「制訂房屋政策」議案辯論

「制訂房屋政策」議案辯論7-12-16 陳健波議員

主席:

1)樓價持續飆升,早已經脫離咗實體經濟,一般市民根本買唔起。做成今日嘅局面,有兩個主要嘅根源,第一係長期超低息環境,吸引投資者大舉投資房地產,令到樓價上升,而樓價越升則越多市民想買樓,結果樓市出現非理性亢奮,政府最終要多番推出「辣招」,壓抑需求。由於受制於聯繫匯率,香港嘅利率係要跟美國走,呢方面無乜嘢可以做,惟有等美國利率正常化。

2)第二個根源,就係土地供應不足。過去廿多年,香港樓市大起大落,土地供應亦隨之而不斷變化。當年金融風暴後,樓價急挫,政府於是決定停止賣地、改用勾地制度,以穩定樓市。非常時期用非常手段,本來係好正確,但最弊係當樓市穩定後,政府遲遲唔肯恢復賣地,亦停止咗開發土地,結果埋下今日嘅惡果。我哋要解決問題,一定要從根源入手。

3)我仲記得,喺09年已經有數據顯示,由於政府已經多年無定期賣地,樓宇供應量將會跌至每年少於一萬個,當時我同多位議員即時約見政府官員,要求正視土地供應不足嘅問題,但當時嘅政府遲遲未有反應,白白錯失咗及時糾正錯誤嘅機會。

4)我認為,我哋要吸取呢啲教訓,日後無論地產市道點樣,政府應該確定長遠政策,維持穩定嘅土地供應,唔好再左搖右擺,即使遇到好似金融風暴嘅極端情況,亦唔好完全中斷土地供應,只可以暫緩賣地計劃,而要保持土地開發嘅工作,確保市場有需要時,可以即時推出供應,避免重蹈覆轍。事實上,社會對房屋嘅需求,會受好多因素影響,即使政府嘅「辣招」,亦只能壓抑部份需求,惟有土地供應,政府係可以完全掌握喺手中,所以要長遠解決住屋問題,穩定而足夠嘅土地供應,先至係重中之重。

5)近期,發展局發表咗《香港2030+:跨越2030年的規劃遠景與策略》,為長遠土地供應作出規劃,我認為係正確嘅方向。值得一提,報告預計未來土地需求超過 4,800 公頃,但目前仍缺乏1,200 公頃,初步希望由兩個「策略增長區」東大嶼及新界北來填埔。當中東大嶼山會發展人工島,我認為,要解決土地問題,喺維港以外嘅地方填海,係一個長遠而穩定辦法,雖然爭議係在所難免,但只要做好環境保障嘅工作,相信廣大市民係會接受,政府應該認真考慮用填海嘅方法做地。

6)講到「辣招」問題,我同意非常時期用非常手段,面對目前市場嘅情況,用「辣招」去壓抑需求,係無可厚非。不過,本港奉行自由經濟,應該係用增加供應嘅手法,去解決問題,用行政手段去干預市場,只會令樓市不斷扭曲,好似而家嘅「辣招」,雖然壓抑咗需求,但同時令到二手市場凍結。今日,有議員建議引入物業增值稅及住宅空置稅,甚至租務管制,同樣會扭曲咗自由市場,產新好多不良嘅副作用。所以,我認為,政府長遠應該放棄用行政去干預市場嘅做法。

7)另外,講到公營房屋問題,我多年前已經建議,我哋長遠應該學習新加坡,當然唔係照抄組屋嘅模式,香港亦無足夠嘅資源,畀8成以上嘅市民入住公營房屋。目前,本港有30%嘅市民住喺公屋,有17%嘅市民住喺居屋,即係全港有47%嘅人住喺公營房屋,我認為可以訂下目標,逐步提升到55%至60%,令到更多市民可以入住公營房屋。

8)可能有人認為,呢個建議不切實際,因為而家公屋供應量仍然不敷應用,輪候時間越來越長,提高入住人口目標,只會淪為空想。我認為,計劃應該係長遠策略,當樓市整體供應量轉趨平衡時,就應該有充足土地,供擴展公營房屋之用,而且增加咗公營房屋供應,私營房屋嘅需求亦會相應減少,到時亦會多咗土地畀公營房屋,所以我相信長遠應該可行。

9)我認為,有關嘅建議,即使投資巨大,亦好值得去深入研究,因為可以起到穩定社會嘅功用。而家社會有好多怨氣,有不少分析認為,係因為樓價貴及其他衍生嘅問題,只要能夠解決居住問題,社會就會轉趨穩定,新加坡就係一個好例子。我哋學唔到新加坡十足十,但希望學到佢嘅精髓,發揮到穩定社會嘅作用,當然我哋需要做好多研究,研究點樣去落實建議。我相信,如果我哋唔下定決心,目前嘅苦果將不斷循環再現,受苦只會係社會大眾。本人謹此陳詞

社交分享