就維持本港有利營商環境之發言

每次講到本港嘅營商環境時,我都感到憂心。香港目前表面風光,但其實競爭力每況愈下,最令人擔心嘅事,係好多人仲執迷不悟,往往當政府提出經濟建設或便利 營商建議時,就以種種理由大力反對,或者設法拖延,而政府不斷俾人鬧,自然抱住少做少錯嘅心態,以大市場小政府作為藉口,一於安於現狀,最後變成不思進 取,結果香港今時今日仍然靠食老本維生。

 

講到營商環境,我哋無可避免要同競爭對手新加坡比較,新加坡已經連續七年喺世界銀行 《全球經商環境報告》中排名第一,新加坡有咁嘅成績,全因為政府積極進取,既有長遠政策,又具備經濟嘅創造性,特別係採取營商友善政策,佢哋唔單止係由財 經部門去做招商嘅工作,而係所有部門全體高官一齊參加推廣工作,為投資者提供全方位嘅協助,我曾經聽過商界朋友形容,新加坡高官見到投資者,都好似嗒晒糖 一樣,從佢哋嘅態度已經知道,佢哋連續七年得到營商環境排名第一,絕對唔係幸運得嚟。相反,香港雖然排名第二,維持表面嘅繁榮,但好大程度上係依賴內地嘅 協助,有事時亦只能夠靠國家打救。我認為,最值得香港政府學習嘅,就係呢種營商友善政策。

新加坡對投資者可謂倒履相迎,但本港對投資者仍然抱住官僚態度。以我熟識嘅保險及金融 業為例,自從金融海嘯以嚟,政府不斷推出新規則,加強對金融產品及服務嘅監管,已經去到矯枉過正嘅地步,政府往往為免麻煩,寧願一切從嚴,結果就扼殺本港 金融發展嘅空間。我曾收到金融業界嘅反映,類似嘅金融產品,喺新加坡只需個多月嘅審批,就准許推出市場,但喺香港就等咗大半年仍然未有結果,而有關情況唔 係單一例子,已經成為慣例。新加坡嘅監管工作唔會比香港差,點解人哋會咁有效率? 目前,已經有部份投資者覺得香港太過麻煩,已經放棄嚟港出產品,長此下去,香港等如將生意拱手相讓俾競爭對手。我相信,要維持有利營商環境,必須糾正過份 監管嘅壞習慣。

另一項令到本港營商環境惡化,就係本港營商成本高昂,特別係租金貴嘅問題,無論中小企 或跨國企業都一樣深受其害,近期不少具有特色嘅傳統商店因為租金倍升而被迫結業,同時亦有跨國企業因為本港租金太貴而放棄嚟香港投資。事實上,商鋪及寫字 樓租金高昂,可以講係本港營商環境嘅致命傷,如果唔能夠解決,營商環境難免會持續惡化。喺呢方面,政府確實正在想辦法改善,包括發展東九龍商業區、加緊搵 商業用地等等,希望喺一段時間後,政府有成績俾大家睇。

此外,我要指出,本港空氣污染問題、以及國際學校學位不足嘅問題,同樣打擊緊本港嘅營 商環境。空氣污染嘅問題減低國際人才及投資者嚟香港嘅意欲,而原來國際學校學位不足,亦都影響到投資者,我曾經聽到過商界反映,國際人才由於難以安排子女 喺香港讀書,所以唔願意嚟香港工作或投資。其實,呢啲問題都一定程度影響到投資意欲,一定要認真處理。

我近年已經多次建議本港推動總部經濟嘅發展,即係為外商提供優惠條件,吸引佢哋嚟香港 設立地區總部,但政府一直都唔係好有興趣。不過,目前本港嘅競爭力有下降嘅跡象,其實係時候重新檢視及調整香港宏觀嘅發展方向,所以我希望政府能夠重新考 慮總部經濟嘅建議,我相信,如果能夠吸引大量外資嚟香港,除咗有利本港經濟發展外,本地勞工市場及中小企都會直接受惠,對社會百利而無一害。

社交分享