中國社會科學院近日發表中國城市競爭力報告，本港連續第11年憑住「綜合經濟競爭力」同「可持續競爭力」嘅優勢，繼續蟬聯全國競爭力第一嘅美譽。不過，呢 啲都係表面風光，報告直指，香港的競爭力優勢正迅速放緩，同內地城市嘅差距正逐漸縮小，香港無論喺人才、軟硬件等優勢都正在弱化之中。
老實講，報告提出嘅問題，我哋都早已知道，亦都唔係近日先至出現，但偏偏我哋一直都解決唔到問題。今時今日，本港有好多方面已經落後於新加坡，現在連內地都亦步亦趨，如果我哋再啲起心肝，為香港尋求突破，香港失去龍頭地位只係遲早嘅事！
近日，多位議員先後提出多個有關經濟前景嘅議案，包括之前林健鋒議員嘅營商環境議案、 今日林大輝議員香港競爭力議案、及即將由吳亮星議員提出維護國際金融中心地位議案，我哋好應該多謝三位議員，佢哋正係提醒緊大家，香港面對著真正而迫切嘅 危機！我希望政府、以至社會大眾，都認真聽下各位議員嘅意見，思考一下香港嘅將來，唔好再沉迷於爭吵同鬥爭之中。
根據中國城市競爭力報告，本港經濟仍高度依賴金融及房地產，但土地和房屋供應嚴重不 足，令樓價過快增長，加上炒作氣氛濃厚，經濟呈泡沫化。房屋及商舖租金急升，一方面推高通脹，阻礙中小企發展，同時亦增加市民生活壓力。此外，香港人口老 化亦日益嚴重，將令到勞動力減少，直接削弱本港競爭力，而報告更預期，當中國發展逐步成熟，本地的服務業勢將被內地取代。
面對咁嚴峻嘅形勢，我哋應該設法為本港注入新動力，尋求新突破，我喺早前多項辯論中已經提過多項建議，唔再重覆。今日，我想補充一點，我認為，香港要防止被內地取代，就應該全力去鞏固一啲我哋有、內地欠缺嘅特質，例如本港昭卓嘅信譽，而信譽亦都係本港一定要堅守嘅原則。
事實上，外國投資者信任本港嘅合約精神，喺香港做生意唔使擔心不明朗因素，而國內嘅消 費者更加對香港出售嘅產品及服務充滿信心。本港昭卓嘅信譽令到本港仍然保持到有大量嘅機會，所以我哋要全力鞏固呢一種特質，而呢一種特質又同本港法治、廉 潔、資訊自由及公民質素等等嘅核心價值觀，有直接嘅關係。近期，社會出現咗一啲劣質產品，例如有牛丸被發現全無牛肉成份，我認為必須要嚴懲呢啲破壞本港信 譽嘅行為。
另一項本港嘅優勢就係本港簡單而低嘅稅制，據我所知，外商仍然願意來港，甚至當香港為 投資中國嘅基地，其中一個重要原因，就係本港簡單嘅稅制。有好多外商都抱怨到中國投資成本越來越重，特別係複雜而繁重嘅稅收，所以部分投資者都願意將總部 留在本港，享受本港低稅率嘅好處。因此，簡單而低嘅稅制仍然係本港嘅優勢，呢個係留住外商嘅好條件，千萬不能改變。
最後，我想講下本港機場問題，目前機場管理局正籌備興建第三條跑道，但面對唔少阻力及 質疑。香港係國際航空樞紐，航空業可以話係香港經濟其中一條大動脈，呢條大動脈暢通，本港經濟可以健康發展，如果呢條大動脈受阻，則本港經濟就會患上高血 壓。據統計，機場直接提供65,000個職位，間接受聘嘅職位超過12萬個，如果計埋同航空業有密切關係嘅四大支柱行業，連帶影響高達一半嘅勞動人口，所 以機場對香港嘅重要性，實在唔使我多講。
本港機場嘅升降量原本預期要到2018年才飽和，但根據最新的數字，早前復活節長假第 一日，機場刷新單日航班處理量紀錄，達到1,172架次，只差28架次，便達1,200架次嘅飽和點，所以飽和嘅日期將會提早來臨。當機場升降量飽和後， 如果長久唔能夠提高升降量，就無法滿足客運及貨運嘅需求，航空公司無可避免要減少二、三線嘅航班，同時又有加價壓力，直接削弱本港競爭力。最慘係因為複雜 嘅航權問題，航班唔嚟香港，亦唔代表可以去廣東其他機場，最後可能益咗其他競爭對手。所以，我相信第三條跑道係需要盡快上馬，確保本港本港競爭力不會受 損。
當然，我哋需要保持港人嘅生計，但亦唔可以放棄自然嘅生態環境。興建第三條跑道有可能會影響到環境同自然生態，我希望機管局能夠投入資源，為環境生態做補救工作，及推動生態嘅可持續發展，亦要確保工程唔會令環境受到污染。
