就「活化強制性公積金」議案發言

主席:

1)社會上一直對強積金存有好多負面評價,經常有人講強積金回報低、收費高,我想趁今日嘅機會用數據同事實,同大家講吓回報率嘅問題,因為我發現有好多人只係以訛傳訛,人云亦云,講到強積金回報率好差,呢啲其實係錯誤訊息。好多人大讚外匯基金回報率高,但如果適當咁去揀MPF基金,回報比外匯基金更好,我會用數據去證明。當然,強積金都有要改善嘅地方,我過去10年一直推動減省行政費用,行政費已經下降咗唔少,但仍然需要繼續下調。

2)講返回報率嘅問題,今次議案引用嘅數字,係由2000年12月至2017年12月,強積金整體年率化回報率,注意,係扣左行政費後達到4.8%,即係平均每年有4.8%,而同期平均通脹率只係1.8%。當然,幾日前剛剛公布2018年最新嘅全年數字,大家知道2018年股市大幅下跌,整體年率化回報率下降至4.1%,但今年1月至今股市反彈,跌幅亦大幅收窄。我以下主要引用截至2018年嘅最新數字。

3)事實上,近8成強積金供款都係投資喺中高風險嘅基金,包括股票基金及混合資產基金,我哋可以睇吓回報係點:

由2000年至2018年,記住,以下講嘅回報,全部係扣晒行政費後嘅數字,

~股票基金,年率化回報率5%,即18年來平均每年有5%回報。

~恒指基金仲高,平均每年回報率達到5.5%。

~混合資產基金,平均每年回報率亦達4.3%。

~同期外匯基金投資,平均每年回報率4.3%。

~債券基金,平均每年回報率2.5%。

~保證基金,平均每年回報率1.1%

~保守基金,平均每年回報率0.7%

~同期平均通脹率只係1.8%。

4)主席,數字說明一切,強積金回報其實相當唔錯,除非你係都要揀保證基金,或者保守基金,因為呢兩隻基金平均每年只有回報1.1%同0.7%,跑輸通脹。比較之下,原來強積金同外匯基金嘅回報大致相同,外匯基金4.3%,強積金4.1%,但強積金已扣行政費,而外匯基金未扣,如果同強積金股票基金5%嘅回報比較,外匯基金更加係跑輸。

5)事實上,強積金投資回報嘅威力,係需要長時間平均累積,有時會因為投資市場波動而出現下跌,好似2018年恒指下跌4,000點,強積金回報率係-8.83%,但唔好忘記,2017年恒指升咗約8,000點,強積金回報率高達22.3%。今年頭個半月股市亦有可觀嘅回報,亦顯著地收窄咗2018嘅跌幅。所以,我哋要評價強積金,要用長遠角度睇,唔可以睇到跌市嗰年,就話強積金表現差,當然亦唔可以睇到2017年大升,就話強積金萬歲。強積金係平均投資法,要長遠嚟睇,而家經過18年,投資市場雖然有升有跌,更加經歷兩次金融風暴,但整體回報仍然好可觀。

6)強積金跑輸通脹,只會出現在回報率低嘅保證基金及保守基金,好彩市民好醒目,呢兩種基金只係佔整體強積金不足兩成。當初,設立保證基金及保守基金嘅目的,係畀臨近退休年齡嘅市民用,等佢哋退休前唔駛受市場波動嘅影響,另外畀擅長理財嘅市民,喺熊市時有一資金避風塘。事實上,有好多人都唔了解情況,甚至觀念上有錯誤,仲成日叫人選擇保證基金,梗係跑輸通脹,

7)市民如果比較後生,但唔知道點選擇,大可以選擇嘅恒指基金,過往回報可觀,而且行政費較低。我嘅修正案中,就建議推動理財教育,教導市民有效管理強積金,因為市民唔了解真實情況,或者信咗一啲錯誤嘅訊息,人云亦云,結果選擇咗唔適合嘅基金,回報率可以差天共地。同時,我都希望嗰啲對市場唔了解嘅人,唔好隨便散播錯誤觀念,亂噏當秘笈,隨時會累死人。

8)主席,強積金行政費問題,一直備受批評,過去我一直促請政府及業界,採取措施以減低行政開支,近年收費已開始下降,由07年平均2.1%,下調至而家1.52%,但我相信仍有下調嘅空間。不過,我哋要公道啲講,強積金起步時行政費較高,係有特殊嘅歷史因素,因為當初要落實法例嘅要求,強積金每月都要用人手處理大量收支及文書工作,需要配置全新電腦應用程式,投資十分龐大,而當時強積金資金池嘅規模仍然好細,行政費難免較高。不過,當供款不斷增長,而行政工作亦漸漸精簡,行政費可以下調。所以,我建議先推動無紙化,同時盡快推出積金易電子平台,大幅減省人手處理嘅程序,行政費就有更大嘅下調空間。積金局估計,電子平台只要有90%嘅使用率,未來20年就可以節省230億元,慳返嘅錢十分龐大。此外,如果市民選擇恒指基金,收費最低只係要0.71%,但回報極高,係理想嘅選擇。

9)另外,有人批評強積金唔足以應付退休開支,呢個唔單止係回報率嘅問題,更主要係因為香港嘅供款低,新加坡公積金供款最高達37%,係我哋嘅3.7倍,自然好夠用。我哋當年制定方案時,無論僱主僱員都唔願意供太多錢,所以強積金積存供款亦比較少。所以,我一直鼓勵市民作出自願性供款,亦要求政府提供稅務寬減,近期政府已採納我嘅建議,推出自願性供款扣稅計劃,但我仍希望可以增加扣稅額,由目前嘅6萬增加至10萬,以增加計劃嘅吸引力。

10)目前,強積金總供款中有超過100億係自願性供款,有咁龐大嘅資金自願投入強積金,佢哋唔係傻瓜,如果好似一啲人所講,強積金回報真係咁差,自願性供款一定走清光。另一方面,亦可以反映出,鼓勵自願性供款係一個可行嘅方法,以增大個人嘅供款額,以作退休之用。

11)謝偉俊議員建議,畀市民自行買入管理費較低嘅盈富基金,我想提下市民,要留意銀行收費,因為銀行每次買賣證券最低收費50元,每月供一次就收一次費,假如月供3,000元就要畀相等於1.6%嘅收費,供1,500元就要畀相等於3.2%嘅收費,而MPF指數基金只係收0.71%,即係自行買要畀多一倍以上嘅費用。

12)今時今日,市民對強積金有極深嘅誤解,甚至仇視,當然強積金本身有一啲問題,但更重要嘅原因係社會上充斥好多錯誤、唔公道嘅報導或訊息,令市民有好差嘅印象,但我今日講嘅都客觀嘅數據,其實積金局每年都有公佈,但冇乜人理。結果,喺咁嘅情況,好嘢冇人講,衰嘢就放大左,點可能對強積金有客觀、公正嘅評價。我都明白,基於對強積金嘅負面形象,喺今日嘅議會上,議案及修正案除非將強積金鬧到七彩、最好將行政費壓到低一低,否則都難以得到通過。我認為,我修正案係咪通過並不重要,最重要係將強積金嘅事實,特別係回報講得清楚,等到市民知悉真相,就功德無量。

謹此陳詞

社交分享