就跨境安老議案發言

主席:

1)香港正面對人口老化嘅問題,好多5060年代出生嘅市民,將陸續步入退休年齡,本港有需要為人口老化而做好準備。相對要喺香港起更多嘅院舍,無論喺土地需求、人員嘅供應,家居安老當然係一個更好嘅選擇,亦應該係政府投放更多資源嘅方向。但本港樓價高昂,而且生活指數高,要喺本港安享晚年,對中產嚟講,已經負擔實在唔輕,對於貧窮嘅基層市民,即使有政府援助,生活亦唔容易過,我哋成日聽到話獨居老人嘅苦況,就算入到安老院舍,但唔少院舍環境欠佳,早已為社會詬病。

2)所以,如果國內能提供更好嘅環境、更多嘅人手、更好嘅專業服務,就一定有人樂於選擇回鄉養老,特別係有唔少早年由內地來港、而家同鄉下仍然保持聯繫嘅人,呢批人相信為數唔少,面對呢啲選擇,佢哋一定選擇回鄉。

3)事實上,過去已經有唔少人回鄉養老,政府已經推出咗一啲措施,協助市民跨境安老,包括廣東計劃、褔建計劃、廣東院舍試驗計劃、綜援長者養老計劃。呢啲推出之後,協助咗部份長者到內地安老,目前有近兩萬名長者參加咗呢啲計劃,返到內地安老。

4)不過,現實上跨境安老有唔少困難,令到大部份長者却步,有分析指出,長者主要擔心兩個問題,第一係路途遙遠,長者由內地回港,一般都需要23個鐘頭,長者如果要回港覆診就好唔方便,而且子女嚟探望都唔方便。第二係醫療問題,長者難免會多病痛,但佢哋無內地嘅醫療保險,除咗定期嘅覆診,如果有病都要返香港醫,到時就會好麻煩。所以,要協助長者跨境安老,就先要處理好呢兩個問題。

5)我哋正在推動大灣區嘅發展,港珠澳大橋及高鐵都即將通車,往返內地會慳返唔少時間,減低咗長者對路途遙遠嘅困擾,正好為長者跨境安老,創造有利條件。因此,對長者最大嘅困擾仍然係醫療問題,今日原議案及部份修正案提出多項有關醫療嘅建議,包括將醫療劵嘅應用範圍擴大到內地主要醫院及診所、容許將長者嘅病歷轉介到內地醫院、及為長者買內地城鎮居民基本醫療保險等等,呢啲建議都值得我哋考慮。基本上,目前醫療劵已經可以喺港大深圳醫院使用,事實證明呢個模式可行,政府應考慮擴大到喺內地大型醫療機構使用,相信政府稍後會同內地傾大灣區嘅具體合作安排,希望都可以傾下喺內地使用醫療券嘅問題。

6)另外,由於申領長者生活津貼嘅市民,有每年居港日期嘅限制,呢批約40多萬嘅長者基本上難以跨境安老。我認為,政府應考慮放寬限制,參考廣東計劃,畀申領人移居內地,由於佢哋得到津貼比廣東計劃為高,應可以應付到內地退休嘅生活,如果能夠配合好醫療配套,相信會有更多長者願意回鄉安老。

7)除咗基層市民外,其實有唔少中產長者都有興趣跨境安老,希望可以用較平嘅價錢享受到優質嘅服務同環境。事實上,內地近年喺外國引入咗一啲較高質素嘅安老院舍,服務、環境及設施都比較好,而且有基本嘅醫護服務配套,對中產長者有一定嘅吸引力,但中產長者無政府資助,要入住呢啲優質嘅安老院舍,可能會擔心長遠會構成財政壓力。其實,我過去多次向政府建議,可以善用保險嘅模式,協助解決老齡化問題,而家亦有唔少好嘅先例,包括自願醫保計劃、強積金及年金計劃等,所以,對於跨境安老嘅問題,或者都可以用保險模式,去協助中產長者解決問題。

8)近期,保險業界研究緊大灣區嘅發展前景,我收到一份業界提出嘅建議書,建議鼓勵業界發展跨境安老嘅保險產品,為長者回內地養老創造便利條件,同時又建議同兩地政府傾,去鼓勵保險公司參與大灣區安老設施嘅投資,發展一啲高質素安老院舍,供投保安老保險產品嘅中產長者入住。呢啲都係初步建議,係咪可行仍需進一步研究,而我就覺得好有建設性,可以創造多贏嘅局面,包括發展出一套中產長者跨境安老嘅新模式,又可以協助社會解決老年化問題,同時為保險業開拓新路向,更為大灣區發展出良好嘅合作模式。我已建議香港保險業聯會深入探討可行性,如果有具體嘅建議,就會搵保監局作出深入嘅研究。

謹此陳詞

社交分享