主席:
1)旅遊業係本港嘅支柱產業，計埋各個與旅遊息息相關嘅行業，包括飲食、零售、及展覽等行業，合共聘請咗幾十萬前線人手。旅遊業實在養活好多香港人，對本港有極大貢獻。
2)近年本港旅遊業受到好大衝擊，來港旅客不斷下降，行業聘用咗大量基層人手，如果旅遊業持續不景氣，一定會引起連鎖反應，為零售及酒店等行業帶嚟巨大打擊，影響基層嘅生活。所以，我好支持姚思榮議員提出嘅議案，我哋應該痛定思痛，吸取教訓，研究點樣振興本港嘅旅遊業。
3)旅遊業受到衝擊，原因有好多，主要可以分為國際大環境嘅變化，以及本港自己嘅問題。講到國際大環境，近年內地經濟增長出現放緩跡象，而且人民幣兌港元轉弱，來港消費變得貴咗，相反我哋鄰近嘅旅遊熱點，例如日本，就變得更加抵玩，呢啲地方更積極向中國旅客伸出友誼之手，推出好多便利國內旅客嘅措施。結果，部份原本打算嚟香港玩嘅旅客，最後改為去其他地方。
4)國際大環境係世界性問題，唔係香港可以解決，但本港自己嘅問題，就絕對係我哋嘅責任。自從03年內地推出自由行，內地旅客差不多年年高速遞增，業界早已應接不下，自然無時間去諗下持續發展嘅問題，政府規劃工作亦停滯不前，結果旅遊業變成重量不重質，但大家都知道，客源單一化係非常危險，當國內旅客潮流一變，佢哋改咗去其他地方，對本港嘅影響就立竿見影。
5)我認為，我哋要反省下點樣做好本港嘅旅遊業，唔好單靠內地市場，盡量開拓更多元化嘅旅客市場，吸引更多高消費嘅過夜旅客訪港，做到重質又重量。所以，我支持姚思榮議員嘅建議，全面去梳理具旅遊價值嘅資源，然後根據結果，提出優化嘅方案。
6)我認同，香港需要優化我哋嘅旅遊設施，更要研發新亮點。香港除咗係國際大都會、美食及購物天堂外，其實仲有好多自然、具本土特色嘅景色，可以吸引到好多外國旅客，包括世界級嘅地質公園、充滿傳統文化嘅古老圍村、洋溢漁村風情嘅香港仔、景色優美嘅郊野公園等等，呢啲現成嘅旅遊資源，我哋過去並無充分利用，而家正好趁目前嘅機會，大力發展成為本土特色遊，相信只要當局做好策劃嘅工作、有系統咁推廣宣傳、及提供合適嘅交通接駁，應該可以成功。
7)事實上，我哋要吸引長程嘅國際旅客，本土特色遊係重要嘅工具。外國旅客如果想體會國際大都會嘅風貌，大可以去紐約、倫敦，唔駛咁遠嚟香港，所以要吸引國際旅客，香港應該打造成大都會加本土特色遊，咁樣對國際旅客有更大嘅吸引力。而且，發展本所土特色遊所費有限，亦可帶旺當區本土經濟，同時可以達到旅客分流嘅作用，減輕旅遊旺區嘅人流壓力，正係一舉數得。
8)另外，我認為，香港必須重建“好客之都”嘅形象。近年，由於無止境咁追求客量增長，本港鬧市及旅遊區成日都人山人海，加上有旅客做出一啲唔文明嘅行為，引起本地市民嘅反感。同時，近年社會出現反水貨活動，更加上有一小撮人打出本土嘅旗號，對內地旅客做出種種趕客嘅行為，都令旅客非常反感。目前，來港旅客減少，市民同旅客之間嘅矛盾亦稍稍緩和，但當旅客回升時，矛盾又將會激化。所以，我希望政府同業界想辦法化解矛盾，重建“好客之都”嘅形象，否則我哋旅遊基建即使做得幾好，到頭來市民及旅客仍然係一肚氣，最終都係得不償失。
9)最後，我認為，旅遊業界必須下定決心，去打擊一啲業內嘅害群之馬。目前，國內仍然有唔少廉價嘅香港旅行團，其實都係購物團，佢哋會用好多時間帶旅客購物，更會強迫旅客消費，呢啲負面消息已經嚴重打擊本港旅遊業嘅形象。旅遊業界應該聯同內地有關方面，去禁止呢類廉價購物團，防止再有劏客事件出現。
我謹此陳詞
