主席:
1)政府推出延期年金及強積金自願性供款扣稅計劃，目的係希望鼓勵市民透過儲蓄，以應付市民將來退休之用。目前，基層長者可享受長者生活津貼或綜援嘅保障，但中產嘅長者，由於有一定嘅資產及財政能力，佢哋享受唔到呢啲社會保障，退休只有靠強積金及個人儲蓄，如果中產人士退休計劃做得唔好，退休時就會好徬徨。
2)所以，過去我一直建議，用外國早已盛行嘅保險模式，去協助解決社會老年化嘅問題，特別照顧交稅多褔利少嘅中產人士，措施包括咗即將推出嘅自願醫保計劃，及而家我哋審議梗嘅延期年金及強積金自願性供款扣稅計劃，政府只係提供有限度經濟誘因，去鼓勵有經濟能力人士為自己未雨綢繆，從而減省中產人士將來對公共資源嘅依靠。我認為呢啲建議是一個多方共贏嘅方案，可以幫到中產市民，可以協助政府解決社會問題，可以推動延期年金市場發展，亦可以補公共年金計劃不足之處。
3)今次嘅扣稅計劃，政府其實揸得好緊，好多執行細節都管得好嚴，我係同意政府嘅做法，因為我哋要保障消費者利益，同時又防止公帑被濫用。例如，法案中要求必須披露產品嘅內部回報率，同時規定保證年金額唔能夠少於50%，呢啲規定可以增加延期年金嘅透明度，可以幫到市民選擇合適嘅項目，亦起到加強監察嘅作用。
4)此外，政府亦都從善如流，計劃嘅扣稅額上限原本每年只有36,000元，慳到嘅稅款最多只有5、6千多元，對於中產人士吸引力唔算好大，業界擔心未能推動到市民參加，未能達到計劃嘅原意，建議政府增加扣稅額到100,000元，最終經過商討後，政府同意將扣稅額增加至60,000元，慳到嘅稅款最多增加到1萬元，吸引力亦大幅增加，不但可以吸引到更多市民參加，仲有助推動延期年金市場嘅發展。當然，我都希望政府將來因應經濟環境嘅發展，增加扣稅金額，以保持延期年金嘅競爭力。
5)同時，業界希望，在產品設計上，除咗要保障消費者權益外，仲應該確保產品具有彈性，以便配合將來市場嘅發展。另外，亦曾有意見認為，政府應設立機制，容許市民一次交付所有供款，因為目前扣稅係逐年計算，如果參加者一次交付所有供款，將未能享受逐年計算嘅扣稅額。事實上，現實生活中，確實有人會一次過支付所有供款，佢哋可能係因為有一筆紅花或者獎金，想用來投保，但如果逐年供款，未用嘅款項就唔知點處理，放喺銀行利息好低，所以索性一次供款，市場確實有咁嘅現象，而一次過供款亦可以增加投資回報。所以，希望政府將來檢討時，亦都要考慮呢方面嘅問題，為一次過供款嘅人提供特別嘅扣稅方式，例如容許佢哋可以分開逐年申報。
主席，我支持今次嘅法案。
