主席:
1)香港大約喺20年前成功開發出電子收費系統「八達通」，成為世界最早及最成功嘅電子貨幣，日後更成為好多國家仿傚嘅對象，香港當時一度被譽係智慧城市嘅先驅。好可惜，自此之後，對於推動智慧城市嘅發展，香港再無寸進，唔單止被新加坡迎頭趕上，而家連內地嘅大城市，包括深圳、上海等，都遠遠比香港好。香港作為國際大都會，同而家智慧城市嘅建設程度，實在不相配！
2)所謂嘅智慧城巿，其實係指利用先進科技，去提高城巿運作及管理效率，從而改善市民生活質素，及增強經濟競爭力。去年底，喺創新及科技局嘅領導下，政府訂立出《香港智慧城市藍圖》，提出未來5年嘅政策措施，全力推動智慧城市嘅發展。老實講，鄰近嘅城市，例如深圳、廣州、台灣及新加坡，早已搞得有聲有色，我哋而家先至推出規劃藍圖，難免畀人認為香港行得太過慢。當然，有心唔怕遲，我哋而家要盡力落實藍圖內嘅政策措施，同時亦都要了解，點解我哋發展得咁慢，從中吸取教訓，唔好再重蹈覆轍。
3)其實，我哋起步唔係咁遲，早喺2007年，政府已開始大力推動WIFI服務嘅發展，以爭取為發展智慧城市訂下基礎，但可惜時至今日，公共WIFI服務仍然未達到國際城市應有嘅水平。政府已經投入超過4億元，喺政府場地內設立超過3000個免費嘅WiFi熱點，但審計署4月發表報告指出，近4成熱點的網速不達標，有部份甚至無法連線，有3成場地嘅使用率極低，同時覆蓋範圍亦未能達標，宣傳工作亦都欠奉，另外推動公私營合作提供WiFi服務嘅工作，亦都進展緩慢。對於一個智慧城市嚟講，公共WiFi服務係一個最基本嘅項目，但香港搞咗10年仍然做唔到基本嘅要求，反映出我哋想搞智慧城市，但係無落實嘅能力。
4)立法會4月訪問大灣區，當時都有去睇下內地智慧城市嘅建設情況，包括去咗參觀深圳市交通監控中心。指揮中心實際係全市交通動態管理神經中樞，可以睇到整個城市嘅交通情況，邊一條路塞車都睇到，亦可以見到交通巡邏員嘅分佈，仲可以知道停車場嘅實時泊位情況，中心可以統一指揮調配工作。不過，如果要喺香港設立類似嘅交通監控中心，就可能有一定嘅困難，因為監控中心會涉及好多不同部門，包括警務處、運輸署、創科署、路政署、房屋署、民政署、環保署等等，政府部門都係各自運作及各有權責，點樣可以統籌咁多部門去工作，政府應該好好考慮下呢個問題。
5)其實，創科局局長楊偉雄接受傳媒訪問時，都表示關心部門協調嘅問題。他表示，要推動智慧城市嘅發展，收集數據係好重要嘅工作，政府將會喺尖沙嘴、觀塘等地，設立400支智慧燈柱，燈柱裝有多功能感應器，可以收集天氣、人流、車流等數據。不過，楊局長指出，呢項計劃最大嘅困難，唔係錢或者技術，而係部門協調，局長話:「出咗事邊個負責，邊個負責維修，牽涉咁多部門，邊個最終拍板?」
6)《香港智慧城市藍圖》涵蓋了6大範疇，包括運輸、生活、環境、政府、經濟及人才教育，實際亦涉及政府唔同部門嘅協作，所以會由特首主持嘅創新及科技督導委員會負責督導工作，創科局將設立智慧城市辦公室，負責統籌各部門嘅工作。不過，即使有高層次嘅委員會負責監督，但具體協調由創科局屬下的一個辦公室負責，實在令人擔心呢個辦公室係咪有能力駕馭及統籌大局。
7)事實上，根據經驗，我哋嘅公務員體系雖然廉潔、高效率，但咁龐大嘅隊伍，總難免有傳統嘅門戶之見，甚至有官僚作風，如果由局長或總監去同其他部門去傾，可能要花大量時間開會，去說服唔同嘅部門，即使做到嘢，但往往都事倍功半。與其係咁，不如考慮將責任交畀政務司司長，由司長親自領導智慧城市辦公室，創科局負責支援工作，司長親自落ORDER，各級官員自然要做。正如之前所講，我哋搞公共WIFI，搞咗10年都徒勞無功，實在係一個好好嘅教訓。今日推動智慧城市發展，實在不容有失，如果改由更高級嘅官員親自指揮，成事機會一定更大。
謹此陳詞
