《國歌條例草案》全體委員會審議發言 (2020.05.27)

主席:

我發言係反對4位議員提出嘅21項修正案。「國歌法」係一條好簡單法例,只有14條條文、3個附表,其實同現行嘅「國旗及國徽法」,無大分別,只係要求大家尊重國歌,但反對派反應好激烈,竟然為咗呢條法案,不惜代價去阻礙內會主席選舉,企圖拖垮立法工作,結果搞到一鑊泡,卒之要主席發出指令,撥亂反正。「國歌法」可以恢復審議,反對派仍然提出49項修訂,主席批准亦有21項。

反對派當「國歌法」係洪水猛獸,但其實係咪值得市民憂慮? 事實上,法例目的係要市民尊重國歌,根本唔會影響市民嘅生活,只要你唔係蓄意侮辱國歌,公然去挑戰「國歌法」,根本不會犯法。所以,我覺得呢21項修正案都係無必要,政府已經澄清過,只要不是公開、故意、意圖侮辱國歌,就不會觸犯法例,最重要嘅係,係唔係有罪,要經過法庭審判,大家都對法庭都有信心,所以唔係咁多人擔心。

「國歌法」經過一年嘅諮詢,另外法案委員會召開了17次會議,討論超過50小時,收集咗各界意見,亦邀請公眾人士發表意見,但依然有好多人對「國歌法」唔了解,甚至被人刻意誤導。政府已經承諾會加強宣傳工作,但政府要明白,必

須要貼地嘅方式、市民聽得明嘅說話,去解釋「國歌法」,否則一定敵唔過反對派強而有力嘅文宣工作。其實以後每項政府政策,特別係同中港有關,政府必定會面對國際級嘅文宣去抹黑,扭曲事情,唔搞亂檔都唔會收手,呢種情況係將來嘅常態,政府點樣裝備人才去應付,係政策推行成敗嘅關鍵。

主席,事實上世界各國喺一啲特定場合都會奏唱國歌,在場嘅人無論任何國籍,都會肅立或致敬,呢啲係基本嘅禮貌同尊重,何況係自己國家? 「國歌法」第5條就「奏唱國歌的場合」作出規定,今日有議員提出5項修正,想干預政府修改呢啲場合嘅權力,實在毫無道理。而家列出嘅場合,全部都係政府嘅官式場合或政府舉辦嘅重大體育賽事,而且政府要增加奏唱國歌嘅場合,亦要經過先訂立後審議嘅程序,去修正附表3,即係立法會有最後把關權,所以修訂根本無必要。全世界國家嘅人民,好少人會不尊重自己國家嘅國旗國歌,如果因為政治原因而故意唔畀國歌法立法,根本係攪炒派一廂情願,肯定不得民心。

有3位議員就法案第7條「侮辱行為的罪行」提出5項修正,大致上係將罸則大幅降低,及將追究嘅時限大幅減少,其實佢哋係想將「國歌法」變成一紙虛文,完全無咗基本嘅阻嚇性,但正如之前所講,只要市民唔係故意侮辱國歌,根本唔構成犯法,唔需要擔心刑責嘅問題,而且無適當嘅刑責,或者刑責太輕,反而可能變相鼓勵激進嘅青年人以身試法,實在唔可以接受。

另外,有人認為,侮辱一詞太過空泛、定義含糊,甚至話係以言入罪。呢啲講法

太過偏頗,實際係為反對而夾硬講,政府已提出好多法律觀點,去駁斥呢啲歪論,我唔再詳細講,但最基本嘅係,現行香港有唔少法例都有用到侮辱呢個字眼,而且都明確嘅定義,包括「勞資審裁條例」及「裁判官條例」等等。 明顯地,反對派只係立場行先,係為咗玩針對,真係噏得就噏,總之就係要令市民憤怒同產生仇恨。

立法會由上周起審議「國歌法」,網上有人煽動市民用種種暴力方式,去阻止立法會通過國歌法,外面曾經出現過一啲緊張嘅情況,幸好我哋仲可以開到會。老實講,暴力係解決唔到問題,只會令人產生仇恨怨憤,做出害人害己嘅行為。同時,組織暴力去制止香港立法,只會令「香港國安法」更有迫切性,好多人話攬炒派係「香港國安法」嘅推手,真係有道理,希望攬炒派三思。

最近,攬炒派又成功爭取美國啟動取消香港特殊地位,同埋其他制裁香港措施,香港人係最直接嘅受害人,攬炒派呢一、兩年做嘅嘢,究竟令香港人有更好嘅生活,定係將香港人推落動盪、苦難嘅深淵,我希望佢哋認真想清楚,同埋佢哋以後係咪應該繼續咁樣做? 我真係好希望佢哋會明白,作為一個議員,最終目的都係令到人民生活安定,任何損害香港安全,令到香港更動盪,絕對唔應該做,否則,絕對對唔住香港人。多謝主席!

社交分享