制衡領展獨大議案23-11-2016

制衡領展獨大議案 陳健波議員

主席:

1) 「領展房地產投資信託基金」自上市以嚟,就奉行商業運作嘅模式,管理大量公共屋邨嘅商業及停車場設施。本來,用商業運作模式運作,係有助提升營運效率及改善服務,但如果只顧追求利潤,忘記咗企業嘅社會責任,就算賺到好多錢,結果只係換嚟一塊「黑心招牌」,企業本身最終都要付出代價。

2)領展而家一味賺盡嘅營商手法,喺國際商業世界中,早已經不合時宜。事實上,商界喺幾十年前,已經普遍認同企業必須負上「社會責任」,而且賺錢多嘅大企業,責任越大。簡單啲講,商界認同,第一,社會只會尊重取之有道嘅商業機構,即係賺錢要賺得公道,第二,商業機構適當地回饋社會,才可以建立一個好品牌。喺國際商業世界中早已證明,如果企業罔顧「社會責任」,無論企業賺到幾多錢,都只換嚟一塊「黑心招牌」,唔會得到社會尊重,遲早要付出代價。好不幸,領展選擇走咗呢條路。

3)政府當年出售公屋嘅商場,其中一個重要目的,係引入專業管理,去改善及提升服務水平,大家都記得當年公屋商場大多營運效率低、環境亦欠佳。領展接手後,確實提供到專業嘅管理,效率同環境都有好大改善。不過,領展忘記咗佢哋嘅優勢,係基於有龐大嘅公屋居民支持,但喺市場壟斷嘅情況下,領展最終發展成為一個賺到盡嘅「怪胎」,全完忘記咗佢哋嘅責任,無視居民需要。所以,我係贊同容海恩議員嘅原議案,力促市場健康競爭,引入制衡領展嘅措施。

4)有人建議回購領展,但我認為唔太實際。目前,領展市值高達1156億元,比起上市時已經升咗4倍多,政府要奪回話事權,即要回購過半數嘅股權,至少要動用580億元,而且回購必然導致股價大幅上升,結果反而令到領展嘅管理層覺得自己好成功,為領展大幅增值,亦會為社會發出錯誤訊息,間接鼓勵其他企業有樣學樣。與其回購,不如動用呢啲錢,用嚟引入健康嘅競爭,用市場嘅力量去迫使領展走回正確嘅道路,對整體社會一定更有益。

5)正如原議案所講,政府應該喺社區設施不足嘅地方,興建公營街市,甚至喺各區興建大型綜合市政大樓,呢啲係長遠嘅解決方法,而我哋同時都需要一啲臨時措施,以解決居民目前面對嘅困境。當中,臨時墟市係一個好建議,但根據過去嘅經驗,墟市選址必須方便居民,如果選址太遠,根本吸引唔倒居民去,最後就會失敗。

6)另外,邵家輝議員嘅修正案提到,改劃公屋低層空間,例如地面及平台,作零售用途。我贊成呢個建議,其實早年公屋嘅最低層有大量地舖,為居民提供大量價廉物美嘅用品,直至新建公屋都附設商場,地舖最後先至逐漸消失。事實上,目前公屋嘅低層有大量空間,只要善用及管理得宜,一定可以釋放到大量零售空間,俾小商戶租用。

7)除咗上述建議,我認為,可以考慮使用空置嘅學校及其他社區設施,改建為臨時嘅市政大樓,最低兩層可以做濕貨及乾貨街市,其他樓層可以做閱覽室等康文用途,令到市民得益、小商戶得益、更可以將空置建築物活化,做到一舉幾得。同時,除咗搞臨時墟市外,我認為可以同時考慮適度放寬小販政策,適度地發出有年期限制嘅臨時牌照給特定人士,例如失業人士,並只准喺指定嘅地方擺買,咁樣就可以幫到更多弱勢社群。

8)目前,領展最被人詬病,就係趕走咗小商戶,以及令到街市餸菜越來越貴,呢啲建議正好針對目前嘅情況,填補咗領展不足之處,為居民即時帶來方便。此外,亦都為領展帶來競爭壓力,可以促使領展進行改革。不過,呢啲建議就算可行,最終都要政府有決心去做,否則都係紙上談兵。政府喺地區層面上,一直力求穩紮穩打,通常唔會做一啲大膽、無十足把握嘅改革,但而家關係到小市民嘅福祉,我希望政府高層能夠下決心,大膽落實有關嘅建議。

本人謹此陳詞

社交分享