五百億大幅減少到四十三億,實際係減咗九成嘅資助。單單以保費優惠呢個角度嚟睇,如果醫保計劃每年要四千元保費,原有嘅建議係七拆優惠,即係慳到一千二百元,但七拆優惠已被取消,換嚟係稅務減免,香港人平均交稅約百份之八,就算四千元保費可以完全免稅,亦只係得三百二十元嘅優惠。由於差距好大,對市民嘅吸引力亦大幅減少,保險業界亦好質疑計劃能否成功。我希望政府能夠重新考慮,運用五百億嘅資助額,恢復原來嘅優惠條件,以落實推動自願醫保計劃。

另外,預算案講到發展離岸人民幣業務時,指出香港要憑着先行者嘅優勢,致力深化現有業務,包括我哋關注嘅人民幣計價跨境再保險。老實講,由於相關規限與法規十分複雜,業界一直唔太肯定係咪可以喺本港做人民幣計價跨境再保險,現在政府清楚講俾業界知,有關嘅業務係可以做,而且會進一步深化,對本港嘅再保險業務有好大嘅幫助,可以吸引國內嘅保險公司嚟香港投保,而本港嘅再保險公司可以將收到嘅人民幣保費,用於國內投資項目上。我相信,業界會好快作出跟進,並會努力開拓有關嘅業務。

財政司司長喺去年嘅預算案中,提出減免一半專屬自保保險公司離岸風險保險業務嘅利得稅。政府亦將繼續加強推廣,並透過在內地及海外嘅經貿網絡,吸引更多企業來港成立專屬自保公司。我好高興知道政府會加強推廣工作,但由於政府提供的優惠比外國同類計劃為少,吸引力可能不足,我希望政府推出計劃後,能全面評估成效,並研究調高優惠嘅幅度,以加強計劃嘅競爭力。

社交分享