「對下任行政長官的期望」議案發言

主席:

1)新一屆行政長官選舉即將舉行,社會各界的確對新任特首有好大期望,今日嘅議案畀咗一個機會大家,講下大家嘅期望,我相信各位有意參選者都會認真聽下今日大家嘅意見。

 

2)首先,我想講下房屋問題,我相信新一屆政府仍然會係重中之重。香港人為住屋煩惱,已經唔係一朝一夕嘅事,社會為此而產生大量怨氣。所以,我對新任特首嘅第一個期望,就係用大智慧去解決香港人嘅居住問題。

 

3)政府指未來3至4年一手市場私樓潛在供應量有9.3萬伙,係04年以來嘅新高,喺呢方面,陳茂波局長做咗大量工作,成績有目共睹。供應大幅增加,樓市可望短期回穩。但有分析指,香港係中國嘅紐約,將來中國經濟增強,就會有大量資金流入香港,房屋需求自然激增,樓價又再爆升。所以,即使有穩定建屋量,樓價問題仍會循環不息地出現,長期困擾香港人。

 

4)所以,我建議學習新加坡,用釜底抽薪嘅方法解決住屋難嘅問題。新加坡有8成人住喺公營房屋,社會安居樂業,令到好多香港人嚮往。當然,我哋無可能做到8成嘅比例,但我相信香港有能力逐步由目前4成7嘅比例,提升到6成左右。其實,政府目前已增加公營房屋嘅建屋量,但要達到6成人入住公營房屋嘅目標,仍然要投入大量嘅資源及時間,我希望新任特首能夠下定決心,將呢個目標訂為長遠發展政策。

 

5)當然,我哋要達到目標,一定要維持穩定嘅土地供應,早前辯論房屋政策時,我已經詳細講過,唔可以因為樓價波動而大幅削減土地供應,今日香港嘅困局,就係因為上屆政府長時間中斷咗土地供應。同時,本港土地開發一直都好困難,新特首應該考慮採用一啲進取方式,例如增加喺維港以外填海造地,以保證土地有穩定嘅供應。

 

6)我對特首嘅第二個期望,就係建構一個愉快社會。要做到呢個期望,當然一啲都唔容易,但要紓解市民部份生活嘅壓力,我哋應該可以做得到。當年我剛剛入立法會嘅時候,已經要求政府推動「工作與生活平衡」(work life balance)措施,即係由政府同僱主合作,為僱員提供更好嘅工作及生活環境,例如彈性上班、特別事假、對僱員友善嘅工作環境,呢啲措施喺外國已經好流行,政府過去都有推出一啲措施,包括五天工作及男性侍產假,對社會有相當好嘅效果,但整體嚟講,措施唔算多。

 

7)其實,只要我哋肯大膽嘗試,有好多新措施都值得我哋做。近年,勞資雙方一直為勞工假期嘅問題爭論不休,按勞工處嘅統計,目前有近100萬名僱員,只享每年12日勞工假期,較公眾假期少5日,如果為佢哋補回5日嘅假期,每年額外薪酬成本要18.3億元。我就曾經建議過,效法關愛基金的模式,成立生活與工作平衡基金,撥款給放勞工假期嘅公司,資助員工放5日或少於5 日嘅特別假期,政府最多用十多億就換來100萬人嘅歡樂,其實十分化算。當然,呢啲係臨時措施,畀勞資雙方有時間去解決勞工假期嘅問題,亦都係個別例子,但成立生活與工作平衡基金,確實可以推動好多唔同措施,為僱員提供更好嘅工作及生活環境,亦可推動私營企業參與,帶動成為社會風氣,外國其實已經好流行。所以,我認為,好值得新特首去做。

 

8)最後,我想講下目前社會上嘅歪風歪理。今日我哋辯論對特首嘅期望,明明特首仲未產生,但無論喺本會或社會上,好多人已經鬧咗先,大家都未睇特首嘅政綱,未聽特首嘅施政方針,就已經破口大罵。好明顯,好多人係針對特首呢個位,好似邊個坐上去,已注定無運行,而新特首係咪有能力、班底有無料到、有乜嘢鴻圖大計,全部都好似唔重要。市民仔細啲聽就會發現,梁振英做畀人鬧,而家等第二個人做,一樣畀人鬧,而且鬧嘅嘢係一模一樣。

 

9)好多人同我反映,反對集團動員個別議員、各種媒體、及專欄,槍口一致咁去攻擊佢哋認為中央可能接受嘅人選,攻擊嘅規模、力度都令人震驚、令人心寒。假如一啲市民只係單一睇呢啲嘅傳媒,難免信以為真,留低錯誤嘅印象。其實,今時今日,做反對派都唔可以做得咁懶,只係照搬攻擊梁振英嘅嘢,去攻擊下一任嘅特首人選,咁樣照搬,市民遲早一定會發現。

 

10)我同時想指出,近年社會同議會上,出現咗一啲反對發展嘅言行,好似「不發展就係硬道理」,包括喺議會出現嘅拉布行為。實情係,香港喺一個有700萬人口嘅國際都會,只要發展慢一啲,香港人嘅生活就會倒退,甚至養唔起咁多人,更加唔好講要維持而家嘅福利水平。而家,有好多人一方面要求增加福利,另一方面又要制止香港發展,市民只要細心諗下,就知道呢啲人係搵你笨!

 

我謹此陳辭。

 

社交分享