就根據《基本法》第七十三(九)條動議的議案之發言

近日,經常喺不同場合都有朋友同我講,對香港前景感到憂慮,佢哋都問: 香港到底要鬥爭到幾時? 大家係咪真係想咁樣落去? 香港有好多民生同經濟建設等緊我哋去做,點解唔做咗先?

我雖然唔知道香港實際有幾多人有相同嘅睇法,但希望大家唔好低估呢一班人嘅數目,而且可能不斷增加之中。大家嘅憂慮其實喺有充分嘅理據,好多香港人都知道本港嘅競爭力早已經大不如前,目前只係靠國際金融中心嘅招牌,維持港人嘅生計,實際本港前景危機四伏,一旦金融中心嘅地位稍有差池,下一代港人都唔知可以靠乜嘢搵食。

近年執政者欠缺長遠眼光,令香港多項深層次問題未能解決,再加上過去十多年不停內耗,導致本港經濟建設停滯不前,反觀當年同為亞洲四小龍,南韓近十年嘅經濟成就,已經唔係香港可以相比,新加坡旅遊同經貿嘅工作都做得好出色,佢哋家庭平均收入早已遠遠拋離香港,而台灣則受到政治爭拗嘅拖累,民生經濟都持續低迷。事實上,除咗南韓、新加坡及內地之外,有好多亞洲嘅國家或地區都努力爭取發展嘅機會,如果香港再唔醒一醒,繼續沉迷於政治爭拗,忽視經濟民生建設,香港只會沉淪落去!

今日議案嘅重點,係行政長官究竟有無嚴重違法或瀆職。正如有好多議員都講過,行政長官確實有僭建嘅行為,而佢處理嘅手法亦都好有問題,但無論如何,僭建同貪贓枉法係兩回事,嚴重性不能相提並論。至於虛假陳述嘅問題,我認為,只係特首喺事件上處理得好差,提供嘅資料十分混亂,亦非巨細無遺,但根本無有力嘅證據證明他提出虛假陳述。所以,其實無足夠理由去啟動彈劾特首嘅機制。

我認為,正確嘅做法,係由屋宇署按法例及正常程序,繼續跟進僭建問題,喺輿論同傳媒嘅監察下,政府部門無可能有任何偏袒。法治精神係香港嘅核心價值,而法治最講究係人人平等,唔可以因為特首係權貴而受到袒護,但同樣唔能夠因為佢嘅身份而要罪加幾等,只要依足法例辦理已經足夠。老實講,行政長官今次事件中,他已經多次道歉,而且受盡羞辱,已經比一般市民付出更大嘅代價。

我想強調一點,大家都知道僭建係違法行為,但亦係香港好普遍嘅問題,好多人都可能涉及呢個問題,包括不少政界人士。我希望大家都能夠撫心自問,我哋有無對人哋嘅僭建就窮追猛打、對自己嘅僭建就輕輕帶過?

有關特首僭建嘅爭拗已經超過半年,泛民已經先後提出過不信任動議、要求引用特權法調查、及而家嘅彈劾議案,呢三步曲做完之後,我希望立法會能夠返回正軌,集中精神處理本港各項急切嘅問題。

社交分享