主席:
1)今次嘅財政預算案，係陳茂波司長第一份預算案，司長只有一兩月嘅準備時間，相信當時預算案嘅大框架早已定調，司長只能夠做一啲方向性嘅微調，或者提出一部份新建議，但即使如此，同過往嘅預算案比較，我見到有唔少新嘅亮點，感覺係穩健之中尋求積極嘅發展，並無看守政府嘅心態。
2)我哋最常聽到對預算案嘅批評，話政府錄得900億巨額盈餘，但只係肯派糖300幾億，仲要比去年少一成。我認為呢個批評完全唔合理，我哋唔應該因為錢多咗而要派多啲糖，咁樣只係為派而派，我哋派糖嘅原則，係應該睇有無實際需要，有需要就應洗則洗。大家應該記得，舊年公佈預算案時，香港經濟仲係烏雲密佈，無論零售、外貿、旅遊及金融地產市道，都充滿恐慌情緒，所以當時有需要維持一定嘅派糖水平。不過，舊年自從英國通過脫歐，以至特朗普當選美國總統，市道已經逐步回穩，目前本港經濟已較舊年穩定，實在無必要維持舊年嘅派糖水平，而家嘅水平，正好反映咗經濟嘅趨勢。
3)但係國際經濟環境仍然陰晴不定，目前唔能夠排除會再出現經濟動盪嘅情況，所以而家政府有錢應該儲起佢，一旦風暴再現，就應該立即推出新一輪紓解民困嘅措施，而我亦希望政府真係做好準備，特別係針對基層及中小企，可以提出切實嘅紓困措施。
4)同時，有人批評，預算案唔理民生及社會嘅發展，我不同意。預算案已經配合咗施政報案嘅規劃，預留咗600億元，準備用於社會及安老開支，包括300億用於安老扶貧、200億用於體育發展、及100億用於創新科技發展，當中有好多係政府經常性開支，即係一洗開頭，以後每年都要繼續洗落去，開支係相當龐大。呢啲建議都係用於本港有需要嘅層面上，係有針對性，絕對比亂派糖好。當然，我都認為，民生政策上唔係所有問題都照顧到，例如對N無人士嘅幫助似乎並不足夠，所以我希望政府，如果再推出紓困措施時，必須考慮為N無人士伸出援手。
5)今次預算案如果同過去嘅比較，的確有一啲新亮點。近年嘅預算案大多數以穩健及守成為主，今次預算案多咗一啲前瞻性及主動性。過去嘅預算案好少論述政府嘅理財原則，就算有，都只係簡單講下「積極不干預」、「大市場小政府」、及「量入為出」等原則，基本上都係比較空泛。今次預算案中，司長提出公共財政嘅目標，第一，政府必須適度有為。第二，政府必須目光遠大，為香港的未來持續投資。第三，政府必須善用財政資源，讓各階層市民可以分享經濟發展的成果。
6)呢三項公共財政嘅目標，我認為相當正確，正好針對目前香港嘅困境，而預算案亦作出清楚、具體嘅解釋。目前，香港經濟產業結構不平衡，而且越來越嚴重，只靠金融、服務及地產業，但呢幾個支柱，都面對不同嘅困難，咁嘅情況，等如將所有雞蛋放入同一個籃到，如果金融地產一出事，整個香港都出事。所以，過去政府大市場小政府嘅政策，已經唔符合時代嘅發展，我哋係需要政府適度有為，而且要目光遠大，為香港未來持續投資。政府近年銳意發展嘅創新科技及再工業化，事實上，創科局成立左之後能統籌呢方面嘅發展，成為香港經濟嘅新引擎。所以，我係支持呢啲公共財政嘅目標，並希望喺呢啲指引下，可以幫助香港走出目前嘅困境。
7)預算案另一個亮點，就係提出成立稅務政策組，全面檢討稅制，當中有兩個方向，第一，研究用稅務措施，促進產業發展，務求使香港維持競爭力，第二，研究擴闊稅基，以增加政府收入。事實上，本港稅制已經沿用幾十年，優點係簡易低稅率，但亦有嚴重嘅缺點，包括稅基狹窄、發揮唔到財富再分配嘅功用等等，所以本港要迎接新經濟世代，必須改革目前嘅稅制。事實上，有好多國家早以香港為對手，稅率水平貼近香港，去吸引外國投資，而且做得好成功，例如我哋主要嘅競爭對手新加坡，更在稅務優惠外，再增加多項優惠及資助公司。香港呢方面落後於國際形勢，已經令到我哋嘅國際競爭力下跌，我哋應該急起直追。
