1) 我在2016年有參加金融機構(處理機制)條例，法例原意係針對大到不能倒嘅金融機構，當時係指一啲國際性大型金融機構，當佢地倒閉時，恐怕佢地牽連其他金融機構，令到整個金融系統出現風險。而家金管局建議連中小型金融機構都受LAC規定規限，明顯已偏離政策原意。
2) 金管局又話中小型金融機構倒閉會影響存款客戶，咁即係話而家嘅存款保障計劃並不完善，咁點解唔係去檢討同改善存款保障計劃，而用另一條根本目的不同不相關嘅計劃去遷就呢？
3) 其實，金管局喺金融風暴之後，大幅增加左銀行資本要求，風險管理要求，令經營成本增加。而家一間中型銀行分分鐘有幾百人做緊合規要求，令合規成本大幅增加，令而家銀行資本充足比率，流動現金比率大幅提高左，好多間都超過金管局要求，所以而家香港銀行非常穩健。但現時LAC嘅要求有巨大成本反而削弱左銀行營利基礎，令佢地更容易出事。
4) 金管局又話，2017年10月時，發行二級資本票據平均成本略低於4%，現時已經係2018年，全球經濟走向危機，我估計香港股市樓市將會都下跌，息口亦不斷上升緊，同2017年金管局做研究時情況差好遠，包括社會經濟環境、利率、成本等等，我覺得金管局應該重新研究實際嘅成本，以免錯判形勢，令中小型銀行承受錯判後果，成本大幅增加。
5) 我好明白點解金管局要咁做，你當然想將倒閉風險減到變零，但事實上每樣減低風險都係有成本，我最怕政府好心做壞事，法例原意係要令金融業穩定，政府唔需要在銀行倒閉時負責。但如果不合理推行，只會令銀行有不必要經營，削弱銀行實力，令銀行更容易倒閉，弄巧成拙。另外，香港要跟國際標準，但不應該採用世界上最嚴格嘅一套做法，例如美國處置機制都只應用在G- SIB(具全球系統重要性認可機構)，香港仲要加埋D-SIB(具本地系統重要性認可機構)都要做，但中小銀行不應包括在內。至於推行時間，我哋嘅競爭對手新加坡時間表都未有，我地已經話2022年開始要做，對中小銀行係好大憂慮，所以好希望政府在制定實務守則時要小心處理。金管局自己都話，佢哋有好大嘅執行彈性，希望佢哋真係可以做到，國際監管機構就係睇到世界各地有唔同嘅情況，所以要有彈性，希望香港唔好搵啲最辣嘅嚟做。
6) 金管局在聽取聽證會及委員意見後，建議將資產門檻由1500億提高至3000億元，業界表示歡迎。但金管局承諾每三年就LAC實務守則進行檢討，業界希望金管局能在檢討時一定要包括諮詢業界的程序，確保能收集真正的情況。中小銀行亦擔心會有另外一啲措施令佢更穩健，呢啲措施會唔會比LAC更辣呢？我希望政府唔會咁愚蠢嘅行為，亦希望政府承諾在會議內講到各位議員的關注，業界的關注，政府都表達會認真處理，同喺實施嗰個要求時視乎國家銀行情況，市場集資情況而調較。我希望落實你地做法。唔好為左做一件好事而令銀行受到重大傷害。
多謝主席。
