2013施政報告致謝議案 環境及醫療政策

今年嘅施政報告提出咗唔少改善環境污染嘅措施,其中採納咗我哋嘅意見,銳意淘汰舊款柴油商業車輛,預留100億作資助,以經濟誘因鼓勵車主換舊車。呢啲舊款柴油車係做成路面空氣污染嘅主要元凶,上一屆立法會環境事務委員會早已有共識,要求政府盡快淘汰,現在政府採取更全面措施,雖然姍姍來遲,但總算行出正確一步。

施政報告提出建議,將會按污染程度分階段淘汰歐盟前期及一至三期等高污染嘅柴油車。資料顯示,相關嘅舊車大約有八萬八千架,如果將呢啲車更換做歐盟五期型號,車輛排放嘅整體汽車粒子及氮氧化物可減少八成及三成,可以大大改善路面嘅污染情況。今次計劃亦有採納我哋另一項意見,就係車主劏車唔買新車,亦可以獲得資助。

不過,今次計劃能否成功,仍然有一定隱憂。雖然,政府除咗提出資助,仲列明由2016年至2019年分階段不為有關舊車續牌,但根據過去換車計劃失敗嘅經驗,100億資助額分配俾八萬八千架車,平均每架車只有約11萬,但以目前新車車價高達八、九十萬計,資助金額未必夠吸引力,即使列明舊車將會分階段不續牌,也可能會激起車主強烈反對,或者等到最後限期先去換車,令污染情況短期難有改善。

事實上,如果能夠按計劃如期淘汰所有舊款柴油車,當然最好,否則可以考慮集中火力,集中資源去更換前期至二期嘅舊車。事實上,目前全港歐盟三期嘅車大約有三萬架,車齡比較新,而且污染度遠比其他舊車低,所以可以遲一步先至換,以便可以集中資源,提高其他舊車嘅換車價,爭取盡快完成換車,希望早日改善到空氣污染嘅情況。

至於廢物處理方面,今次政府提到咗多項不同嘅措施,包括廢物徵費、興建焚化爐、發展回收業及消減廚餘等等,我大致都認同各項建議,但我建議政府最好將所有分散嘅措施整合成一套綜合政策,將全港節能、源頭分類、固體廢物徵費、興建焚化爐等方法一併考慮,有系統而按部就班咁推行,咁樣可以俾市民睇到清楚嘅情況,較容易爭取到支持。

至於興建焚化爐嘅問題,由於堆填區遲早都有爆滿嘅一日,興建焚化爐係無可避免嘅事情。其實,焚化爐措施發展成熟,好多歐美先進國家都有採用,當局可以參考佢地嘅做法,做好社區配套同諮詢工作,當然亦要顧及受影響嘅居民。

講到醫療問題,我非常關注到醫療融資方面嘅問題。政府指出,現正根據醫療改革第二階段公眾諮詢嘅結果,推展醫保計劃,預計今年內完成各項細則嘅研究工作。

我認為要成功發展醫保計劃,有兩大原則,第一,就係要維持公私營醫療平衡發展,政府推動公營醫療發展時,亦應該提高私營醫療嘅服務水平,以便吸引市民參與醫保計劃,為計劃提供穩健嘅基礎。第二,就係要市民支持呢個計劃,並且願意參與。社會上對醫保計劃存有一啲誤解,我希望政府可以做多啲宣傳同埋教育嘅工作,令市民對醫保計劃有正確嘅理解。

講到對醫保計劃嘅誤解,市民或者政黨以為保險公司係最大受益者,但事實並唔係咁。政府投放嘅500億元,目的係為改善現行嘅醫療保障制度,而且呢500億係分20至25年去用,平均一年會有20至25億,係用嚟發展醫保計劃中對市民有利嘅元素,例如人人受保、終身續保、現有疾病受保、設高風險池等,其實係對市民嘅津貼,最大嘅得益者,絕對係市民。事實上,平均一年會用20至25億元,相對醫管局每年400億嘅經常開支,其實只係只少數。所以,要釐清對醫保計劃嘅誤解,先可以吸引更多政黨、市民支持呢個計劃,而呢樣亦係當局需要做嘅工作。

另外,亦要得到醫療界,包括醫生及私家醫院嘅支持,令佢哋明白更透明嘅收費制度,有助加強消費者信心,套餐式收費能使消費者更有預算,更樂於使用私營服務,實際係多贏方案。

最後,最重要當然係要得到保險界支持醫保計劃,現時政府正與業界商討醫保計劃細節,希望政府緊守醫保計劃「自願」性質,除咗消費者係「自願」參加外,保險公司亦必須係「自願」參加,絕不能在細節未有共識前或在未得保險界接受之情況下,輕率地提出立法監管所有醫療保險產品,結果只會成事不足,敗事有餘。

其實,在商討細節過程中,保險界擔當把關者角色,利用營運醫保幾十年、服務三百多萬投保人嘅經驗,去確保醫保計劃技術細節切實可能行,既可改善現在制度,亦可令計劃得以持續可行。所以保險界衷心認可及支持醫保計劃各項技術細節,至為重要,希望有關官員能謹記於心。

社交分享