8)我過去多次提倡發展總部經濟，就係透過稅務同財政優惠，去吸引國際大企業來港設立地區總部，除咗可以吸引外資，仲可以為青年人開創具國際視野嘅優質工作。好可惜，政府冇大動作，香港嘅競爭力不斷下跌，根據統計處統計，去年共有22間國際企業嘅駐港地區總部及45間地區辦事處，撤出香港或降格成普通辦事處。過去數年，駐港地區辦事處由2012年嘅2516間，逐步下跌到2016年嘅2352間，情況已經去到令人憂慮嘅地步。所以，政府必須成立跨部門專責小組，由特首領導，用各種國內及新加坡行之有效的方法，去挽留及吸引外資來港。主席，我哋不但搞唔成地區總部，反而出現外資撤走嘅情況，呢個情況值得我哋各位議員思考，呢幾年我哋掛住內部鬥爭，人哋就不斷撬我哋牆腳，之前不斷有研究指香港競爭力下跌，當時好多人都係唔相信，而家外資用行動去證明畀大家睇，希望大家都反思一下，究竟香港係唔係仲要頹落去?係唔係仲要反對發展？係唔係大啲既工程都叫大白象去抺黑佢呢？係唔係仲要故步自封，閉關自守呢？咁做又對唔對得住年青人？對得住香港人？
9)財政司司長嘅任期只剩幾個月，佢無利用今次嘅機會，大事派糖去博取掌聲，去爭取民望，只係按實際情況同佢嘅公共財政理念制定預算，實在值得贊賞。我希望，無論下一任財政司司長係邊個，都可以繼續推動稅制改革，並且繼續採用呢啲公共財政原則。財政司當時宣佈左按揭證券公司研究公共年金計劃，但不足兩個月，按揭證券公司已公布初步方案，甚受市場歡迎，迅速落實惠民方案，充分反映財政司辦事能力。
10)另外，我想講下保險業界關注嘅問題。自願醫保計劃嘅討論已經橫跨咗兩屆政府，而家終於可望喺明年正式推出，政府正研究稅務扣減相關細節，保險業界表示歡迎，並且會盡力配合。自願醫保在2005年開始研究，當時有兩大改革對象，第一係優化醫療保險，2012年提出12項建議，而家落實左10項。另一個改革對象係私營醫療制度，可惜到今日都係寸步難行，包括原本想做嘅DRG，症候族群，簡單嚟講即係每個手術都根據涉及嘅成本，包括醫生手術時間，手術室，護士，藥物，儀器及其他費用，計算一個數值做賠償依據，基本上係手術成本越高，賠償越高，咁做可以令到保險賠償能夠根據醫療成本作相應賠償，而唔係好似而家咁，醫療收費海鮮價，睇你買保險最高賠償額去收費。呢啲誇大左嘅手術費同巡房收費，同埋好多無住院需要嘅索償，已經令到醫療保險成本高速上升，今年不少保單加價將會超過百分之十，我認真提醒政府同醫療界，如果唔肯的起心肝去做醫療改革，我相信幾年內醫療保險會貴到好多人都買唔起，到時大家只能疊埋心水，做好準備，有事只能返公家醫院啦。醫療界如果冇勇氣去正視呢個問題，唔同保險界去解決呢個問題，或者採取保護主義不溝通態度，而只係一味指責保險界，只會係殺雞取卵，造成政府、醫療界、保險界同市民四輸局面。
11)另一項保險業界高度關注嘅問題，係保監獨立嘅進展情況。保監局預計於今年第二季全面接手保監處嘅工作。政府提供嘅資料顯示，保監局而家聘請咗180名員工，當中有超過80人來自現時保監處，我相信憑佢哋豐富嘅經驗，會令過渡安排更加順利。目前，業界關注係監管工作嘅落實情況，喺制定法例時，政府承諾會盡快提供實務守則及相關指引，喺保障消費者嘅同時，亦令業界有例可依，避免保險從業員誤墜法網。我再次重申，政府必須一一落實立法時所作嘅承諾，並盡早同業界進行磋商。
12)此外，我都十分關注到保險業嘅人才培訓問題。保險業人才培訓先導計劃喺去年下半年正式展開，目前已初見成效，截至今年2月底，已超過600人接受培訓課程，希望政府繼續鼓勵更多人參加，以協助保險業長遠發展。同時，先導計劃完成後，我希望政府能將計劃延續落去，為保險業繼續培養足夠人才。
13)最後，我想講下青年人嘅問題。今年財政預算案中，針對青年人嘅政策都有唔少，包括有唔少人關心嘅搞電子競技。目前，有唔少地方搞動電子競技，等喜歡打機嘅後生仔，都可以透過打機打出前途，而且都搞得好成功。而家香港嘗試去走呢條路，我覺得呢個都係一個亮點，政府嘅思維一向比較保守，而家肯嘗試搞電子競技，可以講係一種進步，希望今次嘅建議能夠成功，同時希望政府日後能繼續用新嘅思維，去推動社會發展。另外，我留意到，政府預留資源畀教育局，推出中學生職業導引課程，我覺得係一件好事。在現實中，唔係個個學生都讀得到書，夾硬要佢哋喺傳統學校讀書，不但浪費時間，而且可能會打擊咗佢哋嘅自信心，政府而家投放多啲資源，等佢哋了解人生有好多唔同嘅路，可以考慮學下一技之長，絕對係一件好事。
我謹此陳詞
