就優化失業綜援議案之發言

本港就業市場持續得到改善,而勞工嘅薪金更得到最低工資嘅保障,喺咁嘅情況下,本港仍然有兩萬六千多人要申領失業綜援,情況實在令人關注。立法會今日辯論失業綜援嘅問題,我係同意失業綜援需要作出優化,但我嘅睇法係,資源係次要嘅問題,最重要係要協助申領失業綜援嘅人士重建健康嘅人生。

 

中國人嘅社會講究自力更生,大部份人仲有呢種傳統美德,絕大多數嘅香港人如果唔係有特別原因,都會寧願用自己嘅勞力換取應得嘅報酬,而唔會攞失業綜援。事實上,如果因為一時間搵唔到工作而需要社會援助,社會係都會體諒,但喺今日就業環境唔差嘅情況下,仍然有咁多人持續長時間攞失業綜援,就唔係一個健康社會應有嘅現象,我哋好應該研究一下究竟出現咗乜嘢問題。

根據政府資料顯示,喺2012年10月有一萬八千多人已經持續申領失業綜援三年或以上,當中申領五年或以上有一萬四千多人。呢一班持續攞失業綜援嘅人士,可能各自有自己嘅問題,或者對前路無信心、或者因失意而自暴自棄、或者擔心工作壓力而不肯返工、甚至只係唔識點樣去見工,當然亦唔排除有唔想工作嘅人,原因可能好多個,失業綜援可能只係佢哋嘅避風港,所以單單俾錢佢哋,我認為幫唔到佢哋解決問題。

此外,喺2011年攞失業綜援嘅人士中,有302人具有大專或以上學歷,雖然已比零九年嘅383人已經有所回落,但佢哋平均攞失業綜援嘅年期已經到達5.3年,有85人仲係30歲以下出。雖然數字上三百人唔算多,但係佢哋係大學生,喺目前嘅環境,肯做應該唔難搵到嘢做,佢哋能夠賺取嘅薪酬一定會比基層市民為多,點解寧願長時間領取僅夠糊口嘅綜援金? 到底發生乜嘢事? 我認為政府係有必要主動去關心呢啲人。

事實上,一個社會如果大部份人都能夠培養出健康嘅人生觀,社會亦都會健康發展。對有工作能力嘅人嚟講,健康嘅人生應該包含有自己嘅工作或事業,可以為社會或經濟作出一份貢獻,同家人一齊分享努力嘅成果。

所以,我認為政府要優化失業綜援,係應該以鼓勵及協助佢哋重投社會為核心,著眼點唔係在於資源問題,反而短期內可能要投入更多資源,去幫助佢哋重過新生。今日不少同事提出好多具體嘅措施,包括加強就業培訓、搵工輔導、及鼓勵僱主招聘等等,我都同意呢啲係必須嘅工作。

我認為更加重要嘅係,政府應該以關懷嘅角度出發,提出更深入、更貼身嘅措施,包括派社工跟進長時間攞失業綜援嘅個案,因應不同嘅情況,再安排輔導及支援,當遇到自暴自棄或者擔心工作壓力嘅人士,就安排心理輔導,遇到唔識點樣見工嘅人,就安排接受相關嘅訓練,我相信呢班長期攞失業綜援嘅人,好多都係都係性格較被動及內向嘅人,未必肯去求助,而政府派人主動去關心及協助他們,相信效果會更加好,當然呢啲工作都係要花費唔少資源,不過我認為係值得去做嘅事,政府或者可以同志願機構合作,效果或者會更好。此外,我亦都好贊同部分同事嘅建議,特別係提高自力更生支援計劃下「豁免計算入息」嘅最高豁免額,以增加計劃嘅誘因,從而鼓勵佢哋外出工作。

社交分享