「打擊假難民」議案30-11-2016
主席:
1)香港係《禁止酷刑和其他殘忍、不人道或有辱人格的待遇或處罰公約》嘅締約方，毫無疑問，我哋無論喺法律上或人道立場上，都有責任協助真正嘅難民，免於遣返後受酷刑對待。不過，今時今日，提出免遣返聲請嘅人士，聲請嘅確立率只有0.48%，即係審核過嘅申請人當中，超過9成9都係假難民，或者叫經濟難民。
2)呢啲假難民嚟香港嘅目的，唔係為逃避酷刑，主要係為咗搵錢，結果就衍生出兩個問題，第一個問題係黑工湧現，今年頭10個月入境處就拘捕咗421名非華裔嘅黑工，比去年同期升咗26%，我相信實際黑工數目，會遠遠超過呢個數目，當入境處採取更多行動時，會拉到更多黑工。第二個係治安問題，警方今年頭10個月共拘捕1214名持有行街紙嘅非華裔人士，絕大部分係免遣返聲請人，佢哋因為干犯刑事罪行而被捕，比去年全年上升近一成，比前年更激增超過8成，而且有報導指部份聲請人參與黑幫活動，情況實在令人憂慮。
3)除咗呢啲問題外，處理免遣返聲請亦涉及龐大財政開支，政府預計16-17年度嘅開支高達11億3千萬，比上年度上升5成，長遠嚟講，呢個係沉重包袱。如果為咗協助真正有需要嘅難民，我相信市民大眾即使好無奈，但都會接受。不過，而家嘅事實係，9成以上都係假難民、經濟難民，佢哋只係濫用緊本港嘅聲請機制，市民一定唔會願意為咗呢啲假難民，而要到社會付出沉重代價，呢啲代價包括咗財政上、治安上及就業市場上。所以，我哋係有必要打擊濫用免遣返聲請嘅行為。
4)事實上，經過當局近年嘅努力，非法入境及濫用免遣返聲請嘅情況已初見成效，今年頭10個月，截獲或自首嘅非華裔非法入境者有2046名，比去年同期下跌咗33%，而新接獲嘅免遣返聲請有3481宗，亦比去年同期下跌咗15%。所以，我係支持政府從四個範疇去入手，包括入境前管制、審核程序、羈留、執法及遣送，呢啲都係治標治本嘅好方法。
5)然而，目前仍然積壓咗10675宗聲請等待處理，如果聲請個案保持入多過出，即係申請個案增長嘅速度快過審核嘅速度，積壓嘅個案就會不斷上升，永遠都解決唔到問題。目前，入境處已經將每年完成審核嘅宗數，由15-16年嘅2200宗，增加至16-17年嘅3000宗。但今年頭10個月政府已接獲3481宗，每年3000宗嘅審核速度，一定不敷應用，結果個案只會越積越多。幸好，入境處已經決定增加資源及簡化程序，承諾到17-18年提升審核速度到每年5000宗，若果真係落實得到，積壓嘅個案就有望可以逐步解決。
6)長遠嚟講，只要公約仍然適用於本港，免遣返聲請嘅個案就會繼續出現，所以我哋應該制定長遠嘅政策。我認為，政府應該針對積壓個案訂下具體目標，例如積壓個案不應多於5000宗或3000宗，如果多過指標，就增撥臨時資源加快審核速度，當積壓個案少於指標時，就可以回復正常嘅處理速度，咁樣就可以確保唔會有太多積壓個案，減少滯港聲請者嘅人數，亦大幅減低對本港治安嘅壓力，以及減低聲請者做黑工嘅機會，而且可以減低聲請者嘅輪候時間。
7)同時，有議員建議成立收容中心，以妥善安置及管理聲請者。不過，政府已表明，根據法律嘅原則，如果入境處不能在合理時間內將聲請者遣返，則不能長期羈留有關人士，所以成立收容中心，有一定嘅困難。如果按我嘅建議，聲請者輪候時間會大為縮短，到時成立收容中心，可能可以解決到法律上嘅問題。另外，有建議指，有外國政府正研究遣返干犯嚴重罪行的難民，取消他們的難民資格，本港亦可以考慮，我認為如果法律上可行，有關建議值得我哋進一步考慮。
本人謹此陳詞
