「急切改善九龍東公營醫療服務」議案

主席:

1)今日雖然係講九龍東公營醫療服務,但醫療問題一直係市民關注嘅議題,而且近期接連發生多宗嚴重嘅醫療事故,令到社會高度關注公營醫療服務質素嘅問題,所以我想趁呢次機會,從更宏觀嘅角度,去講下本港公營醫療嘅問題。

2)各間公營醫院都有世界一流嘅醫療設備,而且醫療技術都係處於世界前列。不過,由於公營醫療收費廉宜,市民有病都會湧去公營醫院,令到醫院長期有人滿之患,政府幾年前曾想過公私營醫療分流,資助市民購買醫療保險,以將部份中產市民分流到私營醫院,呢個原本喺一個為公營醫院減壓力好辦法,政府出小小資助,就可以鼓勵中產人士分流出去。可惜因為種種原因,最終自願醫保方案取消咗政府資助,只保留扣稅嘅優惠,相信最終只能吸引少量中產參加,分流嘅作用有限,公營醫院將繼續出現逼爆嘅情況。

3)另一方面,公營醫療面對人手不足嘅問題。根據資料顯示,去年截至10月,
公營醫院醫生、護士和專職醫療人員嘅流失率,都創出6年新高,當中醫生流失率達4.7%,護士達5.4%,個別專科嘅醫生流失率更高達1成。事實上,醫管局近日承認,目前架構中仍欠300名醫生及600名護士,令到部份新醫院唔能夠全面展開服務。與此同時,因為人口老化嘅問題,去公營醫院求診嘅市民就與日俱增,無論去睇急症或專科都要越等越耐。

4)所以,目前公營醫療最核心嘅問題,係病人太多,醫護人員不足,醫護人員嘅工作壓力可想而知,亦難怪不斷出現流失嘅情況。近期,每逢流感高峰期,急症室及內科病房必然逼爆,公營醫院亦要採取緊急應變措施。我哋知道,喺前線有唔少醫護人員都謹守崗位,為市民提供良好嘅服務,係值得我哋讚賞,但我亦都聽到唔少市民講,甚至我去探病時都體會過,部份醫護人員因為要處理排山倒海嘅工作,已經做到相當麻木,對病人嘅警覺性難免大幅減低,當然我哋要體諒醫護人員嘅苦況,但醫療服務關係到市民嘅生命健康,一小小嘅失誤就可能鑄成大錯,我哋必須要正視呢啲問題。好在高永文局長任內,已經做出成績,喺困難中做咗好多改革,我哋見到政府已預留2000億,去推動十年醫院發展計劃。

5)新一年度用於醫療衛生嘅經常性開支已經超過600億,但人口老化更會加促對醫療服務嘅需求,政府必須繼續投入資源,去應付市民嘅醫療需求。候任特首林鄭月娥已經喺政綱中承諾,將會制定長遠醫療政策,為香港未來所需嘅醫療資源作出規劃。同時,會制定長遠醫護人手政策,投放資源,並提出措施為公營醫療機構挽留人才。我希望林太一上任,就將呢啲建議列為首要工作,並盡快一一落實。

6)另外,政府即將提出自願醫保計劃嘅詳細方案,雖然政府已經放棄咗資助嘅方法,吸引力大減,但我仍然希望政府可以增加經濟誘因,例如提出更優惠嘅扣稅辦法,吸引更多人參加。政府實際只係出小小嘅鼓油,就可以鼓勵到市民自己出雞,為自己健康負責,減低對公營醫療嘅需求,真正係何樂而不為。同時,自願醫保計劃落實之後,我希望政府繼續去研究及落實高風險池方案,以增加醫保計劃嘅吸引力,從而鼓勵更多市民分流去私營醫療中。

7)最後,我想講下《藥物名冊》嘅問題。科學不斷進步,而家好多危疾已經有新嘅特效藥,價錢極為昂貴,而且屬自費藥物。其實,患咗危疾已經相當慘,患者如果唔合乎資助資格,又唔算好有錢,為了買藥醫病,往往要動用多年嘅積蓄,甚至要變賣家產,更加有人因而放棄試新藥嘅機會,我每次聽到呢啲故事,都會感到好難過。所以,我好支持議案中建議,擴大醫院管理局《藥物名冊》內受資助藥物嘅種類,甚至希望當局重新檢討呢個制度,可以去幫助更多有需要嘅人。

我謹此陳詞

社交分享