主席:
1)香港發展金融科技，過去起步比歐美慢，但近兩年經過各界嘅大力推動，已經有高速嘅發展，而且涵蓋範圍廣泛，包括大數據、區塊鏈、移動支付、網路安全、人工智能、程式交易等等嘅項目。目前，落戶香港嘅金融科技公司已有500間，投資嘅金額，亦遠高於我哋嘅競爭者新加坡，證明本港發展金融科技有極高潛力。
2)過去，香港發展過唔少產業，結果都係虎頭蛇尾，但發展金融科技，我就充滿信心。香港係國際金融中心，本身就有發展金融科技嘅極佳土壤，只要政府從旁協助，金融業界一定可以利用金融科技，令到本港金融業務進一步做大做強，可望成為本港經濟嘅新亮點，大幅增強我哋嘅競爭力。呢啲發展對香港係一大喜訊，但係對金融業從業員嚟講，係有隱憂。
3)金融科技嘅發展，其實代表金融業界嘅轉型，當金融科技越做越大時，業界嘅轉型亦要變得急速，屆時業界嘅運作模式亦可能有翻天覆地嘅變化，有部份工種將會減少人力需要，甚至面臨淘汰。所以，我提出嘅修正案，其中一個主要部份，就係促請政府為金融業界提供再培訓課程，等業界人士適應金融科技嘅新發展。
4)我唔係危言聳聽，近日，著名嘅人工智能專家李開復接受美國時事節目《60 Minutes》訪問時表示，未來15至20年之內，將有40%嘅工作將被人工智能取代。李開復認為，人工智能注定顛覆世界，帶來前所未有嘅經濟失衡，甚至改變全球權力格局，且不可避免會對就業造成衝擊。
5)歐美幾年前已開始發展金融科技，當地有唔少分析都認為，金融業有唔少前線工作崗位，都可能因發展金融科技而被取代，例如完善嘅網上銷售或電子貿易，可以直接同顧客提供服務，將會取代大量前線銷售人員，各金融機構提供嘅電子平台服務，包括目前發展中嘅積金易中央電子平台，亦將會取代大量文書人員，甚至目前發展中嘅電腦理財顧問，據專家嘅估計，將來亦會取代人力嘅理財顧問。將來嘅金融業，顧客直接同電腦聯繫，就可以做到大量而家需要人手提供嘅服務。當然，呢啲唔單止係金融業嘅問題，各行各業都會因為人工智能而出現工作崗位流失，呢啲係將來社會需要面對嘅問題。
6)我幾年前已經要求政府，發展金融科技之同時，要顧及金融業人員嘅工作飯碗。不過，我哋唔需要太過悲觀，前線嘅崗位雖然會流失，但因營運模式轉變，業界亦會因此而產生新嘅工作崗位，同時當哋金融業能夠越做越大，我哋將需要更多專業嘅後勤支援服務，例如保險業，當我哋發展國際保險業務，我哋會需要更多能夠處理理賠、核保及風險管理嘅專業人才，亦等如製造新職位。所以，我希望政府能夠進一步研究，未來10年金融業人力需求及工作崗位嘅變化，並且制定再培訓計劃，協助有能力嘅員工轉投其他金融業嘅新職位，至於部份未能適應新發展嘅員工，政府亦應協助佢哋轉投其他行業，唔好畀佢哋變成科技發展嘅犧牲品。
7)主席，保險業都積極開拓金融科技，各保險公司都努力引進金融科技，應用於不同嘅層面上，包括分銷、承保、理賠、客戶服務等等，目前處於起步階段，相信不久將來就會見到具體成效。此外，我都想講下保險業喺業界整體層面上嘅發展，包括一啲保護消費者嘅工作。保險業聯會近日推出「車保 e-check」計劃，就係利用區塊鏈技術核實保單真偽，過去由於有不法嘅中介公司出售虛假嘅汽車保險，令車主蒙受損受，參與「車保 e-check」計劃嘅保單將會印上特定二維碼，客戶和運輸署可通過QR Code即時確認保單嘅真偽，可以避免受騙。
8)此外，保險業聯會亦引進了「預防保險詐騙偵測系統」，以最先進嘅人工智能應用於檢測和防止欺詐上。環球嘅保險詐騙活動一直都好猖獗，據估計美國每年損失高達800億美元，香港無相關嘅數據，但估計被騙金額亦相當巨大。大家必須明白，保險公司只係保費嘅管理者，騙徒呃到嘅保險金，其實係都係投保人繳交嘅保費，最終損失嘅唔單止係保險業，投保嘅市民亦同樣遭受損失，所以必須打擊保險詐騙活動。「預防保險詐騙偵測系統」係採用先進人工智能，以協助保險公司快速處理索償和偵測詐騙活動，透過人工智能嘅演算，分析詐騙案例和索償資料，搵出可疑及異常嘅個案，以提醒相關保險公司作進一步調查，以核實索償係咪合法，及採取適當行動，首階段將涵蓋汽車、醫療和個人意外保險，稍後將擴展到人壽、旅遊等險種。目前，新加坡和法國等地都係採用同一套人工智能科技。
9)另外，保險業聯會亦正計劃推動「大灣區醫保通」計劃，透過完善嘅網上平台，協助保險公司向區內居民銷售醫療保險，但有關嘅構思要得到內地嘅批准，相信要等待合適嘅時機。我相信，到大灣區發展，將會係業界未來重要方向，而金融科技亦會成為開發大灣區市場嘅重要工具。
10)保險業界會繼續推動金融科技嘅發展，但都希望政府能夠提供協助，特別係之前提及關於保護消費者權益及推動整個行業發展嘅項目，就更加需要政府嘅協助及支援。另外，業界有不少中小企喺應用金融科技時會遇到困難，包括資源嘅問題，佢哋更加都需要政府嘅協助。所以，我希望，政府推動金融科技發展，唔單止係政策上，仲包括落手落腳去協助業界開拓及應用金融科技。
謹此陳詞
