主席:
1)我好高興見到草案今日恢復二讀，多年來我一直跟進增加公共小巴座位嘅問題，有關建議終於有機會落實，實在值得高興。
2)好多朋友都知道，我係港島一個大型屋苑嘅業主委員會主席，服務社區已經有一段時間，處理過唔少地區問題，當中包括喺繁忙時段輪候小巴時間長嘅問題。幾年前，我就收到唔少居民嘅反映，指由於區內乘客量不斷上升，專線小巴喺繁忙時段往往要大排長龍，乘客要等更長嘅時間，而小巴站因為人太多，對路經嘅市民亦構成不便。我哋曾經約見專線小巴營運商，反映居民嘅意見，要求喺繁忙時段加密班次，營運商雖然承諾改善服務，但亦表明經營嘅種種困難，包括經營成本上升、請唔到足夠司機及法例規限等等，營運商即使有心，亦無能力大幅增加班次。
3)之後，我同業界人士商討，知道現時新型小巴可以容納到多達20個座位，業界一直希望可以放寬目前16個座位嘅限制，從而釋放出更大嘅承載量。其實，對比之下，增加班次唔係一個好方法，因為會令路面進一步擠塞，污染問題亦會加劇，甚至可能令到營運成本上升而導致加價。所以，業界提出增加座位嘅建議，絕對係一個好方法，我更加相信係一個5贏方案，政府無理由唔做，於是我去幫手游說政府，除咗向運輸部門反映，更曾直接向特首提出，政府亦答應會認真考慮。
4)目前全港共有4350部公共小巴，按目前嘅建議，每部小巴增加3個座位，如果全部加位，即等如即時增加咗13050個座位，相等如815部16座小巴嘅載客量，但實際並無增加到小巴嘅數目。所以，我認為係5贏方案，即係各方面都贏，第1係市民贏，按目前嘅建議，增加座位至19個，承載量即時增加約20%，有助解決繁忙時間等候時間過長嘅問題，而且小巴收入增加，亦可以紓緩加價壓力。第2係政府贏，政府喺無動用公帑嘅情況下，用最環保嘅方式，去解決交通嘅壓力問題，亦都有效減低市民等候嘅時間。第3係小巴司機贏，營運商收入增加，車主都承諾改善司機嘅薪酬福利，解決目前因薪酬低而請唔到足夠司機嘅問題。第4係業界贏，業界長期都面對經營困難嘅情況，甚至有部份路線因為長期虧損而面臨停辦命運，而家收入增加，就可望解決到經營困難嘅問題。第5係環境贏，喺不加小巴數量下，用最環保嘅方法即時增加20%承載量，變相減低咗環境污染嘅情況。另一方面，有人擔心小巴加位後，會搶走其他交通工具嘅乘客，以繁忙時間計，港鐵同巴士其實都極為擠迫，有人滿之患，而且服務質素有下降跡象，小巴增加座位應該唔會對其他交通工具帶來重大影響。
5)政府提交嘅條例草案，建議將公共小巴座位增加至19個，有議員認為應該進一步增加到20個，雖然最終未有提出修正，但係值得日後繼續研究。如果加位後無出現運作上嘅問題，而客量又不斷上升，應該考慮進一步加位，雖然每部小巴只能再加一個位，但全港就可以加到4350個位，即等如加咗271部16座嘅小巴，對於紓緩交通壓力，會有一定幫助。
6)最後，我要感謝政府能夠從善如流，聽取業界嘅建議，而提出嘅條例草案又能夠平衡到各方嘅利益，希望草案能夠順利通過，政府能夠盡快落實加位嘅建議。
我謹此陳辭
