就推動電動車普及化議案發言

主席:
1)政府推動電動車發展已經用咗一段幾長嘅時間,大約喺2009年起,政府開始大力鼓勵市民使用電動車,並且推出唔少措施,當時立法會都熱烈討論過呢個問題。好可惜,時至今日,本港仍只有一萬一千架電動車,佔全港車輛總數1.3%,實在令人失望。
2)電動車發展得唔理想,係因為有唔少問題仍然未能妥善解決,特別係充電設施嘅問題。目前,新建大廈已規定停車場車位要裝有充電設施,才可獲全數豁免計入總樓面面積,過去7年已經批出4萬個有充電設施嘅車位。當然,如果好似原議案嘅建議,修改法例強制所有新大廈車位必須要有充電設施,可能會更直接有效。事實上,而家最困擾嘅問題,係舊大廈如果要加裝充電設施,會遇到好多法律、資金及技術嘅困難,令到唔少大廈想做都做唔到。
3)我係港島區一個大型屋苑嘅業委會主席,我哋屋苑有3000個車位,為咗安裝充電設施嘅問題而困擾多時,單單係研究可行性方案就用咗兩年時間,包括研究私人車位使用公用供電設施而衍生出嘅收費及法律問題,過程都相當繁複,我可以喺度同大家分享下。喺兩、三年前,由於有唔少住戶提出要安裝車位充電設施,業委會於是開始研究,原本以為會好簡單,但了解後先至發現,大廈原有嘅供電容量有限,如果不提昇供電容量,每個停車場只能夠安裝20多個充電設施,根本唔能夠滿足需求。如果要增設更多充電設施,就必須要提昇整體嘅供電設施。
4)要加設供電設施亦並不簡單,我哋屋苑共有4期多層住宅,每期嘅工程費用高達百多萬,工程完成後再要拉線安裝充電設施。基於用者自付嘅原則,安裝充電設施嘅業主將要支付一筆幾萬元嘅費用,另外又要考慮到法律及技術上嘅問題,令到有關工作要一拖再拖。幸好,最近有電力公司提供充電嘅顧問服務,提出咗新方案,由車位嘅業主直接同顧問公司申請,再由顧問公司負責所需嘅工程,業主自己負責自己嘅費用,業委會就只負責監察,唔駛直接介入,避免咗好多問題。
5)事實上,我哋係比較大型嘅屋苑,業主都願意自付安裝費用,業委會同管理公司辦事都好有魄力,但我哋都要花咗大量時間同精力,先後多次同電力公司及顧問公司開會,討論過不同嘅方案,先至成功引入充電設施。如果一啲較細、比較老化嘅屋苑,或者大廈法團唔願意處理,相信要引入充電設施,一定會更加困難。所以,我認為,政府要將電動車普及化,應先協助大廈解決安裝充電設施嘅問題,提供更多協助,甚至直接提供經濟誘因,務求加快現有大廈安裝充電設施嘅進度。我相信,解決到呢個問題,電動車先至可以真正做到普及化。
6)另一方面,我哋推動電動車普及化,難免會衍生出一啲問題,政府應及早提出應付嘅方法,以免產生新嘅社會問題。最基本就係處理廢棄電池嘅問題,由於電動車嘅電池使用幾年後就需要更換,普及化之後,無可避免會出現大量被更換嘅廢棄電池,呢啲電池有嚴重嘅毒性,會危害環境,但政府至今仍未有處理的政策,所以政府要落實普及化政策,必須提出電池回收及處理政策,例如要求生產商提出一套完善嘅回收方案。
7)另一個問題,就係舊車廢棄嘅問題。電動車如果成功普及化,可能喺幾年之內會有大量車主轉用電動車,即可能有大量用燃油嘅舊車被換走,呢啲舊車無論流入二手市場,或者被廢棄,都可能出現好多問題,政府必須事先評估好情況,並提出解決嘅方案。我哋必須要做好配套嘅政策,否則即使電動車普及化得到成功,但香港嘅環境就難免成為受害者。
謹此陳詞

社交分享