積極研究成立中產事務委員會議案

主席:

 

1)中產階級係香港社會嘅中流砥柱,為社會付出多,社會對佢哋回報少。過去環境好嘅時候,中產一直默默耕耘,自己問題自己解決,但今時今日,社會同經濟環境都變咗,中產負擔越來越重,但佢哋升職加薪嘅機會就大幅減少。

 

2)難怪近年有唔少中產訴苦,話佢哋即使家庭月入6、7萬,生活仲係掹掹緊,希望政府可以幫下佢哋。不過,中產人士吐嘅苦水,好多人都唔明,點解月入6、7萬,生活仲會掹掹緊。

 

3)其實,係有數得計,中產家庭有中產嘅生活模式,佢哋無資格住公屋或買居屋,住屋開支已經一大筆,夫婦都要返工,返工開支唔可以慳,仔女嘅生活費、學費及請傭工照顧等等,又係一大筆。中產一般都唔願去逼公立醫院,多數會買醫療保險,同時又要負責供養父母,最後仲要交稅。呢啲數計計下,其實好襟計,而且仲未計一啲娛樂或非必要開支,例如旅行、甚至養車。所以,中產家庭訴苦,係有佢哋嘅原因。

 

4)老實講,政府過去嘅政策一直以扶貧為核心,傳統上甚少去考慮中產嘅問題。喺回歸前,政府鼓勵中產自己問題自己解決,當年經濟高速發展,中產人士有大量上游機會,同時市場投資回報遠比今日好,的確有能力自己解決問題。不過,回歸後,世界經濟格局起咗好大變化,本港經濟逐漸成熟,上游機會大幅減少,投資回報又越來越差,而且樓價及租金越來越高,呢啲因素令到中產處境越來越困難。即使政府為中產提供一啲紓解措施,例如退稅、寬減差餉等等,但起到嘅作用好有限。

 

5)對中產人士嚟講,享受唔到福利,已經谷氣,佢哋仲要俾好重嘅稅,負擔好重。當然,如果講薪俸稅,稅率的確比歐美為低,但相比基層市民,中產嘅稅率高好多,相比富裕階層,中產嘅負擔亦明顯較為吃力。而且,中產仲要俾其他間接稅款,包括一切同地產有關嘅稅,如差餉、地租、印花稅及物業稅等,甚至喺高樓價下,中產買樓或租樓已變相俾緊高地稅。另外,中產如果自己楂車,亦要交昂貴嘅牌費及燃油稅。所以,本港表面上實行低稅制,但中產直接或間接繳交嘅稅項,其實係相當沉重。

 

6)所以,近年中產人士嘅怨氣上升,係有原因嘅。我支持成立中產事務委員會,全面檢討中產政策,為佢哋創造更加公平嘅環境,疏導中產不滿嘅情緒。我認為,其中一個檢討重點,係要考慮中產既然享受不到房屋、老年等福利,甚至無用到公共醫療及教育服務,政府應為中產提供針對性嘅福利。我認為,其中一個方法,就係為佢哋提供保險扣稅安排,中產普遍都喜歡買人壽、退休保障及醫療保險,為自己嘅將來做好準備,如果政府為人壽、醫療、退休及年金等提供扣稅安排,中產就可以直接得益,而政府實際亦唔會有好大損失,因為小小嘅稅款可以鼓勵到中產為自己嘅將來做好打算,減低將來對政府嘅依靠,正正係除笨有精。

 

7)順帶一提,政府已經公佈自願醫保計劃嘅具體方向,稍後將會提出詳細嘅建議。醫保計劃針對嘅目標正正係中產階級,而計劃亦將會提供扣稅嘅優惠。不過,計劃無咗500億嘅資助額,亦無咗高風險池,令人擔心計劃吸引力不足,所以我希望政府能夠為計劃提供更多嘅經濟誘因,例如提出具吸引力嘅扣稅方法,吸引更多中產人士參加。

 

8)中產除咗關注醫療等問題,仲好關注交稅問題。剛剛發表嘅財政預算案,提出擴闊薪俸稅嘅邊際稅階,減輕130萬名納稅人嘅負擔,絕對係惠及中產嘅德政,值得支持。同時,又宣佈成立稅務政策組,全面審視稅務問題,我希望有關嘅研究能夠包括中產稅務負擔嘅問題,並提出長遠可以紓減佢哋經濟壓力嘅方案。

 

9)主席,全球經濟環境陰晴不定,目前表面風平浪靜,但美國、歐洲、內地及香港嘅經濟都深藏危機,前景不容樂觀。假如再次爆發金融危機,我希望,政府除咗會為基層市民推出紓困措施外,亦會考慮到中產目前嘅困境,同時推出能夠協助中產嘅紓困措施。

 

謹此陳詞

社交分享