就“打擊圍標,捍衛業主權益”議案發言

主席:

 

1)我首先要申報,我係港島一個大型屋苑嘅業主委員會主席,屋苑有超過2700個單位。

 

2)圍標問題已經成為社會嘅毒瘤,亦都係大廈管理問題中最棘手嘅問題。香港人日頭工作繁忙,收工都希望返屋企休息,如果唔好彩遇上圍標問題,返到屋企仲要為呢啲問題而煩惱,安樂窩都變得唔安樂。我都認識一啲苦主,佢哋唔單止要為鉅額維修費而擔憂,仲要長時間面對好多唔同嘅爭拗,畀佢攪到雞毛鴨血,喺屋企日日心掛掛,絕對係精神折磨。

 

3)圍標問題日趨嚴重,主要係因為維修涉及鉅額款項,講緊係以千萬,甚至以億元去計,自然吸引到不法份子垂涎。另一方面,現行監管大廈管理嘅法例,部份已經過時,部份過於寬鬆,導致不法份子可以好輕易咁得手。我做咗業主委員會工作多年,親身體會到物業管理制度有極大嘅漏洞,包括成立業主立案法團嘅過程、法團通過議案、及授權書機制等等,原來一直都無乜監管同制衡,不法份子利用漏洞,可以為所欲為。有關嘅詳情,我過去喺唔同嘅場合都講過,今日唔再重覆。

 

4)事實上,多年來,本會一直積極跟進大廈管理嘅問題,亦多次辯論過相關嘅議案,當中包括今日辯論嘅圍標問題,大家都提出過唔少建議。總結而言,要堵塞漏洞,政府必須修改法例,我亦有將我過去實際嘅經驗,詳細向政府反映,而政府近期提出修訂《建築物管理條例》嘅諮詢建議,亦採納咗我嘅部份建議。

 

5)針對圍標問題,修訂嘅諮詢建議提出多項措施,包括要通過大型維修工程,決議大會法定人數由原本業主人數嘅10%提高至20%,當中至少10%業主親自出席,以增加批出工程嘅門檻。另外,為免法團在少數業主持有大量俗稱授權書嘅「委任代表文書」下,就通過批出工程,業主可在授權書上寫明投票指示,同時每人最多只可持有不多於業主人數5%嘅授權書。

 

6)我大致上同意修訂嘅方向,但對於法團須遵守嘅管理嘅標準及常規,政府會繼續沿用目前《工作守則》嘅模式,只會訂明為「最佳做法」,我就有好大保留,因為在實際運作中,守則並無法律效力,即使完全不依循守則,亦無任何後果及責任,守則其實形同虛設,對心懷不軌的人士全無阻嚇力。政府過去將法規訂得寬鬆,目的係吸引業主自行組織法團,為大廈負上法律責任,結果政府好成功,有好多大廈成立咗業主法團,但經過一段時間後,就流弊叢生。政府認為,如果將守則刑事化,會打擊市民參加法團嘅意欲,但其實只要大家唔做違法嘅事,根本無須擔心有無刑責嘅問題。我哋要明白,必須要令到不法份子,包括令心懷不軌嘅法團成員,無法落手做假,係唔可以靠自律方式,應該將守則刑事化。

 

7)此外,即使修正建議最終獲得通過,亦要部門妥善執法及監管,目前負責嘅部門係民政事務局及民政事務總署,佢哋嘅工作已經好繁重,如果要佢哋加強監督嘅工作,根本係難以兼顧。所以,我同意成立專責嘅新部門,甚至委任現有嘅法定機構,例如負責推行“招標妥”計劃嘅市建局,專門就大廈維修嘅問題,作出全面嘅監督,相信會更有效執行法規,更可以全面協助居民進行維修工程。

 

8)另一方面,“招標妥”計劃亦都係打擊圍標嘅重要工具。財政司司長陳茂波特別喺本年度嘅預算案中,提出預留3億元,畀業主用優惠價去參加市建局嘅「招標妥」計劃,估計在未來5年有4500幢樓宇受惠,我認為絕對係一項德政。同時,市建局亦開放申請嘅規限,目前絕大部份有業主組織嘅大廈都可以申請。我希望政府能夠大力宣傳,甚至主動邀請有需要嘅大廈參加,相信當有大量大廈經「招標妥」協助下進行維修工程,市場就能夠提供足夠資訊供業主參考,圍標自然就難以成功。

 

我謹此陳辭

社交分享