就研究訂立規管分間樓宇單位的條例議案發言

主席:

1)根據政府嘅數據,目前全港約有92 000個劏房,住咗21萬人,佢哋嘅居住環境十分惡劣,除咗擠迫之外,劏房嘅衛生差,消防更加係大問題,除咗間隔明顯違反消防條例外,我試過同一間電台去深水埗睇劏房,發現幾支放喺通道嘅滅火筒都係過期嘅,發生火警都唔知點算。

2)住喺劏房嘅市民,大部份都係輪候緊公屋,但係公屋輪候時間越來越長。近年興建公屋單位嘅數量仍然不足,所以估計輪候時間有可能會進一步延長。換言之,喺短中期之內,劏房無可避免會繼續存在,所以我認為,有需要作出一定程度嘅規管,特別係衛生及消防安全嘅問題,劏房火燭,真係可大可小。

3)事實上,要解決居住難嘅問題,係需要較長嘅時間,為咗要解燃眉之急,發展過渡性房屋係急不容緩。特首喺施政報告提出,容許改裝工廈為過渡性房屋,我認為係一個大膽而破格嘅建議,如果成功嘅話,可以有效紓緩基層家庭住屋嘅需要,亦可以打擊目前工廈嘅非法劏房,更可以因供應增加而令劏房租金回順,可惜立法會一直都沉迷於政治炒作,根本無時間去充份討論呢個真正可以幫到市民嘅方案。

4)根據社區組織協會嘅研究,全港有千多幢工廈,當中有124幢市區工廈適合改裝為過渡性房屋,如果每幢工廈可建150個單位,即有1.8萬個單位嘅潛在供應,可容納容超過7萬人。如果改建嘅申請獲得政府批准,只需一至兩年嘅工程時間,就可以出租,實在係「快靚正」嘅方案,相當吸引。呢個計劃對社會好有利,但如果對工廈業主無吸引力,無人做,咁就好可惜。

5)睇番政府嘅建議,政府會免收地契豁免書費用,及彈性處理規劃及樓宇設計,並會鼓勵業主同非政府機構合作,同時會由運房局轄下的專責小組提供一站式的統籌支援。呢啲建議對政府來講,可能已經算好破格,但呢啲被動式嘅推動手法,其實都係鼓勵民間自己去做,但今時今日用呢啲方法,已經好難有成績,特別係經濟誘因唔算好大,而家要工廈業主投資一大筆錢去改建工廈,申請審批亦可能困難重重,回報率未必好高,喺咁嘅情況下,點可能吸引到業主主動參加? 其實,有時我哋真係要學下新加坡政府,無論推動經濟或民生嘅計劃,甚至招商活動,政府都親自上陣,主動出擊,往往都做出好成績。

6)所以,要計劃成功,政府應該更加大膽,打破以前嘅框架,由政府或半官方機構主導,親自同業主去傾,提供貼身協助。據估計,每幢大廈改建費用由數千萬至過億元不等,如果政府可以為業主提供資助或貸款,並協助業主處理審批工作,同時將原本5年嘅地契豁免書期限增加至10年,相信一定可以爭取到更多業主參加計劃。

7)目前,政府正計劃撥出10億元,以資助過渡性房屋發展,正好可以考慮利用呢啲錢去改建工廈,但當然要要求業主訂出合理嘅租金,提供面積比劏房大、衛生及防火設施較好嘅過渡性房屋,未來數年就可能釋放出最多近兩萬個單位,而且今日議案提及嘅種種問題,亦可以得到進一步嘅緩解。我希望政府認真考慮,呢啲幫市民解決問題嘅好事,政府應該排除萬難,敢往直前。

8)主席,我哋今日討論嘅問題,只係針對短期嘅問題,長遠要解決居住難嘅問題,始終要靠大幅增加土地。近期,社會熱烈討論「明日大嶼」計劃,正所謂真理越辯越明,財經界嘅專家已經多次力證計劃切實可行,過去經驗亦證明,發展棕地農地根本寸步難行,高爾夫球場有排傾,所以「明日大嶼」計劃係解決香港居住問題嘅最有效方法,希望市民能多啲聽下各方面嘅意見,自然可以判斷到真假。同時,過去發展棕地農地無成效,其中一個原因係土地擁有者覺得奇貨可居,但當「明日大嶼」上馬,將來會有足夠土地供應,再無奇貨可居,到時發展棕地農地就會更加有把握,土地嘅中短期供應,就會更有保證。

謹此陳詞

社交分享