檢討假期政策

主席:

1)本港一直存有兩套假期制度,分別為法定假日及公眾假期,由於法定假日只有12日,比公眾假期少5日,勞資雙方多年嚟都為呢個問題而爭論不休。

2)根據政府嘅推算,目前大約有98萬名僱員係放法定假日,即所謂嘅勞工假,每年只有12日,另外有超過136萬名僱員係放公眾假期,每年有17日。勞工界一直爭取將假期統一為17日,不過,僱主代表就反對建議,主要係擔心會加重中小企嘅經營成本,甚至可能需要將增加嘅成本轉轉嫁給消費者,不利營商環境。由於雙方各持已見,問題一直膠著,未能解決。

3)我一直認為,勞資雙方係共榮共生,任何嘅改革都應取雙方嘅同意,單方面嘅行動只會激勞資矛盾,結果對任何人都無好處,事實亦證明,只要政府出面協調,好多具爭議嘅問題最終都可以達成協議。就目前嘅假期問題,我哋唔能夠無視僱主嘅憂慮,畢竟目前嘅局面係60年代留傳至今,即使可以解決,亦應該等社會去討論,並促使政府出手協調,我哋一直有勞顧會嘅機制,可以由勞顧會去推動,研究出一個各方面都可以接受嘅長遠方案。

4)我哋去研究長遠方案,但唔代表我哋坐喺度乜都唔做,政府其實可以做一啲短期措施,去緩和勞工生活上嘅壓力。我過去一直提倡「工作與生活平衡」(work life balance),目的係希望市民喺工作之外,能夠享受生活,以提升生活嘅滿意度,具體嘅措施可以包括彈性上班、在家工作、甚至畀員工放特別假期。我喺2017年曾向政府建議,成立一個「工作與生活平衡基金」,效法關愛基金嘅模式,由政府注資,由基金資助一啲只享有勞工假期嘅員工,去放特別假期,以減低佢哋嘅工作壓力。

5)我呢個建議好處係立即可行,勞工及福利局喺2015年公佈一項調查研究,發現全港有約98萬名僱員係放法定假日,如果以此人數計,呢98萬人如果放一日假,以2011年工資計,總成本係3.7億元,如果放5日,總成本係18.3億。所以,如果我哋推動特別假期措施,政府資助3.7億,近100萬名勞工就多一日假,要放足5日假,亦只係18.3億,當然計翻今日工資水平,粗略估計亦只係23億左右。政府用23億就可以令到100萬人或幾十萬個家庭歡樂,亦可以有助化解社會嘅怨氣,其實十分化算。如果認為5日太多,放1日或2日都得,需要嘅資源亦有限。當然,呢個只係一初步建議,具體係咪可行,我認為值得政府研究。

6)長遠解決呢個問題,仍需要勞資雙方拎出誠意嚟去解決,而政府亦應該出面協調,甚至提供部份資助,以協助中小企平穩過渡,我相信目前嘅矛盾一定可以解開。

謹此陳詞

社交分享