就2018年撥款條例草案發言

1)多謝主席畀議員喺呢個環節,可以整體評論財政預算案。

2)預算案有兩項主要功能,第一,係推動經濟發展,從而為社會創造財富及創造就業。第二,就係利用公共收入,公平地去解決社會各項民生問題。我認為,今年喺呢兩項功能上,司長同佢嘅團隊都落足心機。

3)今年財政盈餘係歷史上嘅新高,水浸庫房原本係一件好件,但錢多都有煩惱,社會嘅焦點完全集中喺「是否全民派錢」嘅問題上,引發起激烈嘅爭論同怨氣。結果,今年財政預算案為本港經濟嘅建設規劃,為社會民生投入鉅額嘅資源,就無人講。

4)其實,大家應該留意,今年嘅經常開支大幅增加至4065億,比舊年增加咗11.8%,係20年來最大嘅增幅,亦遠高於過去7年每年介乎6至8%嘅增幅,當中福利開支嘅增幅達21%,增加到798億元,衛生開支亦達13.4%,增加到712億元,教育開支增幅達5.6%,增加到846億元。單單呢三大項目,已經等於政府經常開支6成。

5)今年千多億嘅盈餘中,有800多億係用於社會有需要嘅層面上,包括用200億改善文化設施,用200億設立創科平台及注資科技園,預留150億用於強積金對沖方案,注資85億入持續進修基金。另外,預算案用咗524億喺「共享成果」,

包括退稅、額外發放兩個月綜援等等。

6)講到派糖,自從金融風暴之後,為咗紓解民困,歷年預算案都會提出一啲紓困措施,即使經濟好轉,紓困措施亦已成每年必做嘅例行公事,過去都有唔少人質疑點解經濟好仲要繼續派糖。今年,預算案諮詢時,要求全民派錢嘅聲音只係佔小部份,但預算案撞正立法會補選,派糖問題自然成為選舉議題,變成火上加油。幸好政府立即從善如流,提出「補漏拾遺」嘅「關愛共享計劃」,即使收錢時間及行政費問題受到關注,但不滿情緒大致平息。我個人贊成退稅還差餉畀交稅最多但又無乜福利嘅中產,亦唔反對派錢,但反對全民派錢,派錢應只限派畀基層或低收入人士,社會資源應集中用喺有需要人士身上。

7)除咗派糖呢部份外,我認為預算案值得畀高分,係有充份嘅理由。我相信,香港社會有兩個長遠重大嘅挑戰,要及早解決。第一,就係香港競爭力減退,第二,係人口老化帶嚟嘅衝擊。我認為,今次喺有鉅額盈餘下,預算案能改變過去以守財為主嘅理財原則,對呢啲範疇提出鉅額嘅撥款,做法有魄力,值得支持。

8)立法會議員近日去咗大灣區參觀,議員親身體會過鄰近城市嘅發展潛力,相信大家都有同感,香港整體競爭力早已不進則退。香港經濟一直高度依賴金融地產及其相關嘅產業,其他產業就一落千丈,但現今已經係創科嘅年代,無論生活及經濟活動都大量應用創新科技,香港如果唔急起直追,好快就落後於新世代。今年預算案投入龐大嘅資源,以推動創科發展,包括用200億發展河套創科園、注

資100億入創科基金、預留100億元支持兩個創科平台、撥款100億給香港科技園公司,合共500億元。今次係創科局成立以來,最大筆嘅撥款,但過去兩個月,社會甚少討論呢500億元嘅鉅額款項,對香港發展嘅影響,實在可惜。我希望,日後獲得撥款嘅機構,好好利用今次嘅款項,為香港做出成績,特別喺金融科技呢個範疇上,我哋要鞏固國際金融及商業中心嘅地位,金融科技嘅發展實在不容有失。

9)要提高整體社會嘅競爭力,教育係首要嘅工作。今年用於教育嘅開支達到1,137億元,比上一年度嘅增幅高達28%,增幅亦係近年少見。當中,增撥20億經常性開支、用25億為大學提供配對補助、用25億成立學生活動支援基金、注資85億入持續進修基金等等。香港嘅教育制度的確存在唔少問題,而家趁庫房水浸嘅時候,係值得我哋投入更多嘅資源。

