主席:
1)科技發展一日千里，未來十年創新科技嘅發展，特別係人工智能方面，將會為人類嘅經濟及生活帶來翻天覆地嘅，變化情況一如工業革命一樣，為世界釋放出龐大嘅生產力。所以，我哋見到世界各地，包括日本、南韓、台灣、新加坡及內地，都努力開拓創新科技，佢哋唔單止搞創新科技，仲努力以新科技去推動再工業化。相比之下，香港起步遲發展慢，實在遠遠落後於國際大形勢。
2)本港經濟產業結構嚴重傾斜，極度依賴金融、專業服務等支柱產業，無乜新興產業搞得成功，香港其實係食緊老本，所以年青人無上進嘅機會，呢個就係社會充斥怨氣嘅主要原因。而且，當世界經濟真係出現大革新，我哋仲可唔可以靠食老本維生，實在大成疑問，所以為咗香港長遠嘅發展，推動創新科技發展實在刻不容緩。
3)我哋2015年喺財委會通過成立創新及科技局，作為財委會主席，係我第一個剪布嘅項目，但我成日諗，如果立法會喺2012年，當政府初次提出成立科技及通訊局時，就獲得通過，而家香港嘅創科環境會係點? 反對派係又拉唔係又拉，佢哋對香港做成嘅傷害，係要比較長時間先會睇倒。我哋浪費咗幾年時間，而家只能盼望新一屆政府能夠放手大展拳腳，急起直追。
4)我相信局長已經有周詳嘅計劃，但要落實呢啲計劃，我哋必須要營造一個良好嘅環境，包括要改變過時嘅法例，亦必須同時要改變過時嘅心態。過去，政府奉行極積不干預政策，或者後期嘅大市場小政府政策，即係政府只會創造有利營商環境，而唔會主動帶領產業發展，更加唔肯主動去招商，結果變成好被動。呢啲做法已經過時，我哋睇下競爭對手，好似新加坡政府好多時都係主動出擊，去爭取世界各地嘅公司去投資，所以新加坡吸引投資嘅工作，做得好成功。
5)我希望新一屆政府能夠不再守株待兔，財政司司長同創新及科技局長能夠放膽去做，主動去招攬跨國嘅創科企業來港投資，推動本港創科產業發展。事實上，國內近年有唔少科技企業發展得相當成功，部份已經馳名國際，當中有手機公司、手機零件公司、手遊公司、電子商貿等等，有唔少更加已嚟咗本港上市，同本港已經有好強嘅聯繫，如果我哋能夠推出優惠政策，或者更加貼身嘅支援服務，或者可以吸引到佢哋來港投資，長久下去，或者可以為香港嘅創科產業打開一片新天地，甚至帶動本港再工業化嘅發展。
6)大家要知道，創科產業一定為本港青年人帶來新機遇，據傳媒報導，內地一間馳名國際嘅手機公司，共有17萬名員工，前年人均年薪達80萬人民幣，當中估計有1萬名員工年薪達100萬以上，如果報導屬實，情況實在驚人。所以，我認為，我哋係值得用優惠嘅政策，去爭取國內創科企業來港投資，提升香港嘅競爭力，為青年人開拓更廣闊嘅前路。
7)原議案另一項重點，係改變過時法例，即係為發展創新科技「拆牆鬆綁」。近年，由於互聯網科技日趨成熟，共享經濟嘅商業模式日漸盛行，對消費者的確帶來方便及好處，但對於同一行業原有嘅經營者或者會帶來好大嘅衝擊，特別係呢啲經營者曾長時間投資於有關行業，正如姚思榮議員喺上月曾經提出過質詢，指出有人透過共享經濟平台經營無牌賓館，呢啲行為對酒店業造成不公平競爭。
8)我認為，發展創新科技的確好重要，有需要時可以為發展而「拆牆鬆綁」，但大前提係必須喺合法及合理嘅情況下進行，而且要平衡到各持份者嘅利益，亦唔可以違背合約精神。如果要改變法例，容許以共享經濟平台去經營一啲原本需要發牌規管嘅行業，例如酒店業及的士業，結果守法嘅營運者就要面對不公平嘅競爭情況，經營就會好困難，而無牌經營者唔根本係「無王管」，對消費者毫無保障。
9)最後，我希望政府能夠投入更多資源，去發展金融科技，因為金融業始終係香港嘅老本行，目前國際金融業正逐步走向科技化嘅發展，我哋必須急起直追，以保持國際金融中心嘅地位。同時，政府應該要有全盤嘅計劃，因為科技化嘅發展一定導致人手需求減少，所以發展金融科技之同時，必須考慮到如何協助過剩嘅人手，唔能夠令佢哋成為發展金融科技下嘅犧牲者。
我謹此陳辭
