就共建粵港澳大灣區議案發言

主席:

1)立法會議員早前去咗大灣區考察,其實大家早已聽聞內地創技發展一日千里,而家親眼見到感受都好深!今次考察所見所聞,如果講尖端科技,有東莞嘅「散裂中子源」項目,講金融科技有深圳嘅微眾銀行,講民生科技有深圳嘅智能交通指揮中心。我相信大家參觀後都會同意,香港必須急起直追。

2)我相信,粵港澳大灣區將會成為香港發展嘅新引擎,成為本港嘅新出路。事實上,香港經濟嚴重傾斜於金融及地產業,表面上香港仍然好風光,但本地市場日益狹窄,實際係一直食緊老本,競爭力不進則退,最近,香港已經失去競爭力榜首嘅地位,被美國超越,正好為我哋敲響警鐘。面對被嚴重扭曲嘅經濟結構,香港社會承擔著唔少惡果,特別係青年人無上游機會嘅問題,要解決呢啲問題,我哋一定要為港開拓更廣闊嘅前路,而大灣區嘅發展勢必成為香港未來經濟增長嘅重要動力。

3)另一方面,喺互聯網嘅時代,市場已經無地域限制,我哋銷售及服務對象已經唔再局限於本地,而係可以放大到大灣區嘅城市,令到香港嘅商機可以幾何級數咁上升,發展潛力十分鉅大。同時,港珠澳大橋及高鐵相繼落成,建構成1.5小時生活圈,香港無論喺市場上、或生活上,已經可以放眼大灣區各個城市,我哋唔可以再畫地為牢,必須盡快投入大灣區嘅發展中,如果我哋繼續將呢一切視而不見,繼續只係依靠規模有限嘅本地市場,香港難免會陷入邊緣化嘅危機。

4)事實上,香港係國際金融同商業中心,有大量專業人才,可以為大灣區各城市提供金融及商業服務,包括協助區內創科企業融資或進軍海外,令本港金融業能夠進一步做大做強,我哋亦可以透過區內創科企業嘅協助,發展我哋嘅金融科技,以鞏固國際金融中心嘅地位。另外,香港科技人才缺乏,但廣州大學城有30萬大專學生,各類人才齊備,肯定能有助推動本港發展創科產業,將科研成果轉化成產品,為本港年青人製造更多創科職位。

5)目前,中央即將公布粵港澳大灣區發展規劃,我哋正期待中央推出措施,為本港企業及專業人士拆牆鬆綁,協助佢哋進入大灣區發展,同時為香港市民提供便利措施,協助港人到大灣區生活、升學、就業及創業。我相信特區政府已經做好準備,亦有好多企業磨拳擦掌,準備大展拳腳,但有一點我相信值得大家注意,大灣區會發展會加增區內市民交流機會,本港有唔少市民,特別係青年人由於過去較少機會到國內,可能對內地嘅生活文化唔習慣,或者有啲誤解,甚至被人誤導,可能會有抗拒嘅心態,政府實在需要多做功夫,做多啲解釋及宣傳嘅工作,但我相信,當佢哋有機會去到大灣區,了解當地嘅發展情況,就會知道大灣區機遇處處,真係海闊天空,自然消除好多不必要嘅誤解。

6)最後,我想講吓保險業界對大灣區嘅期望。保險業界亦希望能進入區內發展,業界希望政府能向中央爭取,容許在港註冊嘅公司可以在大灣區擁有國民待遇,降低進入門檻,成立全資嘅保險公司,可以在大灣區內開業。如果建議得到落實,本港嘅保險業將會有鉅大嘅發展空間。

7)另外,香港保險業聯會亦提出咗「大灣區醫保通」計劃,建議容許香港或區內嘅保險公司,喺大灣區內透過互聯網向區內居民銷售合規嘅醫療及危疾保險,呢個計劃可以由香港保險業聯會成立電子平台,供區內居民選擇合適嘅保險產品。保險公司更加可以同區內優質醫院結成聯盟,為投保者提供一站式醫療服務。計劃建議,先以香港市場單向試行,當平台運作成熟後,再擴大至雙向運作,屆時亦可以將醫保通推展到大灣區以外嘅地區,特別係較偏遠嘅城鄉,等更多居民受惠。

8)呢個計劃嘅好處,係交易透過電子平台處理,能夠妥善處理資金跨境流動嘅問題,無須擔心有人利用保險嚟走資,產品亦受到香港法例嘅保障。而且,醫保通係採用電子平台,大部份嘅手續程序,包括投保、申報、索償、理賠、交保費等,都可以網上辦理,有助推動本港保險科技嘅發展。保險業界相信,呢個計劃能夠配合國家嘅發展策略,亦可以惠及區內嘅居民,更有助推動業界發展,係一個多贏嘅方案。

社交分享