10)另一個重大挑戰,就係人口老化對醫療及福利體系嘅衝擊,但社會嘅準備工作就嚴重不足,特別係醫療體系,改革實在急不容緩。今次預算案積極回應社會訴求,要求醫管局提早3年籌備第2個10年醫院發展計劃,提早從長遠嘅角度去解決問題,但計劃十分龐大,需要先預留3,000億元撥款,如果無鉅額盈餘做後盾,根本亦唔能夠付諸實行。另外,預算案增加60億撥款畀醫管局,用9.4億將大腸癌篩查計劃恒常化,用5億元促進中醫藥發展等等。呢啲措施都反映出,政府係認真想去搞好醫療問題,但好多時唔係話我哋有錢就可以解決到問題,特別

係醫護人手短缺嘅問題,就算而家加緊培訓,亦未必能夠滿足社會嘅需求,我相信而家係時候深入研究,點樣解決醫護人手不足嘅問題。

11)至於福利問題,預算案都有好大嘅投入,喺非經常開支上,用10億成立樂齡及康復創科應用基金,用超過4億延長短期食物援助等等。喺經常開支上,用3億增加福利嘅前線人員薪酬,額外用1.6億加強院舍嘅服務質素,同時又加強照顧認知障礙症嘅長者,及為安老院舍提供醫生到診等等。呢啲措施落實後,一定有助紓解人口老化對社福帶嚟嘅壓力。

12)最後,我要講下保險業關注嘅問題。香港保險業一直為本港經濟作出重大嘅貢獻,但政府對保險業嘅政策,比亞洲主要競爭對手新加坡起碼落後十年,好多國際性保險機構都被新加坡嘅條件所吸引,將地區總部設在新加坡,甚至有原本總部設於香港,後來都搬咗去新加坡,結果令本港保險業發展長期停滯不前。今次預算案,司長邀請保險業監管局聯同業界研究,如何提升香港作為保險業樞紐嘅競爭力,包括稅務安排和其他監管要求,我希望今次係重振本港保險業樞紐地位嘅轉捩點。我認為,為來港設地區總部嘅國際保險機構提供稅務誘因,係最簡單直接嘅方法,同時為業界拆牆鬆綁,放寬不必要嘅過份監管,及加快審批保險產品嘅速度,都可以增強業界嘅競爭力。

13)另外,預算案亦都接納咗業界嘅意見,用扣稅優惠嘅模式,去鼓勵市民為自己嘅將來做好準備,包括畀市場上所有符合規定嘅延期年金產品供款、及強積金自

願供款享有扣稅優惠。我相信,保險能協助政府處理社會老年化嘅問題,自願醫保計劃係良好嘅先例,而今次預算亦正式提出為醫保計劃提供8,000元免稅額,業界表示歡迎,但希望政策落實後,政府應按實際情況而作出調整。

14)大灣區的發展將會成為香港未來新動力,保險業界亦希望能進入區內發展,業界希望政府能向中央爭取,容許在港註冊嘅公司可以在大灣區擁有國民待遇,降低進入門檻,成立全資嘅保險公司。另外,香港保險業聯會亦提出咗「大灣區醫保通」計劃,建議容許香港或區內嘅保險公司,喺大灣區內透過互聯網向區內居民銷售合規嘅醫療及危疾保險,呢個計劃可以由有公信力嘅機構,例如香港保險業聯會,成立電子平台,供區內居民選擇合適嘅保險產品,而交易係透過電子平台處理,能夠妥善處理資金跨境流動嘅問題,而且產品亦受到香港法例嘅保障。呢個計劃嘅好處,就係加強大灣區內嘅商業互動,同時區內居民喺1.5小時生活圈內安心工作,唔需要擔心醫療保障嘅問題。保險業界相信,呢個計劃能夠配合國家嘅發展策略,亦可以惠及區內嘅居民,更有助推動業界發展,係一個多贏嘅方案。

謹此陳詞

社交分享