就「施政報告致謝議案」發言

主席:

1)今次施政報告全面審視各項重要嘅政策範疇,並且積極跟進各項問題,新一屆政府就任只有短短幾個月,就做咗咁多工作,反映政府係有魄力、有心全面搞好香港。我衷心希望呢啲有利香港嘅政策,最後能夠一一落實。

2)首先,我想講下經濟嘅問題。過去多年,我一直主張發展總部經濟,除咗可以吸引外國企業來港,搞活香港經濟,更可以為年輕人創造大量優質嘅工作機會。可惜,近年駐港外國公司或地區總部不但沒有增加,反而有下跌嘅跡象,我多次追問政府,並且在施政報告諮詢會上向特首提出,要設法挽回外資嘅信心。

3)終於,施政報告帶嚟喜訊,今年駐港外資公司嘅數目,已經止跌回升,駐港嘅外國公司回升到8200間,當中駐港嘅地區總部達1413間,比去年升幅達2.5%,亦都係近年新高。我相信係特首同政府財金官員,包括財政司司長陳茂波及佢嘅團隊,做咗大量工作,希望佢哋能夠繼續努力,為香港做出好成績。我認為,政府必須努力創造有利嘅發展環境,放棄被動式嘅招商手法,效法一啲國家,例如新加坡,主動出擊嘅做法,去爭取世界各地嘅公司來港投資。

4)另外,施政報告提到,正積極推動本港商界投入「一帶一路」嘅發展,商經局局長邱騰華近日接受訪問表示,將會建立一個統籌「一帶一路」工作嘅隊伍,為本港商界推廣「一帶一路」商機,讓商界掌握走出去嘅機遇。其實,由政府帶頭推動經貿發展,喺外國早已司空見慣,特區政府亦漸漸改變過去被動嘅做法,我希望呢個統籌隊伍,日後唔單止做推廣嘅工作,更加要走多幾步,直接為商界開拓商機,帶領商界打入當地市場。事實上,如果能夠掌握到「一帶一路」嘅機遇,香港經濟就有新嘅發展引擎,亦為青年人創造大量優質職位,所以香港應該學會主動出擊,把握我哋嘅機遇。

5)至於保險嘅問題,施政報告著墨唔算多,我希望都可以講下保險業界關注嘅問題。保險業係本港其中一項重要產業,過去幾年有唔錯嘅發展,但要令到業界持續發展,我哋必須喺大政策上做得正確,一定要與內地市場接軌,並爭取成為國際保險公司進入內地嘅橋頭堡。目前,內地有龐大嘅保險市場,本港保險公司長遠都要走入內地發展,但現時境外保險公司包括港資公司在內,如要在國內發展,須與內地公司合營,且持股量不能多於50%,令港資保險公司卻步。

6)我相信,政府應盡快同內地相關部門爭取,容許本港註冊嘅保險、再保險公司,或者在港設全球總部或地區總部嘅外資保險公司,可以在內地獨資經營,或者在合營公司佔多數股權。另外,本港註冊嘅保險公司在國內仍未享有國民待遇,而被視為境外公司,所以業界希望政府能夠為香港爭取,等本港保險公司同樣擁有國民待遇,即使未能得到全面嘅國民待遇,能夠享受比境外公司優厚嘅待遇,已經有很大嘅幫助。呢啲建議除咗可以為本港保險業開拓內地廣闊嘅市場,更可以吸引國際保險公司來港設地區總部,令香港有機會進一步發展為國際保險同再保險中心,而且亦會為青年人創造更多優質嘅保險業職位,正係一舉數得。

7)另外,保險業界希望,政府能夠推動中港合規要求互認。本港同內地嘅保險市場,各有一套唔同嘅合規要求,假如一間保險公司同時喺中港兩地經營,就必須按照兩套唔同嘅合規要求去做,自然會加重咗營運成本,特別係本港保監局運作後,本港保險公司將面對更多合規要求。而且,由於國內保費總額遠比香港大,外資公司要喺大中華區落戶或需要重組架構時,自然首選內地,香港難免會成為次選,長遠嚟睇,對香港保險業嘅發展相當不利。所以,業界希望政府推動兩地合規要求嘅互認機制,從而減省龐大嘅合規開支,便利公司同時在兩地經營,亦增加外資保險公司來港設地區總部嘅吸引力。

8)金融科技係國際大趨勢,保險業界亦積極參與。施政報告中指出,保監局剛於9月推出監管沙盒,保險公司可以喺科技項目推出市場前,接受沙盒嘅試行,從而得實際嘅市場數據及資訊,幫助加快推出產品及服務,業界歡迎呢項新發展。不過,我必須重申,當更多科技化嘅產品及服務推出市場,行業對人手嘅需求自然下降,難免出現職位流失嘅問題,希望政府正視呢個問題,例如提供再培訓嘅機會,唔好畀受影響嘅員工成為科技發展嘅犧牲品。

9)施政報告指出,政府計劃喺2018年落實自願醫保計劃,並會為購買嘅巿民,提供稅務扣減。保險業界希望醫保計劃可以早日落實,同時希望政府提供優厚嘅扣稅方案,以便鼓勵更多市民參加計劃。另外,我希望政府可以繼續善用保險模式,去協助解決社會老齡化問題,自願醫保計劃已經成為一個良好的先例,證明可以利用保險模式去協助解決社會問題,特別喺人口老化帶來嘅社會問題,喺外國亦早已採用。事實上,政府可用扣稅優惠嘅模式,鼓勵市民購買與社會民生有關的保險,例如年金、醫療及教育保險等等,以鼓勵市民為自己嘅將來做好準備,從而減少對公共資源嘅依賴。

10)最後,我想總結一下對施政報告嘅睇法。我一直認為,一個社會應該以家庭為核心,如果大部份家庭生活得開心愉快,社會整體就會開心愉快,所以政府施政亦應該以家庭為核心。今次施政報告有好多項建議,都係圍繞家庭為出發點,包括有改善產假福利、優化在職家庭津貼及長者生活津貼、成立兒童事務委員會、為不常見疾病提供更多援助、增加過渡性住屋供應、推出公共交通費用補貼計劃等等。我認為,呢啲計劃可以紓緩唔同家庭成員嘅生活壓力,係針對社會現有弊病而制定,如果家庭中各個成員面對嘅壓力都可以減輕,家庭整體嘅壓力就會減輕,社會嘅怨氣自然會減輕,所以政府嘅方向絕對正確,亦反映政府係有心搞好香港。

11)我唯一覺得失望,就係新一屆政府無將「工作與生活平衡」列入為施政方針中。本港生活壓力大,青年人缺乏上游機會,社會累積不少怨氣,面對咁嘅情況,政府可以效法歐美國家嘅做法,推行「工作與生活平衡」措施,協助市民喺工作之外,能夠享受生活及珍惜家庭,以提升生活嘅滿意度,具體措施可以由政府帶頭推動,包括: 彈性上班、特別事假、在家工作、培養生活興趣等等。可惜,政府並無採用,我相信,我哋除咗要努力發展經濟,「工作與生活平衡」措施一樣重要,雙線進行,才可化解社會嘅怨氣。

我謹此陳詞

社交分享