就“制訂單車友善政策,將單車定為交通運輸工具”議案發言

主席:

 

1)踩單車係一項有益身心嘅活動,一直深受青年人嘅喜愛。近年,環保意識深入民心,單車作為綠色嘅代步工具,自然受到歡迎,單車亦係短途嘅交通工具,喺好多歐美城市都十分盛行,呢種趨勢已經成為生活時尚,唔少人會踩單車返工。

 

2)推動單車成為代步、甚至成為交通運輸工具,係國際大趨勢,香港作為國際都會,我同意政府係有需要制定單車友善政策。不過,對於今日嘅議案,我係有一啲憂慮,議案除咗爭取制定單車友善政策,仲希望鼓勵市民喺市區及郊區利用單車代步,以推動低碳運輸。但達到環保嘅同時,卻可能會衍生另外嘅問題,特別係可能引起更多嘅單車意外,今日嘅議案可能低估咗問題嘅嚴重性。

 

3)事實上,幾日前,喺沙田區就發生兩宗嚴重嘅單車意外,有兩位踩單車人士身受重傷。我哋睇下一啲數據,就知道單車意外有幾嚴重,根據政府數字,過去6年,全港有66人因單車意外而死亡,受傷人數亦高達1萬4千人。同一時期,喺全港嘅交通意外中,有734名市民死亡,有9萬5千人受傷。對比之下,就充份凸顯單車意外嘅嚴重性,平均每年有高達11人死亡,實在令人震驚。

 

4)從另一個角度比較,2015年嘅數字,涉及電單車嘅意外有2328宗,但涉及單車嘅意外就有2685宗,即係單車意外比電單車仲要多。必須注意,呢啲單車意外已經係嚴重到要醫院求醫嘅個案,一啲輕微個案由於無報警,根本無法統計。

 

5)一般人都相信,踩單車係安全嘅活動,可能無想過會有咁多傷亡意外。不過,如果沒有足夠嘅安全意識及熟練嘅技術,即使喺單車徑上踩,都可以有好大嘅危險性,過去都發生過唔少高速落斜而失控嘅意外。所以,我認為,無論政府會唔會推動單車友善政策,都必須大力推動安全教育,灌輸市民踩單車嘅安全知識。

 

6)政府其實早已表明立場,基於安全考慮,不鼓勵市民喺市區以單車作為交通工具。不過,相對於市區,密度較低嘅新界新市鎮,則有條件以單車作為短途代步之用。同時,政府又強調,任何鼓勵市民以單車代步嘅措施,必須兼顧香港地少人多、發展已經非常密集嘅情況,並且以安全為首要嘅考慮。

 

7)有人會認為,政府嘅立場過於保守,但以安全為首要考慮,其實係無可厚非,而且本港市區路面嘅情況,的確同好多大城市唔同,香港市中心人多車多、路面窄、行車車速快、大型車輛多,好多外國人都唔敢喺香港揸私家車,踩單車嘅危險性係可想而知。所以,平衡過各方面嘅利弊,我認為,可以考慮畀單車使用一啲非繁忙嘅市區道路,但必須要做好安全嘅配套工作,例如設立專用行車線,但不應鼓勵單車使用繁忙嘅道路。

 

8)正如之前所講,單車友善政策除咗推動使用單車外,仲應該包括推動安全意識。現行法例並無規定單車人士必須佩戴頭盔,有唔少嚴重傷亡事件,就係因為踩單車者無戴頭盔所致,所以政府第一件要做嘅事,就係立法規定必須佩戴頭盔。另外,同樣使用道路,汽車司機要考牌,踩單車者就算唔駛考牌,都應該上一啲課程,學習下點樣應對路面情況及交通規則,甚至學習一啲控制單車嘅技巧,有唔少意外就係因為踩單車者唔熟識路面情況,或者操控技術欠佳所致。所以,我希望政府能夠為踩單車人士開辦駕駛訓練班,甚至硬性要喺馬路上踩單車人士去上堂。

 

9)另外,議案中建議,容許單車喺安全嘅情況下,可以喺指定嘅寬闊行人路上行走。我認為,呢個建議好有問題,因為踩單車隨時都會有失控情況,同時亦有唔少人習慣踩得好快,對於路上嘅行人,特別係對兒童及老人,會構成一定嘅風險。而且,執行上亦困難,本港寬闊嘅行人路根本唔多,而邊一條路行得或唔行得,亦容易混淆,最後只會變相鼓勵單車條條行人路都照行。

 

我謹此陳辭

社交分享